Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺DOen gheboodt Darius die coninc, ende sij hebben dit ghesocht in die librarie der boecken die in Babilonien op gheleyt waren,

+ A

2

ende daer is gheuonden in Ecbatanis (dwelck is een casteel in dat lantscap van Medena) eenen boeck. Ende daer in was een sulcke ghedenckenisse ghescreuen

3

Int ierste iaer Cyri des conincs soe heeft Cyrus die coninck gheboden dattet huys Gods soude ghetimmert worden dwelck is in Ierusalem, ter plaetsen daer sij die slachofferanden offeren souden, ende dat sij daer legghen souden fundamenten, draghende die hoochde van tsestich cubitus, ende die breydde van tsestich cubitus,

4

drij veruolghende ryen van onghehouwen steenen ende desghelijcke ordinancien oock van nieuwen houten, ende die costen sullen van des conincs huys ghegheuen worden.

5

Maer oock die ghereetscappen van den tempel Gods gulden ende silueren die Nabugodonosor ghenomen hadde wt den tempel van Ierusalem, ende die ghebracht in Babilonien laet weder gheuen, ende wederom draghen inden tempel binnen Ierusalem in hen plaetse, die welck oock in den tempel Godts ghestelt sijn.

6

⁺Nu dan daer om ghy Thathanai ouerste des lants welc ouer den vloet is Starbusanai ende v raetsluyden Apharsacheen, die ouer den vloet sijt gaet verre wech van henlieden,

+ B

7

ende laet maken dien tempel Gods vanden ouersten der Ioden, ende van haren ouders op dat sij dat huys Gods moghen timmeren op sijn plaetse.

8

Ende van my is oock gheboden, wat van den Priesteren der Ioden moet ghedaen worden hen lieden dattet huys Gods ghetimmert worde, te weten datmen van des conincs kiste, dat is vanden tribuyten die ghegheuen worden van dlantscap ouer den vloet, naerstelijck die costen gheue dien mannen, op dat dwerck niet beledt en worde.

9

Ende waert oock van noode, soe salmen hen gheuen calueren, ende lammeren, ende ionghe bocken totten heelen brantoffer Gode vanden hemel, tarwe, sout, wijn, ende olie, nae die behoirte der priesteren die in Ierusalem sijn salmen hen daghelijcs gheuen op dat nerghens af clachte en sij.

10

Ende laetse offeranden offeren Gode des hemels ende bidden voer dleuen des conincs ende sijnder kinderen.

11

Hier om is van my een ghebodt ghestelt. Dat soe wat mensch dit ghebodt verandert, datmen van diens huys sal een hout nemen ende dat op richten ende hem daer aen vast naghelen, ende sijn huys salmen ghemeyn maken.

12

⁺Ende Godt die sijnen naem daer heeft doen woonen, moet verderuen alle die conincrijcken ende dat volck dwelck sijn hant wtreyct om te wederstaen, ende te verderuen dat huys Gods, dat in Ierusalem is. Ick Darius heb dit ghebodt ghestelt, dwelck ick naerstelijck wil volbracht hebben.

+ C

13

Hierom Thathanai die vorst van den lantscappe ouer den vloet, ende Stharbusanai ende sijn raetsluyden hebben naerstelijck ghedaen alsoe Darius die coninck beuolen hadde.

14

Ende die ouders der Ioden timmerden ende hadden voerspoet nae die prophetie van Aggeus den Propheet ende van Zacharias den sone van Adda ende sij hebben ghetimmert, ende op ghemetst doert beuel Gods van Israel, ende naet beuel van Cyrus ende Darius ende Arthxerses den coninghen van Persen.

15

Ende sij hebben dit huys des Heeren volmaect, tot opden derden dach der maent Adar, welc is tseste iaer des conincs Darij.

16

Ende die kinderen van Israel Priesters ende Leuiten ende die ander van den kinderen der ouervoeringhen, hebben ghehouden die wijdinghe van dat huys Gods met blijscappen.

17

⁺Ende sij hebben gheoffert in die wijdinghe van dat huys Gods hondert calueren, twee hondert rammen, vierhondert lammeren, twaelf bocken vanden gheyten voer die sonde van gheheel Israel, nae tghetal van die gheslachten van Israel.

+ D

18

Ende sij hebben die Priesters ghestelt in hen ordinancien ende die Leuiten in hen buerten ouer Gods wercken in Ierusalem, ghelijc daer ghescreuen is int boeck van Moyses.

19

Ende die kinderen van Israel van der oueruoeringhen, hebben Paeschen ghehouden op den veerthiensten dach vander ierster maent.

20

Want die Priesters ende Leuiten waren ghereynicht ghelijck een mensch, allegader suyuer om dat paeschlam ten offer te dooden voor alle den kinderen vander oueruoeringhen ende haren broederen den Priesters ende hen seluen.

21

Ende die kinderen van Israel die weder om comen waren van die ouervoeringhe, ende alle die hen ghesceyden hadden van die onsuyuerheyt der heydenen des lants, tot hen lieden dat sij soecken souden den Heere den Godt van Israel hebbent ghegheten.

22

Ende sij hebben dat hoochtijt van die ongheheefde brooden ghehouden seuen daghen in blijscappen, om dat die Heere hen verblijdt hadde, ende bekeert therte des conincs van Assur tot hen, om hen handen te helpen int werck van thuys des Heeren des Gods van Israel.