Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxv. Capittel.

1

⁺ENde Iosias heeft in Ierusalem ghehouden Tphase den Heere dwelck ten offer ghedoodt was op den veerthiensten dach der ierster maent.

+ A

2

Ende hy heeft die priesteren ghestelt in hen officien, ende vermaent dat sij dienen souden in des Heeren huys.

3

Ende den Leuijten (nae der welcker leringhen gheheel Israel den Heere gheheylicht worde) heeft hy gheseyt, Stelt die arcke in die heylijchste plaetse des tempels welc Salomon Dauids sone die coninck van Israel ghetimmert heeft. Want ghy en sult die gheenssins voertaen meer draghen, maer nv dient den Heere uwen Godt, ende sijnen volcke Israel.

4

Ende bereydt v, by v huysen ende maechscappen in die deylinghen van een ieghelijcken besonder ghelijck beuolen heeft Dauid die coninck van Israel, ende bescreuen heeft Salomon sijn sone,

5

ende dient in die heyleghe plaetse by die familien ende scaren der Leuiten,

6

ende gheheylicht sijnde doodt ten offer het Phase. Bereydt oock uwen broeders dat sij moghen doen nae die woerden welcke die Heere ghesproken heeft doer die hant van Moyses.

7

Ende Iosias heeft daer bouen alle den volcke dwelck daer gheuonden was in dat Hoochtijt van Phase, ghegheuen lammeren ende ionghe boxkens wt die cudden, ende van anderen cleynen vee dertich duysent, ende drij duysent rinderen, dese waren al van des conincs substancie.

8

⁺Ende sijn vorsten hebben oock vrijwillichlijc gheoffert dat sij ghelooft hadden, soe wel den volcke als den Priesteren ende Leuiten. Maer Helcias ende Zacharias ende Iahiel die Princen van des Heeren huys hebben den Priesteren ghegheuen om Tphase te houden cleyn vee onder een ghemingt twee duysent ses hondert, ende drijhondert ossen.

+ B

9

Maer Chonenias ende Semeias oock ende Nathanael sijn broeders, ende oock Hasabias ende Iehiel, ende Iosabad die princen der Leuiten hebben den anderen leuiten ghegheuen om dat Phase feestelijck te houden vijfduysent cleyn vee, ende vijfhondert ossen.

10

Ende den dienst is bereydt ende die Priesters hebben ghestaen in haer officie. Ende die Leuiten oock in hen scaren nae des conincs ghebodt.

11

Ende Tphase is ten offer ghedoot ende die Priesters hebben met hen hant dbloet ghespraeyt, ende die Leuiten hebben die vellen der brantofferanden afghetrocken,

12

ende sij hebben die wtghesceyden, dat sij die gheuen souden by die huysen ende familien van eenen yeghelijcken, ende dat sij den Heere souden gheoffert worden alsoe daer ghescreuen is int boeck van Moyses. Ende van den ossen hebben sij oock desghelijcs ghedaen,

13

ende sij hebben Tphase opt vier ghebraden, alsoe dat in die wet ghescreuen is, maer die vreedt offeranden hebben sij ghecoect in metalen potten ende ketels, ende eerden potten ende haestelijck hebben sij dat bedeylt alle den ghemeynen volcke.

14

Maer voer hen ende den Priesteren hebben sij namaels bereyt. Want in dat offeren der brantofferanden ende der vetten des inghewants hebben die Priesters becommert gheweest tot den nacht toe. Waer om dat die Leuiten voor hen seluen, ende voor die Priesters Aarons sonen ten alderlesten bereydt hebben.

15

Maer die sangers Asaphs kinderen stonden in hen ordinancie nae Dauids gebodt, ende Asaphs ende Hemans ende Idithuns des conincs propheten. ⁺Maer die doerwaerders wachten aen Elcke poorte besonder, alsoe dat sij niet eenen ooghenblick en ghinghen vanden dienst. Waer om dat hen broeders die Leuiten hen spijsen bereydt hebben.

+ C

16

Hier om soe is alle den Gods dienst des Heeren behoirlijck voldaen op dien dach, dat sij Tphase souden houden ende offeren brantofferanden op des Heeren outaer nae tghebodt des conincs Iosie.

17

Ende die kinderen van Israel die daer gheuonden waren hebben Phase ghehouden op dien tijt, ende dat hoochtijt vanden ongheheefden brooden seuen daghen.

18

Alsulck Phase en heefter niet gheweest in Israel, van Samuels des propheets daghen. Maer ooc niemant van alle den coninghen van Israel en heeft sulck Phase ghehouden ghelijck Iosias den Priesteren ende Leuiten, ende gheheel Iuda ende Israel die gheuonden was ende den inwoonders van Ierusalem.

19

Int achthienste iaer des conincs Iosie is dat Phase feestelijck ghehouden.

20

Nae dat Iosias den tempel vermaect hadde soe is Nechao die coninck van Egypten opcomen om te orloghen in Charchamis by den vloet Euphrates, ende Iosias is hem teghen ghetrocken.

21

Maer hy heeft tot hem boden ghesonden ende gheseyt, Wat heb ick met v te doen coninck van Iuda? Ick en coem heden teghen v niet, maer ick orloghe teghen een ander huys, tot dat welcke my Godt haestelijck heeft gheboden te gaen. Houdt op teghen Godt te doen, die met my is, dat hy v niet en doode.

22

⁺Iosias en wilde niet wederkeren, maer hy heeft teghen hem eenen strijdt bereydt ende hy en wilde niet hooren na die woerden van Nechao wt den mont Gods. Maer hy is voerts ghereyst om te strijden int velt van Mageddo.

+ D

23

Ende aldaer ghewont sijnde vanden scutters heeft hy gheseyt sijnen knechten, Leyt my wt den strijdt want ick ben seer ghewont.

24

Die welcke hebben hem ghenomen vanden eenen waghen op eenen anderen waghen die hem volchde op der coninghen maniere, ende hebben hem wech ghevuert in Ierusalem ende hy is ghestoruen ende begrauen in sijnder vaderen graf, ende gheheel Iuda ende Ierusalem hebben hem beweent,

25

Ieremias aldermeest, wiens sanghers ende sangherssen allegader tot op den dach van heden verhalen die clachtighe sanghen ouer Iosiam, ende het is als een wet gheworden in Israel. Siet men seyt

[p. *353]

dat ghescreuen is in die clachtighe sanghen.

26

Maer dander van Iosias woerden, ende van sijnder bermherticheden, die doer des Heeren wet gheboden sijn,

27

ende sijn ierste ende laetste wercken sijn ghescreuen int boeck der coninghen van Iuda ende Israel.