Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺DIE woorden Nehemie des soons Helchie, Ende tis ghesciet in die maent Casleu, int twintichste iaer ende ic was int casteel Susis,

+ A

2

Ende daer is comen Hanani een van mijnen broeders, hy ende mannen van Iuda, ende ic heb hen gheuraecht vanden Ioden die ouer ghebleuen ende noch leuende waren van die gheuanghenisse, ende van Ierusalem,

3

Ende sij hebben my gheseyt, Die daer ghebleuen ende ghelaten sijn vander gheuanghenissen int lantscap, sijn in groot verdriet ende in versmaetheden, ende den muer van Ierusalem is ghebroken, ⁺ende haer poorten sijn metten viere verbrant,

+ B

4

Ende doen ick aldus danighe woorden ghehoort hadde, soo heb ick gheseten ende gheweent, ende ick heb rouwe ghehadt veel daghen, ende ick vaste ende badt voor daenschijn Godts vanden hemel,

5

Ende ick heb gheseyt. Ick bidde v Heere Godt vanden hemele sterck, groot, ende vreeselijc die tverbont bewaert ende bermherticheyt metten ghenen die v lief hebben, ende v gheboden bewaren.

6

Laet doch v ooren toe luysterende worden, ende v ooghen open, ⁺dat ghy hoort ws dienaers ghebedt, dwelc ick heden bidde voor v, nacht ende dach voor die kindeten van Israhel uwe dienaers, Ende ick belijde voor die sonden der kinderen van Israhel met die welcke sij v ghesondicht hebben, Ende ick ende mijns vaders huys hebben ghesondicht,

+ C

7

door ydelheyt sijn wi verleyt, ende wij en hebben v ghebodt niet ghehouden ende v ceremonien, ende ordeelen die ghy beuolen hebt Moysi uwen dienaer.

8

Weest ghedachtich des woorts dat ghy Moysi uwen dienaer beuolen hebt, segghende. Als ghi sult ouertreden hebben, soo sal ick v verstroyen onder die natien,

9

⁺Ende eest dat ghy wederkeert tot my ende bewaert mijn gheboden, ende die doet, al waerdi oock wech gheuoert tot die eynden des hemels, van daer sal ick v vergaderen, ende wederom brenghen ter plaetsen die ick vercoren hebbe, dat mijnen naem daer woonen soude,

+ D

10

Het sijn emmer v dienaers ende v volck die welcke ghy verlost hebt in v groote stercheyt ende door v machtighe hant,

11

Ic bidde v Heere laet v oore wesen toehoorende tot ws dienaers ghebedt, ende totten ghebede van uwen dienaers die uwen naem willen vreesen, ende bescict uwen dienaer heden, ende verleent hem bermherticheyt voor desen man, want ick was des conincs scencker.