Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxiij. Capittel.

1

⁺TWaelf iaren out was Manasses doen hy begonste te regneren ende vijfenvijftich iaren heeft hy gheregneert in Ierusalem.

+ A

2

Ende hy heeft quaet ghedaen voor den Heere, nae die afgrijselijcheyt der heydenen welck die Heere voor die kinderen van Israel te niet ghedaen hadde.

3

Ende hy om ghekeert sijnde heeft weder op ghemaect die hoochden welck Ezechias sijn vader af gheworpen hadde, ende hy heeft outaren op ghericht voor Baalim, ende boschkens ghemaect, ende hy heeft aenbeden alle dat heyr des hemels, ende dien eere bewesen.

4

Ende hy heeft oock outaren ghetimmert in des Heeren huys, daer die Heere af gheseyt hadde in Ierusalem sal mijnen naem sijn inder eewicheyt.

5

Ende hy heeft die ghetimmert alle den heyre des hemels, in die twee voerhouen van des Heeren huys,

6

Ende hy heeft sijn sonen doen gaen doert vier int dal Benennom, hy hadde aenmerck op droomen, ende volchde die waaerseggherie wtervoghelen sanck ende hy behielp hem met der tooueraers consten, hy hadde by hem tooueraers ende besweerders, ende veel quade wercken heeft hy ghedaen voor den Heere, dat hy hem creyten soude.

7

⁺Ende hy heeft oock ghesneden ende ghegoten beelden ghestelt in des Heeren huys, daer af dat die Heere ghesproken heeft tot Dauid ende tot Salomon sijnen sone, segghende, In die huys, ende in Ierusalem die ick vercoren hebbe wt alle die gheslachten van Israel, sal ick mijnen naem stellen in der eewicheyt.

+ B

8

Ende ick en sal Israels voet niet laten roeren vanden lande dwelck ick haren vaderen ghegheuen hebbe. By alsoe nochtans eest dat sij onthouden te doen tghene dat ick hen gheboden hebbe, ende alle die wet, ende ceremonien ende rechten doer die hant van Moyses.

9

Aldus heeft Manasses Iudam verleyt, ende die inwoonders van Ierusalem dat sij quaet doen souden, meer dan alle die heydenen welck die Heere verdoruen hadde van daenschijn der kinderen van Israel.

10

Ende die Heere heeft ghesproken tot hem ende tot sijnen volcke, ende sij en hebbens niet willen aenhooren.

11

Daer om heeft hy op hen ghebracht die Princen van dat heyr des conincs van Assyrien, ende sij hebben Manassen gheuangen, ende hem met ketenen ende veteren ghebonden hebben sij ghebracht in Babilonien.

12

⁺Die welcke (nae dat hy benauwt was) heeft ghebeden den Heere sijnen Godt, ende hy heeft penitencie ghedaen grootelijck voer sijnder vaderen Godt,

+ C

13

ende hy heeft hem seer ootmoedelijck ghebeden, ende naerstelijcken begheert, ende die heeft sijn ghebedt verhoort, ende hem weder om ghebracht in Ierusalem, in sijn rijck, ende Manasses heeft bekent dat die Heere seluer Godt was.

14

Na desen heeft hy den muer ghetimmert buyten Dauids stadt, ten westen van Gihon in die valleye, vanden inganck der visschen poorte rontsomme tot Ophel toe, ende hy heeft dien muer seer hooghe ghemaect, ende hy heeft Princen des heyrs ghestelt in alle die besloten steden van Iuda.

15

Ende hy heeft die vreemde goden wech ghenomen ende dat afgods beelt wt des Heeren huys, ende die outaren ooc die hy ghemaect hadde op den berch van des Heeren huys, ende in Ierusalem, ende hy heuet al buyten der stadt gheworpen.

16

Voerts soe heeft hy weder op ghemaect des Heeren outaer, ende hy heeft daer op gheoffert slachofferanden ende vreedsamighe offeranden ende lof offeranden, ende hy heeft Iude gheboden dat sij den Heere den Godt van Israel dienen souden.

17

Maer nochtans dede tvolck noch slachofferanden op die hoochden den Heere haren Godt.

18

Maer datter meer is van Manasses wercken ende sijn ghebedt tot sijnen Godt, ende die woerden oock der sienders die tot hem spraken inden naem des Heeren des Gods van Israel, ⁺sijn begrepen in die woerden der coninghen van Israel.

+ D

19

Ende sijn ghebedt oock ende sijn verhooringhe, ende alle sijn sonden ende versmaetheyt, die plaetsen oock daer hy hooch den ghetimmert heeft, ende boschkens ghemaeckt, ende staende beelden eer hy penitencie dede, sijn ghescreuen in die woerden van Hosai.

20

Aldus is Manasses ontslapen met sijnen vaderen, ende sij hebben hem begrauen in sijn huys, ende sijn sone Amon heeft voor hem gheregneert.

21

Tweentwintich iaren out was Amon

[p. *351]

doen hy begonste te regneren ende twee iaren heeft hy in Ierusalem gheregneert.

22

Ende hy heeft quaet ghedaen in daensicht des Heeren, ghelijck Manasses sijn vader ghedaen hadde, ende alle den afgoden die Manasses ghemaect hadde, ende alle den afgoden die Manasses ghemaect hadde, heeft hy offeranden ende dienst ghedaen.

23

Ende hy en heeft des Heeren aensicht niet ontsien, ghelijck Manasses sijn vader dat ontsien heeft, ende hy heeft veel meerder dinghen misdaen.

24

Ende doen sijn knechten teghen hem een ghesworen muyterie ghemaect hadden soe hebben sij hem ghedoodt in sijn huys.

25

Maer die ander menichte des volcs verslaghen hebbende die ghene die Amon doot gheslaghen hadden, heeft Iosiam sijnen sone coninck ghemaect voor hem.