Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺MAer na dat dese dinghen volbracht waren, soe sijn die princen aen my comen segghende, Dat volck van Israel ende die Priesters ende Leuiten en sijn niet ghesceyden van die volcken der landen, ende van haren afgrijselijcheden, te weten der Chananeen ende Hetheen ende Pherezeen ende Iebuseen ende der Ammoniten ende Moabiten ende Egyptenaren ende Amorrheen.

+ A

2

Want sij van haren dochteren tot huysvrouwen ghenomen hebben voor hen ende haren sonen, ende sij hebben dat heylich saet gheminghet metten volcken der landen. Ende der princen ende wethouderen hant, was in dese ouertredinghe dierste.

3

Ende doen ick dit woert ghehoort hadde soe heb ick ghescoert mijn ouercleedt ende ondercleedt, ende ick heb wt ghetrocken thayr van mijnen hoofde ende baerde, ende ick heb gheseten al truerende.

4

Ende sij sijn al by my ghecomen die dwoert des Godts van Israel vreesden, voor die ouertredinghe der gheender die vander gheuanghenissen ghecomen sijn, ende ick sadt al droeuich tot dat auont sacrificie toe.

5

⁺Ende in des auonts sacrificie ben ick opghestaen van mijnder bedructheyt, ende hebbende ghescoert mijn ouercleedt ende onderock soe heb ick mijn knyen gheboocht ende mijn handen wtghereyct tot den Heere mijnen Godt,

+ B

6

ende ick heb gheseyt (Mijn Godt ick scame ende ontsie my mijn aensicht op te heffen tot v want ons boosheden sijn vermenichfuldicht op ons hooft, ende onse misdaden sijn ghewassen totten hemel toe,

7

van onser vaderen daghen. Maer oock hebben wy seluer ghesondicht swaerlijck, tot op desen dach, ende in onse boosheden sijn wij seluer gheleuert ende onse coninck ende onse priesteren in die hant van die coninghen der aerden, ende ten swaerde ende ter gheuanghenissen, ende ten rooue, ende ter bescaemtheyt des aensichts, ghelijck oock op desen dach.

8

⁺Ende nu is als een weynich ende eenen ooghenblick ons ghebedt ghedaen voor den Heere onsen Godt, dat ons sonden ghelaten worden sommighe beuelinghen, ende dat ons sijnen vrede soude ghegheuen worden in sijn heylighe plaetse, ende dat onse Godt soude verlichten ons ooghen, ende gheuen ons een cort leuen in onsen dienst,

+ C

9

want wy sijn dienstknechten ende in onsen dienst en heeft onse Godt ons niet verlaten, ende hy heeft die bermherticheyt ouer ons gheboocht voor den coninck van Persen, dat hy ons dleuen gheuen soude, ende verheffen thuys van onsen Godt ende timmeren sijn verwoestheden, om dat hy ons soude hope gheuen, in Iuda ende in Ierusalem.

10

Ende nu onse Godt wat sullen wy segghen na desen? Want wy hebben v gheboden verlaten

11

die ghy gheboden hebt doer die hant uwer dienaren der propheten, segghende, Dlant daer ghy henen gaet om dat te besitten, is een onsuyuer lant, nae die onsuyuerheyt der volcken, ⁺ende der ander landen, doer die afgrijselijcheden der gheender die dat veruult hebben vanden mont totten mont in haerlieder besmettinghen.

+ D

12

Nu dan daer om en gheeft v dochteren haren sonen niet, ende hen dochteren en neemt niet voer uwe sonen, noch en soect haren vrede, ende haer lieder voerspoet niet, tot inder eewicheyt op dat ghy moecht versterct worden, ende eten dat goet

[p. *360]

der eerden ende dat ghy erfghenamen hebben moecht v kinderen tot inder eewicheyt,

13

Ende nae alle dat ouer ons comen is in onse seer quade wercken, ende in ons groot misdaet, want ghy onse Godt hebt ons verlost van onse boosheyt, ende hebt ons ghegheuen salicheyt ghelijck dat heden is,

14

dat wij niet omme keeren en souden, ende breken v gheboden, ende dat wij oock gheen houwelijcken maken en souden met die volcken van desen afgrijselijcheden. Sijdi op ons gram gheweest tot gantscher verderffenissen toe, dat ghi ons gheen bleuelinghen en soudt laten ter salicheyt?

15

Heere Godt van Israel ghy sijt rechtuerdich want wij sijn ouerbleuen, die souden behouden worden ghelijck dat is op desen dach, Siet wij sijn voor v in ons misdaet, want daerom en machmen voor v niet staen.