Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxx. Capittel.

1

⁺ENde Ezechias heeft oock ghesonden tot gheheel Israel ende Iudam, ende hy heeft brieuen ghescreuen tot Ephraim ende Manassen, dat sij comen souden tot des Heeren huys in Ierusalem, ende dat sij het Phase houden souden den Heere den Godt van Israhel,

+ A

2

Hierom als den raet des conincks ende der princen ende alle der vergaderinghen van Ierusalem ghehouden was, soo hebben sij ghesloten dat sij tphase houden souden in die tweede maent,

3

Want sij en waren tsamen niet comen dat te maken te sijnen tijde, want die priesters die ghenoech mochten sijn en waren niet gheheylicht, ende tvolck en was noch niet vergadert in Ierusalem,

4

Ende dat woort behaechde den coninck wel ende alle der menichten,

5

Ende sij hebben ghesloten dat sij boden senden souden in gheheel Israhel van Bersabee tot Dan toe, dat sij comen souden ende houden Phase, den Heere den Godt van Israhel in Ierusalem, want vele en haddens niet ghedaen ghelijck dat in die wet bescreuen was.

6

Ende die loopers sijn ghereyst met die brieuen wt des conincs ghebot ende sijnder princen in gheheel Israhel ende Iuda, nae tghene dat die coninck beuolen hadde openbaerlijck, segghende. Kinderen van Israhel keert wederom tot den Heere den God van Abraham, ende Isaac, ende Israhel, ende hy sal wederkeeren tot die bleuelinghen die des conincks van Assirien handen ontuloden sijn,

7

En wilt niet worden ghelijck v vaders, ende v broeders die afghegaan sijn vanden Heere haerder vaderen Godt, ende hy heeftse gheleuert ter verderffenissen ghelijc ghi selue siet.

8

⁺En wilt v necken niet verharden ghelijc v vaderen, Gheeft v handen den Heere, ende coemt tot sijn heylighe woonstede, die hy gheheylicht heeft inder eewicheyt, Dient den Heere uwer vaderen Godt, ende den torn van sijnder rasender gramscap sal van v ghekeert worden,

+ B

9

Want eest sake dat ghy wederkeert tot den Heere, soo sullen v broeders ende kinderen bermherticheyt hebben voor hen heeren diese gheuanghen wech gheleydt hebben, ende sij sullen wederkeeren in dit lant, Want goedertieren ende ghenadich is die Heere v Godt, ende hy sal sijn aensicht van v lieden niet afkeeren, eest sake dat ghi wederkeert tot hem,

10

Hierom reysden die loopers raschelijck van steden te steden

[p. *348]

doert lant van Ephraim ende Manasse, tot Zabulon toe, die welcke hen bespotten ende bescimpten.

11

Maer nochtans sommighe mannen van Aser ende Manasse ende Zabulon volghende den raet, sijn ghecomen te Ierusalem.

12

Maer in Iuda is die hant des Heeren gheworden, dat hy hen een herte gheuen soude, dat sij doen souden (nae tghebot des conincs ende sijnder princen) dwoert des Heeren.

13

Ende in Ierusalem sijn veel volcken vergadert, dat sij souden houden dat hoochtijt der ongheheefder brooden, in die tweede maent.

14

Ende opstaende hebben sij verdoruen die outaren die in Ierusalem waren, ende alle daermen den afgoden rueck werck op onstack om worpende, hebben sij gheworpen in die beke Cedron.

15

⁺Ende sij hebben het Phase ten offer ghedoodt opden veerthiensten dach der tweeder maent. Ende die Priesters ooc ende die Leuiten ten laetsten gheheylicht sijnde hebben brantofferanden gheoffert in des Heeren huys.

+ C

16

Ende sij hebben in hen ordinancie ghestaen nae die ordinancie ende wet Moysi des mans Gods. Maer die Priesters ontfinghen tbloet datmen storten soude van der Leuiten handen

17

om datter een groote scare niet gheheylicht en was, ende daer om doodden die Leuiten Phase, den ghenen die niet te tijde comen en waren om den Heere gheheylicht te worden.

18

Ende oock een groot deel des volcks van Ephraim, ende Manasse, ende Issachar, ende Zabulon dat niet gheheylicht en was, heeft het Phase geten niet na datter gescreuen is, ende Ezechias heeft voor hen ghebeden segghende,

19

Die goede Heere sal ghenadich wesen alle den ghenen, die met gheheelder herten versoecken den Heere haerder vaderen Godt, ende hy en salt hen niet wijten ter sonden, dat sij niet gheheylicht en sijn.

20

Den welcken heeft die Heere verhoort, ende hy is metten volcke te vreden gheweest.

21

Ende die kinderen van Israel die te Ierusalem gheuonden waren, hebben ghehouden dat hoochtijt vanden ongheheefden brooden, seuen daghen lanck met grooter blijscappen, louende den Heere tot allen daghe. Ende die Leuiten ende die Priesters metten musijck instrumenten die tot hen officie dienden.

22

⁺Ende Ezechias heeft ghesproken tot dat herte van alle den Leuiten die goede verstandicheyt hadden vanden Heere, ende sy hebben gheten die seuen daghen des hoochtijts doodende ten offer die slachofferanden der vreedt offeren, ende louende den Heere haerder vaderen Godt.

+ D

23

Ende het heeft der gheheelder ghemeynten belieft dat sij noch seuen ander daghen vieren souden, dwelck sij oock ghedaen hebben met grooter blijscappen.

24

Ende Ezechias die coninck van Iuda hadde der menichten ghegheuen duysent verren, ende seuen duysent scapen, ende die princen hadden den volcke ghegheuen duysent verren, ende thien duysent scapen. Hier om isser een groote menichte der priesteren gheheylicht.

25

Ende alle die schare van Iuda, soe wel der Priesteren ende der Leuiten, als der gheheelder grooter menichten die van Israel comen was, ende oock der vreemdelinghen wten lande van Israel, ende der gheender die in Iuda woonden, is heel ouergoten gheweest met vrolijcheyt.

26

Ende daer is een blijde hoochtijt gheweest in Ierusalem, sulck als van Salomons Dauids soens tijde noyt gheweest en was in die stadt.

27

Ende die Priesters ende Leuiten sijn opghestaen ghebenedijende tvolck, ende hen stemme wort verhoort, ende hen gebedt is ghecomen tot in die heyleghe woonstede des hemels.