Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺DIt sijn dan die Princen der familien ende hen afcoemste die met my opghetrocken sijn int rijck des conincs Artaxersis, van Babilonien.

+ A

2

Van Phinees kinderen Gersom. Van Ithamars sonen Daniel. Van Dauids kinderen hattus.

3

Van Zechenias kinderen ende van Pharos kinderen Zacharias ende met hem sijn ghetelt hondert ende vijftich mannen.

4

Vanden kinderen Phahat-moab Elionai die sone van Zarehe, ende met hem tweehondert mannen.

5

Van Zechenias kinderen Ezechiels sone, ende met hem drij hondert mannen.

6

Van Adans kinderen Abed Ionathans sone, ende met hem vijftich mannen.

7

Van Alams kinderen Isaias die sone Atalie, ende met hem tseuentich mannen.

8

Vanden kinderen Saphatie Zebedia Michaels sone, ende met hem tachentich mannen.

9

Van Ioabs kinderen Obedia Iahiels sone, ⁺ende met hem twee hondert achthien mannen.

+ B

10

Ende van den kinderen Selomith Iosphie sone, ende met hem hondert tsestich mannen.

11

Vanden kinderen Bebai Zacharias Bebais sone, ende met achtentwintich mannen.

12

Van Azgads kinderen Iohannan Eccetans sone, ende met hem hondert ende thien mannen.

13

Van Adonicams kinderen die de laetste waren, ende dit waren hen namen Eliphelet, ende Iehiel ende Samaias, ende met hen tsestich mannen.

14

Van den kinderen Begai Vthai ende Zachur, ende met hen tseuentich mannen.

15

Ende ick hebse vergadert aen den vloet die nederwaerts loopt tot Ahaua, ende wy sijn daer bleuen drij daghen. ⁺Ende ick heb ghesocht onder tvolck ende onder die Priesters der kinderen van Leui ende ick en hebse daer niet gheuonden.

+ C

16

Hier om heb ick ghesonden Eliazer ende Ariel, ende Semeiam, ende Elnathan. Ende Iarib, ende den anderen Elnathan, ende Nathan, ende Zachariam ende Mosollam die Princen, ende Ioiarib, ende Elnathan die wijse.

17

Ende ick heb die ghesonden tot Eddo, die dierste is in die plaetse van Chasphia, ende ic heb in haer lieder mont gestelt die woerden die sij spreken souden tot Eddo, ende sijn broeders Nathineen inde plaetse Chasphie dat sij tot ons bringhen souden

[p. *359]

dienaers van ons Gods huys.

18

Ende sij hebben ons brocht doer die goede hant ons Gods op ons, eenen seer gheleerden man vanden kinderen Moholi des soens Leui, des soens Israel, ende Sarabiam ende sijn kinderen, ende broeders achthien,

19

ende Hasabiam ende met hem Isaiam vanden kinderen Merari ende sijn broeders, ende sijn sonen twintich.

20

⁺Ende van den Nathineen die Dauid ende die Princen ghegheuen hadden tot der Leuiten diensten, tweehondert ende twintich Nathineen. Alle dese worden met haren namen ghenaemt.

+ D

21

Ende ick heb daer vercondicht een vasten by den vloet Ahaua dat wy ghepijnicht souden worden voor den Heere onsen Godt, ende dat wy van hem begheren souden eenen rechten wech voor ons ende onse kinderen, ende alle onse substancie.

22

Want ic scaemde my van den coninck te begheeren hulpe ende rosvolck, die ons bescermen souden vanden vianden op den wech, om dat wy den coninck gheseyt hadden. Die hant ons Gods is op alle die ghene die hem soecken in goetwillicheyt, ende sijn rijck ende sijn macht ende rasende gramscap is op alle die hem verlaten.

23

Ende wy hebben gheuast ende ghebeden onsen Godt hier om, ende tes met ons voerspoedelijck ghecomen.

24

⁺Ende ick hebber van die Princen der Priesteren twaelf wt ghesceyden. Sarabiam ende Hasabiam ende met hen van haren broeders thiene.

+ E

25

Ende ick heb hen by ghewichte gheleuert tsiluer ende tgout, ende die gheheylichde vaten van ons Gods huys, welck die coninck gheoffert hadde ende sijn raetsheeren, ende sijn princen, ende gheheel Israel vanden ghenen die gheuonden waren,

26

ende ick heb by ghewichte in hen handen gheleuert ses hondert ende vijftich talenten siluers ende hondert silueren vaten. Hondert talenten gouts,

27

ende twintich silueren coppen, die woeghen duysent guldenen, ende twee schoon vaten vanden besten metale blinckende ghelijck gout.

28

Ende ick heb tot hen gheseydt, Ghy sijt des Heeren heyleghen ende die vaten sijn heylich, ende oock dat siluer ende gout, dwelck vrijwillichlijck gheoffert is den Heere onser vaderen Godt.

29

Waket ende bewaeret, tot dat ghijt by ghewichte ouerleuert, ⁺voor die princen der Priesteren ende der Leuiten, ende die hooftluyden der familien van Israel in Ierusalem, inden schat van des Heeren huys.

+ F

30

Ende die Priesters ende Leuiten hebben ontfanghen dat ghewicht des siluers, ende des gouts, ende der vaten, om dat te draghen te Ierusalem int huys ons Gods.

31

Aldus sijn wy opghetrocken vanden vloet Ahaua, op den twaelfsten dach der ierster maent, om te reysen nae Ierusalem, ende ons Gods hant was op ons, ende sij heeft ons verlost van die hant der vianden, ende der laghen legghers in den wech.

32

Ende wy sijn ghecomen te Ierusalem ende hebben daer ghebleuen drij daghen.

33

Ende op den vierden dach is gheweghen tgout ende tsiluer, ende die vaten in ons Gods huys, ⁺doer die hant van Meremoth den sone Vrie des Priesters, ende met hem was Eleazar Phinees sone, ende met hen Iozabed die sone van Iosue ende Noadaia die sone van Bennoi den Leuijt,

+ G

34

nae tghetal ende ghewichte van allen dien, ende alle tghewichte is bescreuen op dien tijt.

35

Ende oock die kinderen der ouerreysinghen die vander gheuanghenissen ghecomen waren, hebben heelbrantofferanden gheoffert Gode van Israel, twaelf calueren voor alle tvolck van Israel, sessentneghentich rammen, seuen ende tseuentich lammeren. Twaelf bocken voor die sonde, alle den Heere tot heelbrantofferande.

36

Ende sij hebben ghegheuen des conincs gheboden den drossaten des conincs, die van des conincs aensicht waren ende den vorsten ouer den vloet, ende sij hebben dat volck ende thuys Gods verhauen.