Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxij. Capittel.

1

⁺NAe deser ende der ghelijcker waerheyt is ghecomen Sennacherib die coninck van Assyrien ende in Iuda ghecomen sijnde heeft hy die besloten steden omleydt willende die innemen.

+ A

2

Dwelck als Ezechias ghesien hadde te weten dat Sennacherib comen was, ende dat alle tghewelt der orloghen ghekeert worde teghen Ierusalem,

3

heeft hy met den princen ende vroemsten mannen raet ghenomen, dat sij souden verstoppen die hoofden der fonteynen die buyten der stadt waren, ende als dat met een ordinancie van hen allen ghesloten was,

4

soe heeft hy vergadert een seer groote menichte, ende sij hebben verstopt alle die fonteynen ende die rijuiere die daer vloedde int midden des lants, segghende. Op dat die coninghen van Assyrien niet en comen ende vinden oueruloedicheyt der wateren.

5

Ende hy heeft ooc opghetimmert (doende cloeckeijck) alle den muer die veruallen was, ende hy heeft daer torren opghemaect, ende van buyten noch eenen anderen muer, ende hy heeft Mello weder vermaect in Dauids stadt, ende hy heeft wapenen ende schilden ghemaect van alder hande manieren.

6

Ende hy heeft ghestelt capeteynen der vechtender mannen int heyr. Ende hy heeftse al te samen gheroepen in die strate vander stadt poorten ende ghesproken tot hen herte segghende.

7

⁺Doet manlijck ende weest vroem, en wilt niet vreesen, noch en ontsiet den coninck van Assyrien niet, ende alle die menichte die met hem is, want daer sijnder veel meer met ons dan met hem.

+ B

8

Want met hem is eenen vleeschelijcken arm, met ons is die Heere onse Godt die onse helper is, ende strijdt voor ons. Ende tvolck is versterct met aldusdanighe woerden Ezechie des conincs van Iuda.

9

Als dese dinghen ghesciedt waren, soe heeft Sennacherib die coninck van Assyrien sijn knechten ghesonden in Ierusalem (Want met alle theyr omleydt hy Lachis) tot Ezechiam den coninck van Iuda, ende tot alle den volcke dat in die stadt was, segghende,

10

Dit seyt Sennacherib die coninck van Assyrien. Waer op betrouwen hebbende sidt ghy lieden beleghen in Ierusalem?

11

Bedriecht v Ezechias om dat hy v leueren soude ter doot met hongher ende dorst voer waer toe segghende dat die Heere v Godt v verlossen sal wt des conincs van Assyrien handt?

12

⁺En is dit niet die selue Ezechias, die sijn hoochden omgheworpen heeft ende sijn outaren, ende heeft Iuda ende Ierusalem beuolen seggende, Voer eenen outaer suldi aenbidden ende op dien suldie den rueck offer verbranden?

+ C

13

En weet ghy niet wat ick ghedaen hebbe ende mijn vaderen alle den volcken der aerden? Hebben die goden der Heydenen ende alle der landen haer lantscap moghen verlossen wt mijn hant?

14

Wie isser van allen der heydenen goden die welcke mijn vaderen verdoruen hebben, die zijn volck heeft moghen verlossen wt mijn hant, dat v Godt v oock soude moghen verlossen van deser hant?

15

⁺Daer om en ghedoocht niet dat v Ezechias bedrieghe noch en laet v met ydelen onderwijsen niet bedrieghen, noch en ghelooft hem niet. Want en heeft gheen Godt van allen den heydenen ende lantscappen sijn volck niet connen verlossen van mijnder hant, ende van mijnder vaderen hant, soe en sal voerts v Godt v lieden niet moghen verlossen van mijn handt.

+ D

16

Maer noch meer ander woerden hebben sijn knechten ghesproken teghen den Heere Godt, ende teghen Ezechiam sijnen dienaer,

17

oock heeft hy brieuen ghescreuen vol blasphemien teghen den Heere den Godt van Israel, ende hy heeft teghen hem ghesproken, Ghelijck die goden van die ander heydenen hen volck niet en hebben moghen verlossen van mijn hant, alsoe en sal Ezechias Godt sijn volck ooc niet moghen verlossen wt dese handt.

