Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺ENde die seuenste maent was nu comen, ende die kinderen van Israel waren in hen steden. Hier om is tvolck vergadert ghelijck een man in Ierusalem.

+ A

2

Ende Iosue Iosedecs sone is opghestaen ende sijn broeders die Priesters ende Zorobabel Salathiels sone ende sijn broeders, ende sij hebben getimmert den outaer des Gods van Israel dat sij daer op offeren souden brantofferanden, ghelijc dat ghescreuen is in die wet Moysi des mans Godts.

3

Ende sij hebben den outaer Gods ghestelt op sijn basementen, doen hen die volcken des lants rontsomme daer om veruaernissen aen deden, ende sij hebben daer op gheoffert brantoffer den Heere des morghens ende auonts.

4

Ende sij hebben ghehouden dat hoochtijt der tabernakelen ghelijc dat ghescreuen is, ende heelbrantofferande tot elcken daghe veruolghens nae tghebodt, elcs daechs werck op sijnen dach.

5

⁺Ende na desen, den dagelijcschen heelen brantoffer, soe wel in die nieuwe maenden, als in alle die hoochtijden des Heeren die gheheylicht waren, ende in alle die daghen in die welcke datmen ghewillighe gauen den Heere offerde.

+ B

6

Van den iersten dach der seuenster maent hebben sij begonnen te offeren die heelbrantofferande den Heere. Maer den tempel Gods en was noch niet ghefundeert.

7

Maer sij hebben tghelt den steenhouwers ghegeuen ende den metsers, ende ooc spijse, ende dranck ende olie den Sydoniters ende die van Tyrien, dat sij cederen houten brenghen souden van Lybano op die zee tot Ioppen. Alsoe hen dat beuolen hadde Cyrus die coninck van Persen.

8

Maer int tweede iaer haerder toecoemsten totten huyse Gods in Ierusalem, in die tweede maent hebben begonst Zorobabel Salathiels sone, ende Iosue Iosedecs sone, ende die andere van haren broeders Priesters ende Leuiten, ende alle die wt die gheuanghenissen ghecomen waren te Ierusalem, ⁺ende sij hebben ghestelt die Leuiten van twintich iaren ende daer bouen, dat sij dwerck des Heeren souden voertdrijuen.

+ C

9

Ende Iosue ende sijn sonen ende sijn broeders Cedmihel ende sijn sonen, ende die sonen van Iuda stonden ghelijck een man, dat sij neersticheyt doen souden op die ghene diet werck deden in den tempel Gods. Die sonen van Henadad ende hen kinderen ende hen broeders Leuiten.

10

Als dan vanden metsers des Heeren tempel ghefundeert was, soe stonden die priesters in haer cieraet met trompetten, ende die Leuiten Asaphs sonen met cimbalen, dat sij Godt louen souden doer die hant van Dauid den coninck van Israel.

11

Ende sij songhen tsamen met lofsanghen ende met belijdinghe den Heere. Want hy goet is. Want inder eewicheyt sijn bermherticheyt is ouer Israel. ⁺Ende alle tvolck riep met grooten gheroep inden Heere te louen, om dat den tempel des Heeren ghefundeert was.

+ D

12

Ooc veel vanden Priesteren ende Leuiten ende Princen der vaderen ende die ouders die den tempel ghesien hadden te voren doen die ghefundeert was, ende desen tempel in hen oogen, weenden met luyder stemmen ende veel roepende met blijscap hieuen hen stemmen op.

13

Ende daer en conste niemant onderkennen die stemme van tgheroep der gheender die blijscap maecten ende die stemme van des volcs weenen. Want tvolck riep al ondereen met groot geluyt, ende die stemme worde verre gehoort.