Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxiiij. Capittel.

1

⁺ACht iaren out was Iosias doen hy begonste te regneeren ende eenendertich iaren heeft hy gheregneert in Ierusalem.

+ A

2

Ende hy heeft ghedaen dat recht was in daenschijn des Heeren, ende heeft ghewandelt in Davids sijns vaders weghen, Hy en isser niet besijden ghegaen ter rechter oft ter slincker hant.

3

Maer int achtste iaer van sijnen rijcke doen hy noch een kint was, heeft hy begonst te soecken den Godt sijns vaders Dauid. Ende int twaelfste iaer na dat hy begonst hadde soe heeft hy Iudam ende Ierusalem ghesuyuert van die hoochden ende boschkens, ende afgoden ende ghesneden beelden.

4

Ende sij hebben voor hem afghebroken die outaren van Baalim ende die afgoden die daer op ghestelt waren, hebben sij in stucken ghebroken, ende die boschkens ende ghesneden beelden heeft hy afghehouwen ende in stucken ghebroken, ende op die grauen der gheender die daer slachofferanden pleghen te offeren heeft hy die stucken verstroyt.

5

Ende daer bouen heeft hy die beenderen der priesters verbrant op der afgoden outaren ende hy heeft Iudam ende Ierusalem ghesuyuert.

6

⁺Ende oock in die steden van Manasse ende Ephraim ende Symeon tot Nephthali toe heeft hy die al om gheworpen.

+ B

7

Ende doen hy die outaren afghebroken hadde, ende die boschkens ende ghesneden beelden al in stucken ghebroken ende alle der afgoden tempels omgheworpen hadde van alle dlant van Israel, soe is hy wederom comen te Ierusalem.

8

Hier om int achthienste iaer van sijnen rijcke alst lant nv ghesuyuert was ende des Heeren tempel, soe heeft hy ghesonden Saphan den sone Eselie ende Maasiam den prince van der stadt, ende Ioha Ioachaz sone den greffier, dat sij souden vermaken des Heeren sijns Gods huys.

9

Die welcke sijn ghecomen tot Helciam den grooten Priester, ende van hem ghenomen hebbende tghelt datter ghebracht was in sheeren huys ende dat die Leuiten, ende doerwaerders vergadert hadden van Manasse ende Ephraim, ende van alle die ouerbleuene van Israel, ende oock van gheheel Iuda ende Beniamin, ende bewoonders van Ierusalem,

10

⁺hebben sij dat in die handen gheleuert der geender die ouer die wercluyden waren in des Heeren huys, dat sij den tempel vermaken souden, ende vast toe maken alle dat cranck was.

+ C

11

Ende die hebben dat ghelt ghegheuen den wercluyden, ende den metsers dat sij steenen coopen souden van die steengroeuen, ende houten tot die ghebintselen der timmeragien, ende tot die ouerspansels der huysen welck die coninghen van Iuda ghebroken hadden.

12

Die welcke alle dinghen ghetrouwelijck deden. Ende die ouerste der werckluyden waren Iahach, ende Abdias van den kinderen Merari, Zacharias ende Mosollam van Chaaths kinderen, die dwerck voerts stuerden, al te samen Leuiten connende spelen op instrumenten van musijcke.

13

Maer ouer die ghene die tot versceyden orbaer lasten droeghen waren die scriuers ende meesters vanden Leuiten doerwaerders.

14

Ende doen sij tghelt wt haelden dat in des Heeren tempel ghebracht was, soe heeft Helchias die Priester gheuonden den boeck van des Heeren wet doer die hant van Moyses,

15

⁺ende hy heeft gheseyt tot Saphan den scrijuer. Den boeck der wet heb ick gheuonden in des Heeren huys. Ende hy heeft hem dien ghegheuen.

+ D

16

Ende die heeft den boeck binnen by den coninck ghebracht ende hem ghebootscapt segghende, Alle die dinghen die ghy in uwer knechten hant ghegheuen hebt siet die worden volbracht.

17

Tsiluer dat in des Heeren huys gheuonden is hebben sij te hoope ghesmolten, ende tes ghegheuen den ouersten vanden wercluyden, ende der gheender die versceyden wercken maken.

