Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺ENde Aggeus die Propheet ende Zacharias Addos sone hebben ghepropheteert, propheterende tot die Ioden die in Iudeen ende Ierusalem waren, in den naem des Gods van Israel.

+ A

2

Doen stonden op Zorobabel Salathiels sone, ende Iosue Iosedecs sone, ende sij begonsten te timmeren den tempel Gods in Ierusalem, ende met hen Gods propheten hen helpende.

3

Op dien seluen tijt is tot hen comen Thathanai die een vorst was ouer den vloet, ende Sthar-buzanai ende hen raetsluyden, ende aldus seyden sij hen, Wie heeft v lieden raet ghegheuen dat ghy dit huys op timmeren soudt, ende sijn mueren hermaken.

4

Waer op hebben wy hen gheantwoert, welck die namen der mannen waren die der timmeragien ghebieders waren.

5

Ende die ooghen haers Gods is ghecomen op die ouders der Ioden, ⁺ende sij en consten hen niet verbieden. Ende het heeft hen belieft dat dese sake soude ouerghedraghen worden aen Darium ende dan souden sij ghenoech doen teghen die clachte.

+ B

6

Dits dinhoudt des briefs den welcken ghesonden heeft Thathanai die ouerste des lantscaps ouer die vloet. Ende Stharbuzanai ende sijn raetslieden die Arphasacheen die ouer den vloet waren, aen Darium den coninc.

7

Die woerden die sij hem ghesonden hadden waren aldus ghescreuen, Dario den coninc sij alle vrede,

8

Kenlijck sij den coninck dat wy ghegaen sijn gheweest in dat Ioetsche lantschap tot des grooten Godts huyse dat welck ghetimmert wort van onghehouwen steenen ende die houten worden in die mueren gheleydt, ende dat werck wort neerstelijck ghetimmert, ende het wast in hen handen.

9

Hier om hebben wy die ouders ghevraecht, ende aldus hebben wy hen gheseydt, Wie heeft v orlof ghegheuen dat ghy dit huys soudt timmeren, ende dese mueren weder op maken?

10

Ende wy hebben oock haer lieder namen van hen ghevraecht, dat wy v dat souden bootscappen. ⁺Ende wy hebben ghescreuen die namen van dien mannen die onder hen lieden die princen sijn.

+ C

11

Ende aldusdanighe woerden hebben sij ons gheantwoert seggende, Wij sijn dienaers des Godts van hemel ende aerde, ende wy

[p. *357]

timmeren den tempel die ghetimmert was ouer dese veel iaren, ende die, die groote coninck van Israel gheghetimmert ende opghericht hadde.

12

Maer na dat ons vaderen tot gramscap verwect hadden den Godt des hemels, soe heeft hy die gheleuert in die handen van Nabugodonosor den coninck van Babilonien den Chaldeusschen, ende dit huys heeft hy ooc ghebroken ende sijn volc heeft hy ouergheuoert in Babilonien.

13

Maer int ierste iaer van Cyrus den coninck van Babilonien, soe heeft Cyrus die coninc een ghebodt openbaer ghestelt dat het huys Gods soude ghetimmert worden.

14

⁺Want ooc die gouden ende silueren vaten van Gods tempel welc Nabugodonosor wt den tempel ghehaelt hadde die te Ierusalem was, ende hadde die wech ghedragen in den tempel van Babilonien, heeft Cyrus die coninc wten tempel van Babilonien ghehaelt, ende sij sijn ghegheuen eenen ghenoemt Sassabasar den welcken hy ooc prince ghemaect heeft,

+ D

15

ende hem gheseyt, Neempt dese vaten wech ende gaet henen ende stelt die inden tempel die in Ierusalem is, ende laet dat huys Gods ghetimmert worden op sijn plaetse.

16

Hier om is dien Sassabasar ghecomen ende heeft gheleyt die fundamenten van den tempel Gods in Ierusalem. Ende van dien tijt tot nv toe wort dien getimmert, ende noch en is dien niet volmaect.

17

Nv dan duncket den coninck goet, soe doe hy dat soecken in des conincs librarie die in Babilonien is. Oft oock van Cyrus den Coninck gheboden is gheweest dattet huys Gods in Ierusalem soude getimmert worden. Ende des conincs wille van deser saken laet tot ons senden.