Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ALs dan Esdras aldus badt, ende aenriep Godt ende weende ende lach voor Gods tempel, so is tot hem vergadert van Israel een vergaderinghe seer groot bouen maten, van mans ende vrouwen ende kinderen, ende tvolck weende met een groot ghescrey,

+ A

2

Ende Sechenias die sone van Iehiel van Elams kinderen heeft gheantwoort ende gheseyt tot Esdras. Wij hebben ouertreden teghen onsen Godt ende hebben vreemde vrouwen ghetrout vanden volcke des lants, Ende nv isser eenighe penitencie in Israel,

3

hier af soo laet ons een verbont maken metten Heere onsen Godt dat wij verworpen alle die huysvrouwen, ende die van dese gheboren sijn, nae des Heeren wille, ende der gheender die des Heeren ons Gods ghebodt vreesen, laet dat doen nae die wet,

4

Staet op het behoort v toe te ondersceyden, ende wi sullen met v sijn, wert versterct, ende doetet.

5

Hierom is Esdras opghestaen, ende heeft besworen die princen der priesteren ende Leuiten ende gheheel Israhel dat sij doen souden nae dit woort ende sij hebbent ghesworen,

6

Ende Esdras is opghestaen voor dat huys Gods, ende hy is wech ghegaen tot die slaepcamer van Iohanan Eliazibs sone, ende hy is daer inghegaen, gheen broot en heeft hy gheten ende gheen water en heeft hy ghedroncken, Want hy beweende die ouertredinghe der gheender die vander gheuanghenissen ghecomen waren,

7

⁺Ende daer is eenen wtroep ghedaen in Iuda ende in Ierusalem allen den kinderen der ouerreysinghen, dat sij vergaderen souden in Ierusalem,

+ B

8

Ende alle die niet comen en souden binnen drij daghen nae den raet der princen ende der ouders, diens substancie sal heel ghenomen worden, ende hy sal verworpen worden wt die vergaderinghe der ouerreysinghen,

9

Hierom sijn alle die mannen van Iuda ende Beniamin tsamen comen in Ierusalem drij daghen lanc dat is die neghenste maent, opden twintichsten dach der maent, ende alle tvolck sadt in die strate vanden huyse Gods, beuende om der sonden wille, ende vanden reghenen,

10

Ende Esdras die priester is opghestaen ende heeft tot hen gheseyt. Ghy hebt ouerghetreden ende ghetrouwet vreemde huysvrouwen dat ghy vermeerderen soudt die misdaet van Israhel,

11

Ende nv belijdt den Heere uwer vaderen Godt ende doet sijn behaghen, ende sceydt v van die volcken des lants, ende van die vreemde huysvrouwen,

12

Ende die gheheel menichte heeft gheantwoort ende gheseyt met luyder stemmen. Nae v woort tot ons, alsoo moet ghescieden,

13

Maer nochtans aenghesien dattet volck veel is ende reghenachtich weder, ende wij en moghen niet lijden buyten te staen, ende want dit gheen werck en is van eenen daghe oft van tween (Want wij hebben seer swaerlijck ghesondicht in dit woort)

14

soo laet princen stellen in die gheheel menichte, ende dat alle die in onse steden vreemde huysvrouwen ghenomen hebben, comen ten ghesetten tijden, ⁺ende met hen die ouders van steden te steden ende hen rechters, tot dat die gramscap ons Godts van ons ghekeert worden aengaende deser sonden,

+ C

15

Hierom soo hebben Ionathan Azahels sone ende Iaazia die sone van Thecue hier ouer ghestaen, ende Mesollam, ende Sebethai die Leuiten hebben hen gheholpen,

16

Ende die kinderen der ouerreysinghen hebben alsoo ghedaen, Ende Esdras die priester ende die mannen princen der familien in haerder vaderen huysen ende si alle bi haren namen sijn ghegaen, ende sijn gheseten opden iersten dach der thienster maent, dat sij dit dinck ondersoecken souden,

17

Ende sij sijn ten eynde comen van alle die mans die vreemde huysvrouwen ghetrout hadden totten iersten dach vander ierster maent,

18

Ende daer sijn gheuonden vanden priesters kinderen die vreemde huysvrouwen ghetrouwet hadden, Van die kinderen Iosue des soons Iosedec ende sijn broeders Maasia, ende Eliezer, ende Iarib, ende Godolia,

19

Ende sij hebben hen handen ghegheuen, dat sij hen wijuen souden wech iaghen, ende voor hen misdaet eenen bock offeren,

20

Ende van Emmers kinderen Hanani, ende Sebedia,

21

Ende van Harims kinderen Maasia, ende Elia, ende Semeia, ende Iehiel, ende Ozias,

22

Ende van Pheshurs kinderen, Elioenai, Maasia, Ismael, Nathanael, Iozabed, ende Elasa,

23

Ende vander Leuiten kinderen, Iozabed, ende Semei, ende Celaia, die is Calita, Phathaia, Iuda, ende Eliezer,

24

Ende vanden sanghers Eliazib, Ende van die doorwaerders, Sellum, ende Telem, ende Vri,

25

Ende van Israel van Pharos kinderen Remeia, ende Iezia, ende Melchia, ende Miamin, ende Eliezer ende Melchia, ende Banea,

26

Ende van Elams kinderen Mathania, Zacharias, ende Iehiel, ende Abdi, ende Ierimoth, ende Elia,

27

Ende vanden kinderen Zethua, ⁺Elioenai, Eliazib, Mathania, ende Ierimuth, ende Zabad, ende Aziza,

+ D

28

Ende van die kinderen Bebai, Iohanan, Hanania, Zabbai, Athalai,

29

Ende vanden kinderen Bani, Mosollam, ende Melluch, ende Adaia, Iasub, ende Saal, ende Ramoth,

30

Ende vanden kinderen Phahath, Moab, Edna, ende Ialal, Bananias, ende Maasias, Mathanias, Bezeleel, Bennui, ende Manasse,

31

Ende van Herems kinderen, Eliezer, Iesue, Melchias, Semeias, Simeon,

32

Beniamin, Maloch, Samarias,

33

Ende van Hasoms kinderen Mathanai, Mathatha, Zabad, Eliphelet, Iermai, Manasse, Semei,

34

Van die kinderen Bani, Maaddi, Amram, ende Vel,

35

Baneas, ende Badaias, Cheliau,

36

Vania, Marimuth, ende Eliazib,

37

Mathanias, Mathanai, ende Iasi, ende

38

Bani, ende Bennui, Semei,

39

ende Salmias, ende Nathan, ende Adaias,

40

Mechnedabai, Sifai, Sarai,

41

Ezreel, ende Selemiau, Semeria,

42

Sellum, Amaria, Ioseph,

43

Van die kinderen Nebo, Iehiel, Mathathias, Zabad, Zabina, Ieddu, ende Ioal, ende Banaia,

44

Alle dese hadden ghenomen vreemde huysvrouwen, ende onder dese waren vrouwen die kinderen ghebaert hadden.

Hier eyndet dierste boeck Esdre.