Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺ENde nae dese ghesciedenissen int conincrijck Artaxersis des conincs van Persen was Esdras die sone Saraie, des soens Azarie, des soens Helcie

+ A

2

des soens Sellum, des soens Sadoc, des soens Achitob,

3

des soens Amarie, des soens Azarie, des soens Maraioth,

4

des soens Zarahie, des soens Ozi, des soens Bocci,

5

des soens Abisue, des soens Phinees, des soens Eleazar, des sons Aaron des

[p. *358]

Priesters van tbeghinsel.

6

Desen seluen Esdras is opcomen van Babilonien ende hy was een rasch scrijuer in Moyses wet, die welcke die Heere Godt heeft ghegheuen Israel. Ende die coninck heeft hem ghegheuen nae die hant des Heeren sijns Godts op hem alle sijn begheerte.

7

Ende daer sijn op ghetrocken vanden kinderen van Israel ende vanden kinderen der Priesteren, ende vander Leuiten kinderen, ende vanden sanghers, ende vanden doerwaerders, ende vanden Nathineen in Ierusalem int seuenste iaer, Artaxersis des conincs.

8

Ende sij sijn ghecomen in Ierusalem in die vijfste maent dat is het seuenste iaer des conincs.

9

Want op den iersten dach van der ierster maent begonste hy op te trecken van Babilonien, ende op den iersten dach van der vijfster maent is hy comen in Ierusalem, nae die goede hant sijns Godts op hem.

10

Ende Esdras heeft sijn herte bereydt, dat hy die wet des Heeren ondersoecken soude, ⁺ende dat hy doen ende leeren soude in Israel dat ghebodt ende dat recht ordeel.

+ B

11

Ende dit is het inhoudt des briefs van tghebodt dat Artaxerses die coninck ghegheuen heeft Esdre den Priester den gheleerden scrijuer in die woerden ende gheboden des Heeren ende in sijn ceremonien in Israel.

12

Artaxerses een coninck der coninghen Esdre den Priester den alder gheleertsten scrijuer van die wet Godts des hemels, saluyt.

13

Van my eest gheboden dat soe wien wt den volcke van Israel in mijn rijck belieft, ende van sijnen Priesteren ende Leuiten te gaen in Ierusalem, dat hy gae met v.

14

Want van des conincs aensicht ende sijnder seuen raetsheeren sijdi ghesonden dat ghy het Ioetsche landt ende Ierusalem besoecken soudt in die wet ws Gods, die in v hant is,

15

ende dat ghy draghen soudt tgout ende tsiluere dat die coninck ende sijn raetsheeren vrijwillichlijck gheoffert hebben Gode van Israel. Wiens tabernakel in Ierusalem is.

16

Ende alle tsiluer ende tgout dat ghy vinden sult, in alle dat lantscap van Babilonien, ende dat tvolck sal willen offeren ende vanden Priesters die vrijwillichlijck offeren sullen den huyse van haren Godt welck is in Ierusalem

17

ontfanct vrijlijck, ende coopt naerstelijck met desen ghelde calueren, rammen, lammeren, ende die sacrificien ende natte offerande van dien, ende offert die op den outaer vanden tempel ws Godts die in Ierusalem is.

18

⁺Maer oock eest dat v ende uwen broeders iet belieft te doen vanden anderen goude ende siluer, doet dat nae den wille ws Gods.

+ C

19

Ende die ghereedtscappen die v ghegheuen worden ten dienste van ws Gods huys, leuert die in Gods aensicht in Ierusalem.

20

Ende oock die ander dinghen die van noode sijn sullen in dat huys Gods, soe veel als v nootelijck sal sijn om wt te legghen, dat suldi gheuen vanden schat ende van dat chijns ghelt des conincs, ende van my,

21

Ick Artaxerses coninck hebt ghestelt ende gheboden allen den bewaerders van die ghemeyn gheltkiste, die ouer den vloet sijn, dat ghy sonder vertreck gheeft alle dat van v begheert Esdras die Priester die scrijuer der wet van Godt des hemels,

22

tot hondert talenten siluers, ende tot hondert Chorus maten tarwe, ende tot hondert vaten wijns, ende tot hondert vaten olien, maer sout sonder mate.

23

Alle dat tot den dienst des Gods vanden hemel behoort, laet dat naerstelijck gheuen in dat huys Gods vanden hemel. Dat hy by auontueren niet gram en worde teghen dat conincrijck des conincs ende sijnder sonen.

24

Oock maken wy v kenlijck van alle die Priesteren, ende Leuiten, ⁺ende sanghers, ende doerwaerders, Nathineen, ende dienaers des huys van desen Godt, dat ghy gheen macht en hebbet tolghelt oft tribuyt ende iaerlijcsche rente op hen te stellen.

+ D

25

Maer ghy Esdra nae die wijsheyt ws Godts die in v hant is, stelt rechters ende presidenten dat sij recht doen moghen alle den volcke dat ouer den vloet is, te weten desen die ws Godts wet weeten, ende die ongheleerde leert vrijlijck.

26

Ende alle die ws Godts wet niet naerstelijck en doet ende des conincs, van dien sal een vonnisse wesen tsij ter doot, tsij ter wtbanninghen, tsij int verdoemen van sijnder substancien, oft emmers tot den kerker.

27

Ghebenedijt moet sijn die Heere onser vaderen Godt, die dat in des conincs herte ghegheuen heeft, dat hy des Heeren huys dat in Ierusalem is glorificeren soude,

28

ende heeft in my sijn bermherheyt gheneycht voor den coninck ende sijn raetsheeren, ende voor alle des conincs machtighe princen. Ende ick versterct sijnde doer die hant des Heeren mijns Godts, die in my was heb vergadert van Israel, die Princen die met my optrecken souden.