Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxviij. Capittel.

1

⁺TWintich iaren out was Achaz doen hy begonste te regneren, ende sesthien iaren heeft hy gheregneert in Ierusalem, hy en heeft niet ghedaen dat recht was in des Heeren aensicht ghelijc David sijn vader,

+ A

2

Maer hy heeft ghewandelt in die weghen der coninghen van Israel, Daer bouen heeft hy Baalim oock staende beelden ghegoten,

3

Hy is die ghene die ruecwerc ghebrant heeft in die valleye Benennom, ende hy heeft sijn sonen gheheylicht doort vier nae die maniere der Heydenen,

4

Ende hi dede oock sacrificie, ende ontstack die welriekende offerande in die hoochden ende op die hoeuelen, ende onder alle boomen die dic gebladert waren,

5

Ende die Heere sijn God heeft hem gheleuert in die handen des conincs van Sirien die welcke hem gheslaghen heeft, ende heeft eenen grooten roof ghenomen van sijn heerlijcheyt, ende dien ghebracht in Damasco, oock is hy gheleuert des conincs van Israhels handen ende gheslaghen met een groote plaghe.

6

Ende Phacee die sone Romelie heefter van Iuda doot gheslaghen hondert ende twintich duysent op eenen dach alle orloochsche mannen om dat si den Heere haerder vaderen Godt verlaten hadden.

7

Opden seluen tijt heeft Zechri een machtich man van Ephraim verslaghen Maasiam des conincs sone ende Ezricam den prince sijns huys, ende Elcanam ooc den tweeden naest den coninc,

8

Ende die kinderen van

[p. *346]

Israel hebben gheuanghen van haren broeders twee dondert duysent vrouwen, knechtkens, ende ionghe hochterkens, ende eenen ontellijcken grooten roof, ende sij hebben dien ghebracht in Samarien.

9

⁺Op dien tijt was daer een propheet des Heeren ghenaemt Obed, die welcke teghen ghegaen sijnde den heyre comende tot Samarien heeft geseyt. Siet die Heere uwer vaderen God gram sijnde teghen Iudam, heeft die in v handen geleuert, ende ghy hebtse wreedelijc gedoot also dat v wreetheyt totten hemel toe raecte,

+ B

10

Daer en bouen wildi die kinderen van Iuda ende Ierusalem onder v bedwanc brenghen tot knechten ende dienstvrouwen, dwelc geensins van noode en is te doen, want ghy hebt hier door teghen den Heere uwen God misdaen,

11

Maer hoort mijnen raet, ende leyt die gheuanghenen wederom, die ghy van uwen broederen herwaerts ghebrahct hebt, Want een groote gramscap des Heeren is v nakende,

12

Hierom hebben ghestaen die mannen vanden princen der kinderen van Ephraim Azarias die sone van Iohannan, Barachias die sone van Mosollamoth Ezechias Sellums sone, ende Amasias die sone van Hadali, teghen hen die wten strijdt quamen,

13

ende sij hebben hen gheseyt. Ghy en sult die gheuanghenen hier niet in brenghen dat wij den Heere niet en sondighen Waerom wilde meer toe legghen tot onse sonden ende onse oude misdaden vermeerderen? Want tis voor waer een groote sonde, ende den torn van des Heeren rasende gramscap is nakende op Israel,

14

Ende die orlooschs mannen hebben den roof laten gaen, ende alle dat sij ghenomen hadden voor die princen ende voor die gheheel menichte,

15

⁺Ende die mannen daer wij te voren af vermaent hebben, stonden, ende nemende die gheuanghenen, ende alle die naect waren, hebben sij ghecleedt vanden roouen, ende als sij die ghecleedt ende ghescoeydt hadden, ende vermaect met spijse ende dranck, ende sij die ooc ghesalft hadden om den arbeyt, ende hen besorgt hadden, Alle die niet wandelen en mochten ende cranck van lichaem waren hebben sij op lastdraghende beesten ghesedt, ende hebben die ghebracht te Iericho, der palmen stadt, tot haren broeders, ende sij sijn wederom ghekeert in Samarien.

+ C

16

In dien tijt soo heeft die coninck Achaz ghesonden aenden coninck van Assyrien begheerende helpe,

17

Ende die Edumiters sijn ghecomen ende hebbender veel van Iuda verslaghen, ende sij hebben eenen grooten roof ghenomen,

18

Die Philistijnen sijn oock breedt wt ghespreyt door die effen velt steden, ende aenden suyden van Iuda, ende sij hebben inghenomen Bethsames, ende Aialon, ende Gaderoth, Socho ooc, ende Thamnan, ende Gamzo met sijnen dorpkens, ende sij hebben daer inne ghewoont,

19

Want die Heere hadde Iudam vernedert om Achaz den coninck van Iuda, om dat hy hem ghebloodt hadde van helpe, ende dat hy den Heere versmaet hadde,

20

⁺Ende hy heeft teghen hem ghebracht Telgath-phalnasar den coninck van Assyrien, die welcke hem ooc verdruckt heeft, ende sonder iemants wederstaen bedoruen,

+ D

21

Hierom Achaz hebbende berooft des Heeren huys ende der coninghen huys ende der princen, heeft den coninck van Assirien ghiften ghegheuen, ende nochtans en heeft dat hem niet gheholpen,

22

Daer en bouen soo heeft hy ten tijde van sijnder benautheyt die versmaetheyt vermeerdert teghen den Heere, Die selue coninc Achaz

23

heeft door sij seluen ghedoot slachofferanden ende gheoffert den goden van Damasco, die hem gheslaghen hadden, ende heeft gheseyt. Die goden der coninghen van Sirien helpen hemlieden die welcke ic versoenen sal met slachofferanden, ende sij sullen met my sijn, daer die nochtans hem hadden ten valle gheweest ende gheheel Israel,

24

Hierom als Achaz alle die vaten van Godts huys gherooft hadde ende ghebroken, soo heeft hy ghesloten die doeren van Gods tempel, ende hi heeft voor hem outaren ghemaect in alle die hoecken van Ierusalem,

25

Ende oock in alle die steden van Iuda heeft hi outaren ghemaect om wieroock te branden, ende hy heeft tot gramscap verwect den Heere sijnder vaderen Godt,

26

Maer het ander van sijnen woorden ende van alle sijnen wercken der ierster ende der laetster sijn ghescreuen int boeck der coninghen van Iuda ende Israel

27

Ende Achaz is met sijnen vaderen ontslapen, ende sij hebben hem begrauen in die stadt Ierusalem, want sij en hebben hem niet ontfanghen in die grauen der coninghen van Israel, ende Ezechias sijn sone heeft voor hem gheregneert.