18

Daer en bouen heeft hy oock met een groot gheroep in Ioetscher talen teghen tvolck dat op die mueren van Ierusalen sadt al om gheroepen, om dat hy hen veruaren soude, ⁺ende die stadt innemen.

+ E

19

Ende hy heeft teghen den Godt van Israel ghesproken als teghen die goden van die volcken der aerden, wercken van der menschen handen,

20

Hier om hebben Ezechias die coninck ende Isaias Amos sone die propheet ghebeden teghen dese blasphemie, ende sij hebben gheroepen totten hemel toe.

21

Ende die Heere heeft eenen Enghel ghesonden, die welcke heeft verslaghen alle die vrome ende strijtbare mannen ende die princen des conincs van Assyrien heyr. Ende hy is met scanden weder om ghekeert in sijn lant. Ende als hy in sijns Gods huys ghegaen was, soe hebben hem sijn sonen die wt sijnen lichaem comen

[p. *350]

waren doot gheslaghen metten swaerde.

22

Ende die Heere heeft Ezechiam behouden ende die inwoonders van Ierusalem van Sennacheribs des conincs van Assyrien hant, ende van die hant van allen anderen, ende hy heeft hem ruste ghegheuen al rontsomme.

23

Ende vele brachten oock slachofferanden ende sacrificien den Heere in Ierusalem ende ghiften Ezechie den coninck van Iuda die welcke na desen verheuen is voor alle die heydenen.

24

⁺In dien daghen was Ezechias sieck totter doot toe, ende hy heeft den Heere ghebeden ende die heeft hem verhoort, ende hy heeft hem een teeken ghegheuen.

+ F

25

Maer hy en heeft niet weder ghegheuen nae die weldaden die hy ontfanghen hadde, want sijn herte is verhauen gheweest. Ende die gramscap is teghen hem gheworden ende teghen Iuda ende Ierusalem,

26

ende namaels is hy verootmoedicht, om dat sijn herte verhauen gheweest hadde, soe wel hy als die inwoonders van Ierusalem, ende daer om en is op hen die gramscap des Heeren niet comen, in die daghen van Ezechias.

27

Ende Ezechias heeft gheweest rijck, ende seer vermaert ende hy heeft gheweest rijck, ende seer vermaert ende hy heeft voor sij seluen veel schatten vergadert van gout ende siluer ende costelijcke ghesteente, specerien ende wapenen van allen manieren, ende vaten van grooten prijse.

28

Ende scathuysen, van coren, wijn ende olie, ende cribben van alderhande lastdraghende beesten, ende stallinghen van cleyn vee,

29

ende ses steden heeft hy voor hem ghetimmert, want hy hadde van scapen ende lastdraghender beesten ontellijcke cudde, ⁺om dat hem die Heere bouen maten seer veel substancie ghegheuen hadde.

+ G

30

Hy is Ezechias die verstopt heeft die ouerste fonteyn der wateren Gihon, ende hy heeft die afghekeert beneden ten westen van Dauids stadt, in alle sijn wercken heeft hi voerspoedelick ghedaen dat hy ghewilt heeft.

31

Maer nochtans in die ambassadure der princen van Babilonien die tot hem ghesonden waren om dat sij vraghen souden van dat wonderlijck teeken dat op die aerde gheschiet was heeft hem Godt verlaten dat hy ghetempteert soude sijn, ende dat al bekent soude worden dat in sijn herte gheweest was.

32

Maer datter meer is van Ezechias woerden, ende van sijnder bermherticheden dat is ghescreuen int ghesichte Isaie Amos sone des propheets, ende int boeck der coninghen van Iuda ende Israel.

33

Ende Ezechias is ontslapen met sijnen vaderen, ende sij hebben hem begrauen in die grauen van Dauids sonen, ende gheheel Iuda ende alle die inwoonders van Ierusalem hebben sijn wtvaert eerlijck ghehouden, ende Manasses sijn sone heeft voor hem gheregneert.