Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺MAer die vianden van Iuda ende Beniamin hebben ghehoort, dat die kinderen der gheuanghenissen eenen tempel optimmerden den Heere den Godt van Israel.

+ A

2

Ende comende tot

[p. *356]

Zorobabel ende tot die Princen der vaderen hebben sij tot hen gheseyt, Laet ons met v lieden timmeren. Want wy soeken den Heere nwen Godt ooc ghelijck ghy. Siet wy hebben slachofferanden gheoffert van die daghen van Asorhaddan des conincs van Assur, die ons hier ghebracht heeft.

3

Ende Zorobabel ende Iosue ende die ander Princen der vaderen van Israel hebben hen gheseyt, Ten betaemt v ende ons niet, dat wy den Heere onsen Godt een huys timmeren souden, maer wy sullen dat selue alleen timmeren den Heere onsen Godt, ghelijc ons Cyrus die coninc van Persen beuolen heeft.

4

Hier om eest gheschiet dattet volc des lants belette die handen des volcs van Iuda, ende turbeerde hen int timmeren.

5

Ende sij hebben tegen hen ghehuert raetsluyden, dat die souden bederuen haren raet alle die daghen van Cyrus den coninck van Persen, ende tot dat rijck van Darius den coninck van Persen.

6

Maer int conincrijck van Assuerus int beghinsel van sijnen rijcke hebben sij ghescreuen een clachte teghen die inwoonders van Iuda ende Ierusalem.

7

⁺Ende in die daghen van Artaxersis heeft ghescreuen Beselam Mithridates ende Tabeel ende die ander die in haren raet waren tot Artaxersem den coninck van Persen, ende den brief der clachten was ghescreuen in Syriersche sprake, ende hi worden ghelesen in die syriersche tale.

+ B

8

Reum Beel-teem, ende Samsai die scrijuer, hebben ghescreuen eenen brief van Ierusalem Artaxersi den coninck aldusdanich.

9

Reum Beel-teem ende Samsai die scrijuer ende die ander hen raetsluyden Dyneen ende Apharsathaceen Terphaleen Apharseen ende Erchueen, Babilonien, Susanecheen Dieuieen, ende Elamiten,

10

ende die andere vanden natien die ouerbracht heeft die groote ende gloriose Asenaphar, ende heeftse doen woonen in die steden van Samarien, ende in die andere lantscappen ouer den vloet in vreden,

11

(dit is het wtscrift des briefs dien sij tot hem sonden) Artaxersi den coninck, v dienaers, mannen die ouer den vloet woonen segghen groetenisse.

12

Kenlijck sij den coninck dat die Ioden die van v tot ons sijn op ghetrocken, sijn ghecomen in Ierusalem, een wederspannighe ende seer quade stadt, die welck sij timmeren oprechtende haer mueren ende die wanden vermakende.

13

⁺Hier om nv kenlijck sij den coninck, eest dat dese stadt opghetimmert wort ende haer mueren hermaect, soe en sullensij gheen tribuyt, noch tol, noch iaerlijcsche renten gheuen, ende dese scade sal tot die coninghen comen.

+ C

14

Maer wy ghedachtich des souts dat wy int paleys gheten hebben, ende want ons onbehoorlijck dunct des conincs scade te sien, daer om hebbene wy ghesonden ende ghebootscapt den coninck,

15

dat ghy soudt ondersoecken in die boecken van uwer vaderen hystorien, ende ghi sult dat bescreuen vinden in die registeren der ghesciedenissen, ende ghy sult weten dat die stadt een wederspannighe stadt is, ende scade doende den coninghen ende den lantscappen, ende orloghen sijn in haer verwect van oude voerleden daghen. Om welcke sake die stadt oock bedoruen is.

16

Wy bootscappen dit den coninck. Want eest by alsoe dat die stadt opghetimmert wordt ende haer mueren weder op ghemaect, soe en suldi gheen besittinghe meer hebben ouer den vloet.

17

Dit woert heeft die coninck ghesonden tot Reum beel-teem ende Samsai den scrijuer, ende tot die ander die in haren raet waren inwoonders van Samarien, ende den anderen ouer den vloet, ⁺biedende salicheyt ende vrede.

+ D

18

Die clachte die ghy aen ons ghesonden hebt is openbaerlijck ghelesen voor my,

19

ende tes van my beuolen, ende sij hebben dat ondersocht ende gheuonden dat die stadt van ouden daghen teghen die coninghen opstaet, ende dat daer in verwect sijn oplopen ende orloghen,

20

Want daer hebben seer vrome coninghen geweest in Ierusalem, die welcke hebben heerscappie ghehadt ouer alle dlantscap datter ouer den vloet is. Ende sij ontfinghen tribuyt ende tolghelt ende iaerlijcsche renten.

21

Hier om nv hoort dat vonnisse. Verbiedt die mannen, dat die stadt niet opghetimmert en worde, tot dat by auontueren van my gheboden worde.

22

Siet toe dat ghy dit niet onachtsamelijck en volbrenghet, ende dat het quaet teghen die coninghen allinxkens niet meerder en worde.

23

Aldus soe is duytscrift van Artaxersis des conincs ghebode ghelesen voor Reum Beel-teem ende Samsai den scrijuer, ende haren raetslieden, ende sij sijn haestelijck wech ghegaen tot Ierusalem aen die Ioden, ende sij hebben hen verboden metten arm ende metter macht.

24

Doen is ghescorst gheweest het werck van des Heeren huys in Ierusalem, ende ten worde niet ghedaen tot het tweede iaer van Darius des conincs van Persen rijck.