18

Daer toe soe heeft my Helcias die Priester oock desen boeck gheleuert. Den welcken als hy voor den coninck ghelesen hadde,

19

ende hy die woorden der wet ghehoort hadde, soe heeft hij sijn cleederen ghescoert,

20

ende heeft beuolen Helcie ende Ahicam Saphans sone, ende Abdon den sone van Micha ende Saphan oock den scrijuer, ende Asae des conincs knecht segghende,

21

Gaet henen, ende bidt den Heere voor my, ende voor die ouerbleuene van Israel ende Iuda, van alle die woerden van desen boeck die gheuonden is. ⁺Want een groote verbolghentheyt des Heeren heeft op ons ghedropen om dat ons vaders des Heeren woerden niet bewaert en hebben, dat sij doen souden al dat in desen boeck ghescreuen is.

+ E

22

Hier om is Helcias wech ghegaen ende die tsamen vanden coninck ghesonden waren tot Oldam die prophetersse, die huysvrouwe van Sellum des soens van Thecuath des soens Hasra des bewaerders vanden cleederen, die welcke woonde binnen Ierusalem in tweede deel ende sij hebben haer gheseyt die woorden die wy bouen vertelt hebben.

23

Ende sij heeft hen gheantwoert, Dit seyt die Heere die Godt van Israel, Segt den man die v ghesonden heeft aen my,

24

Dit seyt die Heere, Siet ick sal quaeden op dese plaetse brenghen, ende op haer bewoonders, ende alle die vermaledijdinghen die in desen boeck ghescreuen sijn, den welcken sij ghelesen hebben voer den coninck van Iuda,

25

want sij hebben my verlaten, ende hebben sacrificie ghedaen den vreemden goden, om dat sij my tot gramscap souden verwecken, in alle die wercken van haren handen, daer om sal mijn rasende gramscap druppen op dese plaetse, ende die en sal niet wt ghebluscht worden.

26

⁺Maer totten coninck van Iuda die v ghesonden heeft om den Heere te verbidden, spreect aldus, Dit seyt die Heere die Godt van Israel. Om dat ghy ghehoort hebt die woerden van den boeck,

+ F

27

ende v herte vermorwet is, ende ghy verootmoedicht zijt in daensicht des Heeren van desen dinghen die gheseyt sijn teghen dese plaetse ende teghen die bewoonders van Ierusalem, ende want ghy ontsiende mijn aensicht hebt v cleederen ghescoert, ende hebt gheweent voer my, soe hebbe ick v oock verhoort, seyt die Heere.

28

Want ick sal v nv versamen tot uwen vaderen ende ghy sult in v graf ghedraghen worden in vreden, ende v ooghen en sullen alle tquaet niet sien, dat ick brenghen sal op dese plaetse, ende op haer bewoonders. Hier om hebben

[p. *352]

sij den coninck vertelt alle dat sij gheseyt hadde.

29

⁺Ende hy tsamen gheroepen hebbende alle die ouders van Iuda ende Ierusalem

+ G

30

es opghegaen in des Heeren huys ende tsamen oock alle die mannen van Iuda, ende bewoonders van Ierusalem, die Priesteren ende Leuiten, ende alle tvolck vanden minsten totten meesten. Den welcken daer sijt alle hoorden heeft die coninck ghelesen alle die woerden des boecs.

31

Ende staende in sijnen rechter stoel, heeft hy een verbont ghemaect voor den Heere, dat hy wandelen soude nae hem, ende dat hy bewaren soude sijn gheboden, ende ghetuyghenissen ende rechtuaerdichmakinghen met alle sijn herte ende met alle sijn ziele, ende doen al datter ghescreuen is in den boeck die hy ghelesen hadde.

32

Ende hy heeft daer op oock besworen alle die beuonden waren in Ierusalem ende Beniamin, ende die inwoonders van Ierusalem hebben ghedaen nae tverbont des Heeren haerder vaderen Godt.

33

Hier om heeft Iosias wech ghenomen alle die afgrijselijcheden van alle die lantscappen der kinderen van Israel ende heeftse alle die in Ierusalem ouerbleuen waren doen dienen den Heere haren Godt. In allen sijn daghen en sijn sij niet af ghesceyden vanden Heere haerder vaderen Godt.