Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxix. Capittel.

1

⁺ENde Ezechias heeft begonst te regneren doen hy vijfentwintich iaren out was, ende neghenentwintich iaren heeft hy gheregneert in Ierusalem, Sijns moeders naem was Abia een dochter Zacharie,

+ A

2

Ende hy heeft ghedaen dat behaeghelijck was voor des Heeren aensicht, nae alle dat Dauid sijn vader ghedaen hadde,

3

Opt selue iaer ende op dierste maent sijns conincrijcs heeft hy open ghedaen die doren van des Heeren huys, ende hy heeft die hermaect

4

Ende hy heeft priesters ende Leuiten ghebracht ende die vergadert in die oost strate.

5

Ende hy heeft tot hen gheseyt. Hoort my ghy Leuiten ende wert gheheylicht, reynicht dat huys des Heeren uwer vaderen Godt, ende doet wech alle onsuyuerheden van die heylighe wooninghe,

6

Ons vaders hebben ghesondicht, ende sij hebben quaet ghedaen int aenschijn vanden Heere onsen Godt hem verlatende, sij hebben haer aensichten afghekeert van des Heeren tabernakel, ende sij hebben den rugghe ghekeert,

7

⁺Sij hebben die doren ghesloten die int portael waren, ende sij hebben die luchters wtgheblust, ende den rueckoffer en hebben sij niet ghebrant, ende die heelbrantofferanden en hebben sij niet gheoffert in die heylighe plaetse Gode van Israel,

+ B

8

Hierom is die rasende gramscap des Heeren verwect op Iudam ende Ierusalem, ende hy heeftse gheleuert tot een beroeringhe, ende tot verderffenisse, ende tot een wispelinghe ghelijck ghy selue siet met uwen ooghen,

9

Siet onse vaders sijn gheuallen metten swaerden, onse sonen ende onse dochteren ende huysvrouwen sijn gheuanghen wech gheleydt om dese groote boosheyt,

10

Hierom soo belieuet my nv dat wij sullen een verbont maken met den Heere den Godt van Israel, ende hy sal van ons keeren die rasende gramscap van sijnen torn,

11

Mijn kinderen en wilt niet onnacsaem sijn, V heeft die Heere vercoren dat ghy voor hem staen soudt ende hem dienen ende hem eeren, ende dat ghy hem soude rueckoffer branden,

12

Aldus sijn opghestaen die Leuiten Mahath die sone van Amasai, ende Ioel Azarias sone, van Caaths sonen, Maer van Merari sonen Cis die sone van Abdi, ende Azarias Ialaleels sone, Ende van Gersons sonen, Ioah die sone van Zemma, ende Eden die sone van Ioah,

13

Maer van Elizaphans sonen Samri ende Iahiel, ⁺Ooc mede van Asaphs sonen Zacharias ende Mathanias,

+ C

14

Ende ooc van Hemans sonen, Iahiel ende Semei, Ende ooc van Idithuns sonen Semeias, ende Oziel,

15

Ende sij hebben verghadert hen

[p. *347]

broeders ende sij sijn gheheylicht, ende inghegaen nae des conincs beuel ende tghebodt des Heeren, dat sij Godts huys souden suyueren,

16

Die priesters ooc inden tempel des Heeren gaende om dien te heylighen, hebben wtghedraghen alle die onreynicheden die sij vonden hadden int portael van des Heeren huys, die welcke die Leuiten ghehaelt hebben ende wech ghedraghen buyten ouer die beke Cedron,

17

⁺Ende sij begonsten opden iersten dach der ierster maent te reynighen, ende opden achtsten dach der seluer maent sijn sij ghegaen int portael van des Heeren tempel, ende hebben den tempel ghesuyuert acht daghen, ende opden sesthiensten dach der seluer maent hebben sij voldaen dat sij begonst hadden,

+ D

18

Ende si sijn oock ghegaen tot Ezechiam den coninc, ende hebben hem geseyt. Wij hebben gheheylicht tgheheel huys des Heeren, ende den outaer des brantoffers ende sijn ghereetscappen, ende ooc die tafel der voorlegghingen met alle haer ghereetscappen,

19

ende alle den huysraet des tempels, den welken die coninc Achas besmedt hadde in sijn rijck, nae dat hy ouerghetreden was, ende siet alle dese dinghen sijn wt gheleydt voor des Heeren outaer.

