Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺MAer tis ghesciet doen Sanaballat ghehoort hadde dat wij den muer optimmerden, soo is hy seer gram gheworden, ende bouen maten seer beruert sijnde, heeft hy die Ioden bespot,

+ A

2

ende gheseyt voor sijn broeders, ende voor een groote vergaderinghe der Samaritanen, Wat maken die onmachtighe Ioden? sullen die Heydenen hen dat toelaten? Sullen sij sacrificie doen, ende voldoen al op ee-

[p. *363]

nen dach? Sullen sij moghen steenen metsen van die hoopen des ghestubs die verbrant sijn?

3

Ende Thobias die Ammoniter sijn naeste heeft oock gheseyt. Laetse timmeren, eest datter eenen vos opclimt, die sal ouer haren steenen muer springhen,

4

Hoort onse God, want wij sijn gheworden tot een versmaetheyt, keert hen verwijt op haerlieder hooft, Ende geeftse ter versmaetheden int lant der gheuanghenissen,

5

En wilt hen boosheden niet bedecken, ende hen sonden en laet voor v aensicht niet wtgheuaecht worden, want sij hebben bespot die timmerende sijn,

6

⁺Aldus hebben wij den muer opghetimmert ende wij hebben dien gheheel aen een ghebracht tot die helicht toe, Ende des volcs herte is verwect om te wercken,

+ B

7

Ende tis gheschiet doen Sanaballat ende Thobias ende die Arabers ende die Ammaniten ende Asotiten ghehoort hadden dat die schoere des muers van Ierusalem ouertoghen was ende dat die scaerden begonsten ghesloten te worden, soo sijn sij bouen maten seer gram gheworden,

8

Ende sijn al te samen vergadert, dat sij comen souden, ende strijden teghen Ierusalem, ende dat sij laghen legghen souden,

9

Ende wij hebben onsen Godt ghebeden, ende wij hebben wachters ghestelt op die mueren, dach ende nacht teghen hen,

10

Ende Iudas heeft gheseyt. Die macht der draghers is cranc gheworden, ende der aerden is seer vele, ende wij en sullen den muer niet moghen opmaken,

11

Ende onse vianden hebben gheseyt. En laet hen niet weten, noch kennisse hebben voor dat wij int midden van henlieden comen ende hen dootslaen moghen, ende doen dat werck ophouden,

12

⁺Maer tis ghesciet doen die Ioden ghecomen sijn die by hen woonden, ende ons te kennen gauen tot thien reysen van allen die plaetsen door die welcke sij tot ons comen waren,

+ C

13

dat ick heb ghestelt op een plaetse achter den muer al rontsomme volck in ordinancie met haren swaerden ende lancien ende boghen,

14

Ende ick hebt ouersien ende ben opghestaen ende ick seyde tot die treffelijcste mannen ende wethouders, ende tot dat ander deel des ghemeynen volcs. En wilt niet vreesen van haerlieden aensicht, Weest ghedachtich des grooten ende veruaerlijcken heeren, ende strijt voor uwe broeders, uwe sonen ende uwe dochteren ende uwe huysvrouwen, ende uwe huysen,

15

Ende tis ghesciet dat doen onse vianden hoorden dat ons ghebootscapt was, so heeft Godt haren raet te niet ghedaen, Ende wij sijn alle weder ghekeert aen die mueren, een ieghelijc tot sijn werck,

16

Ende tis ghesciet van dien daghe voorts dat die helicht van haren ionghelinghen deden het werck, ende die helicht was bereyt ten strijde, ende lancien, ende scilden ende boghen, ende pansieren, ende die princen waren achter henlieden, in alle die huysen van Iuda

17

der gheender die daer timmerden aenden muer, ⁺ende die lasten droeghen ende diese opleyden, met sijn een hant dede hy dwerck ende metter ander hielt hy tswaert,

+ D

18

want een ieghelijc vanden timmerluyden was met eenen swaerde ghegort aen sijn lendenen, Ende sij timmerden ende blaesden met trompetten neffens my,

19

Ende ick heb gheseyt tot die edelste luyden ende wethouderen ende tot dat ander deel des ghemeynen volcks. Het werck is groot ende breedt ende wij sijn op die mueren verre deen van dander ghesceyden

20

ter plaetsen daer ghi sult hooren tgheclanck van dat trompet derwaerts coemt by ons, Ons Godt sal voor ons vechten,

21

Ende laet ons seluer twerck maken, ende die helicht van onslieden houde lancien vanden opganc des dagheraets, tot dat die sterren wtcomen,

22

Ende op dien tijt heb ick den volcke gheseyt. Een ieghelijck blijue met sijnen knecht in Ierusalem, ende ghi sult hebben buerten by daghe ende nacht om te wercken,

23

Maer ick ende mijn broeders ende mijn knechten ende die hoeders die achter my waren deden ons cleederen niet af, want een ieghelijck worde alleenlijck ghebloodt, om ghewasschen te sijn.