Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺ENde tis ghesciet in die maent Nisan int twintichste iaer des conincks Artaxerses des conincs, ende daer was wijn voor hem, ende ic heb den wijn opghehauen ende den coninc ghegheuen Ende ick was als sieck voor sijn aenschijn,

+ A

2

Ende die coninck heeft tot my gheseydt. Waerom is v aensicht droeue daer ick v nochtans niet sieck en sie? dat en is sonder sake niet, maer daer is eenich quaet (ic en weet niet wat) in v herte, Ende ick heb seer ende bouen maten ghevreest,

3

ende gheseyt totten coninck. Coninck leuen moet ghy inder eewicheyt, waerom en soude mijn aensicht niet truerich sijn, aengesien dat die stadt welck is het huys van mijnder vaderen begrauinghen verwoest is, ende haer poorten sijn metten vier verbrant?

4

Ende die coninck heeft my gheseyt. Om wat dinck bidt ghi? Ende ick heb Gode vanden hemel ghebeden,

5

ende totten coninck gheseyt. Eest dat den coninc goet dunct ende dat v dienaer behaghet voor v aensicht, dat ghy my sendt in Iudeen tot die stadt van mijnder vaderen begrauinghe, ende ick sal die optimmeren,

6

⁺Ende die coninc seyde my, ende die coninghinne die by hem sadt. Tot hoe langhen tijt sal v reyse dueren, ende wanneer suldi wederkeeren? Ende het heeft voor des conincs aensicht belieft, ende hy heeft my ghesonden, ende ick heb hem eenen tijt ghestelt,

+ B

7

Ende ick heb den coninc gheseyt. Duncket den coninck goet, soo gheue hy my brieuen aen die vorsten des lantscaps ouer den vloet, dat sij my ouer leyden tot dat ick int Ioetsche lant come,

8

ende eenen brief aen Asaph den bewaerder van des conincs bosschagie dat hy my hout gheue, dat ick mach decken die poorten des tempels, die torren des huys, ende die mueren der stadt, ende thuys daer ick incomen sal, Ende die coninc heuet my ghegheuen nae die goede hant mijns Godts met my.

9

Ende ick ben comen tot die vorsten des lantscaps ouer den vloet, ende ick heb hen ghegheuen des conincs brieuen. Ende die coninc hadde met my ghesonden hooftmannen der crijsknechten, ende peerde volck,

10

Ende Sanaballat die Horoniter, ende Thobias die knecht die Ammonijter hebbent ghehoort, ende sij sijn droeue gheweest met grooten rouwe, datter een mensche comen was die der kinderen van Israel voorspoet socht

11

⁺Ende ick ben ghecomen te Ierusalem, ende was daer drij daghen,

+ C

12

ende ick stont op des nachts, ick ende een luttel mannen met my, ende ic en heb niemant te kennen ghegheuen wat Godt in mijn herte ghegheuen hadde dat ick doen soude in Ierusalem, ende daer en was gheen lastdraghende beeste met mi, dan alleen die beeste daer ick op sadt,

13

Ende ick ghinck wt door die dalpoorte des nachts, ende voor die draecs fonteyne, ende tot aen die mestpoorte, ende ic bemercte den ghebrokenen muer van Ierusalem, ende haer poorten metten vier verbrant.

14

Ende ick ghinck voorts door tot die fonteynpoorte, ende tot des conincs waterloop, ende daer en was gheen plaetse voor die beeste daer ic op sadt om door te gaen

15

Ende ick clam op ouer die beke des nachts, ende besach den muer, ende wederom ghekeert sijnde ben ick ghecomen tot die dalpoorte, ende soo ben ic wedercomen.

16

Maer die wethouders en wisten niet waer henen dat

[p. *362]

ick ghegaen was, oft wat ic dede, Maer ooc den Ioden, ende den priesteren, ende den eerlijcsten, ende wethouderen, ende den anderen diet werck maecten en hadde ick tot op dien tijt niet te kennen ghegheuen.

17

⁺Ende ick heb tot hen gheseyt. Ghy weet het verdriet daer wij in sijn, aenghesien dat Ierusalem verwoest is, ende haer poorten sijn metten viere vernielt, Coemt ende laet ons optimmeren die mueren van Ierusalem, dat wij voorts niet meer en sijn tot een versmaetheyt,

+ D

18

Ende ick heb hen te kennen ghegheuen die hant mijns Gods dat die goet met my was, ende des conincs woorden dien hy my gheseyt hadde, ende ick segghe. Laet ons opstaen ende timmeren, Ende hen handen sijn versterct gheworden int goede,

19

Ende Sanaballat die Horoniter ende Tobias die knecht die Ammoniter, ende Gosem die Araber, ende sij hebben ons bespot ende versmaet, ende hebben gheseyt. Wat dinck is dit dat ghy doet? Wildi teghen den coninc wederspannich opstaen?

20

Ende ick heb hen weder gheantwoort, ende gheseyt tot hen. Godt des hemels die helpt ons ende wij sijn sijn dienaers, Laet ons opstaen ende timmeren, maer ghy en hebt gheen deel, ende recht, ende ghedenckenisse in Ierusalem.