20

Ende Ezechias die coninc des morghens vroech opstaende heeft vergadert alle die princen der stadt, ende hy is in des Heeren huys opghegaen,

21

ende si hebben tsamen gheoffert seuen stieren ende seuen rammen, seuen lammeren ende seuen bocken voor die sonde, voort conincrijc, voor die heylighe plaetse, voor Iuda, Ende hy heeft gheseyt den priesteren Aarons sonen, dat sij die ten offer dooden souden op des Heeren outaer,

22

⁺Hier om hebben si die stieren ghedoodt ende tbloet hebben die priesters ontfanghen, ende si hebben dat opden outaer ghestort, ende sij hebben ooc die rammen ten offer ghedoodt, ende tbloet van dien hebben si ooc opden outaer ghestort, ende si hebben die lammeren ghedoot, ende tbloet opden outaer ghestort,

+ E

23

Ende sij hebben die bocken voor die sonde ghebrocht voor den coninck, ende die gheheel menichte, ende sij hebben hen handen op die geleyt.

24

Ende die priesters hebbense ten offer ghedoot, ende hebben hen bloet gesprayt voor den outaer voor die suyveringe van geheel Israel want voor geheel Israel hadde die coninck beuolen datmen heelbrantoffer doen soude, ende voor die sonde,

25

Ende hy heeft die Leuiten oock ghestelt in des Heeren huys, met cimbalen, ende psalterien ende herpen, na die insettinghe van Dauid den coninc ende Gad den siender, ende Nathan den propheet, Want het was des Heeren ghebodt door sijnder propheten hant,

26

⁺Ende die Leuiten stonden houdende Dauids orghelen, ende die priesters trompetten,

+ F

27

Ende Ezechias heeft gheboden dat sij die brantofferanden offeren souden opden outaer, ende als men die brantofferande offerde, soo begonsten sie die louen te singhen den Heere, ende gheclanck te maken metten trompetten, ende met versceyden orghelen (die welcke Dauid die coninck te voren bereydt hadde) tsamen gheluyt te maken,

28

Ende doen alle die scare aenbadt, soo waren die sanghers, ende die de trompetten hielen in haren dienst, tot dat den heelen brantoffer volbracht was,

29

Ende doen die offerande voleyndt was, soo is die coninck nederghebuycht, ende alle die met hem waren, ende sij hebben aenghebeden,

30

Ende Ezechias ende die princen hebben gheboden den Leuiten dat sij den Heere louen souden met Dauids ende Asaphs des sienders woorden, die welcke hebben hem ghelooft met grooter blijscap, ende met gheboochden knien hebben sij aenbeden,

31

Maer Ezechias heeft oock dese woorden daer toe gheseyt. Ghy hebt v handen den Heere ghevult, ⁺Gaet toe ende offert die slachofferanden ende louen in des Heeren huys, Hierom heeft die gheheel menichte gheoffert slachofferanden ende louen ende heelbrantofferanden, met deuoter herten,

+ G

32

Maer tghetal der brantofferanden welck die menichte offerde was dit, Tseuentich verren, hondert rammen, twee hondert lammeren,

33

Ende sij hebben den Heere geheylicht seshondert ossen, ende drij duysent scapen,

34

Maer die priesters waren luttel, ende sij en mochten niet ghenoech sijn dat sij der brantofferanden vellen aftrecken souden, waerom dat hen die Leuiten hen broeders gheholpen hebben, tot dat twerck volbracht was, ende dat die ouerste priesters gheheylicht waren, Want die Leuiten worden met lichter maniere gheheylicht dan die priesters,

35

Aldus hebben daer seer veel brantofferanden gheweest, die vetten des inghewants, der vreedofferen, ende die natte offeranden der heelbrantofferanden, ende den dienst van des Heeren huys is volbracht gheweest,

36

Ende Ezechias is blijde gheweest ende alle tvolck om dat des Heeren dienst volbracht was, want seer onuersienlijc haddet belieft dat dit gescieden soude.