Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxi. Capittel.

1

⁺ENde als dese dinghen behoorlijcken ghedaen waren soe is gheheel Israel wtghegaen die gheuonden was in die steden van Iuda, ende sij hebben der afgoden beelden ghebroken, ende die boschkens afghehouwen, die hoochden omgheworpen, ende die outaren verdoruen niet alleen van gheheel Iuda ende Beniamin, maer oock van Ephraim ende Manasse, tot dat sijt gheheel om hadden gheworpen. Ende alle die kinderen van Israel sijn wederom ghekeert in hen besittinghen ende steden.

+ A

2

Ende Ezechias heeft gestelt die priesterlijcke ende leuitelijcke scaren by hen deylinghen, een ieghelijck in sijnen eyghenen dienst, te weten soe wel der Priesteren als der Leuiten tot brantofferanden, ende vreetsamighe offeranden, dat sij dienen souden ende belijden ende singhen in die poorten van des Heeren heyrscaren.

3

Ende des conincs deel was, dat van sijn eyghen substancie soude gheoffert worden die brantofferande des morghens altijt ende des auonts. Op die sabbathen oock ende nieuwe maenden, ende dander hoochtijden ghelijck daer ghescreuen is in Moyses wet.

4

Hy heeft ooc beuolen den volcke dat te Ierusalem woonde, dat sij deelen gheuen souden den priesteren ende Leuiten op dat sij hen souden moghen verleghen tot die wet des Heeren.

5

⁺Dwelck alst in die ooren der menichten oueral gheseyt worde, soe hebben die kinderen van Israel seer veel ierste gauen ghegheuen, van coren, wijn ende olie, van honich oock, ende van alle die dinghen welck die aerde voertbrengt hebben sij thienden gheoffert.

+ B

6

Ende daer toe die kinderen van Israel ende Iuda die in die steden van Iuda woonden, hebben gheoffert thienden van ossen ende scapen, ende thiende der heylegher dinghen, die sij gheloeft hadden den Heere haren Godt, ende alle dese dinghen brenghende hebben sij ghemaect seer veel hoopen.

7

In die derde maent begonsten sij die fundamenten vanden hoopen te legghen ende in die seuenste maent hebben sij die volmaect.

8

Ende doen Ezechias ende sijn princen binnen ghegaen waren soe hebben sy die hoopen ghesien, ende sij hebben den Heere ghebenedijt ende den volcke van Israel.

9

Ende Ezechias heeft den Priesteren ende Leuiten ghevraecht waer om dat die hoopen alsoe laghen.

10

Ende Azarias dierste Priester van Sadocs gheslachte heeft hem gheantwoert segghende. Sedert dat die ierste gauen hebben begonst gheoffert te worden in des Heeren huys, ⁺soe hebben wy gheten ende sijn versaedt, ende daer is seer veel ouerbleuen, om dat die Heere sijn volck ghebenedijt heeft, ende dit is die oueruloedicheyt vanden bluelinghen die ghy siet.

+ C

11

Hier om heeft Ezechias gheboden dat sij scueren souden bereyden in des Heeren huys. Dwelck als sij ghedaen hadden,

12

soe hebben sij daer in ghedraghen soe wel die ierste gauen als die thienden ende alle dat sij beloeft hadden, getrouwelijck. Ende die ouerste van desen was Chonenias de Leuijt, ende Semei sijn tweede broeder,

13

naden welcken was Iahiel, ende Azazias ende Nahath, ende Azael ende Ierimoth, Iozabad oock ende Eliel ende Iesinachias, ende Mahath, ende Banaias die ouersten onder Chonenias hant, ende Semeias sijns broeders, wt den beuele Ezechie des conincs ende Azarie des ouderste Priesters van den huyse Gods, tot den welcken alle dingen behoorden.

14

Maer core die sone van Iemna die Leuijt, ende doerwaerder der oosterscher poorten was ouerste van die dinghen die vrijwillichlijck den Heere ge-

[p. *349]

offert worden ende van den iersten gauen ende van den gheheylichden int heylich der heyleghen.

15

Ende onder sijn besorghen waren Eden ende Beniamin, Iesue ende Semeias, Amarias oock ende Sechenias in die steden der priesteren, dat sij ghetrouwelijck haren broederen deelen deylen souden, den minsten ende den meesten,

16

wtghenomen die mans persoonen van drij iaren ende daer bouen allen den ghenen die in des Heeren tempel ghinghen, ende al wat van daghe te daghe dienende was inden dienst ende bewaringhen,

17

nae hen deylinghen den priesteren by hen familien, ende den Leuiten van twintichste iaer ende daer bouen by hen ordinancien ende scaren,

18

ende der gheheelder menichten soe wel den huysvrouwen als haren kinderen meyskens ende knechtkens, worden ghetrouwelijck spijsen ghegheuen van die dinghen die gheheylicht waren.

19

Ende oock van Aarons kinderen waren mannen ghestelt doer die ackeren ende voersteden van alle den steden besonder, die de deelen souden bedeylen, alle den mans persoonen vanden Priesteren ende Leuiten.

20

Aldus heeft Ezechias ghedaen alle dese dinghen die wy gheseyt hebben in geheel Iuda, ende hy heeft ghedaen dat goet ende recht ende warachtich was voor den Heere sijnen Godt

21

in alle die eerbewijsinghe des diensts van des Heeren huys, nae die wet ende ceremonien willende versoecken sijnen Heere met alle sijn herte, ende hy heuet ghedaen ende is voerspoedich gheweest.

[afbeelding]