Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvij. Capittel.

1

⁺VYfentwintich iaren out was Ioatham doen hy begonste te regneren, ende sesthien iaren heeft hy gheregneert in Ierusalem, Sijns moeders naem was Ierusa Sadocs dochter,

+ A

2

Ende hy heeft ghedaen dat recht was voor den Heere, nae alle tghene dat Ozias sijn vader ghedaen hadde, wtghenomen dat hy in des Heeren tempel niet ghegaen en is, ⁺ende het volc misdede noch,

+ B

3

Hy heeft getimmert die hooghe poorte van des Heeren huys, ende inden muer Ophel heeft hy veel ghetimmert,

4

Ooc heeft hi steden ghetimmert op tgheberchte van Iuda, ende in die bosschagien casteelen ende torren.

5

Hy heeft ghestreden teghen den coninc der kinderen van Ammon ende hij heeftse verwonnen, ⁺ende die kinderen van Ammon hebben hem ghegheuen in dien tijt hondert talenten siluers ende thien duysent chorus maten tarwe, ende alsoo veel chorus maten ghersten, Dit gauen hem die kinderen van Ammon int tweeste ende derde iaer,

+ C

6

Ende Ioatham is versterct, om dat hy sijn weghen recht ghemaect hadde voor den Heere sijnen Godt,

7

Maer dat andere van Ioathams woorden ende alle sijn strijden, ⁺ende wercken is ghescreuen int boeck der coninghen van Israel ende Iuda,

+ D

8

Vijfentwintich iaren out was hy doen hy begonste te regneren, ende sesthien iaren heeft hy in Ierusalem gheregneert,

9

Ende Ioatham is ontslapen met sijnen vaderen, ende sij hebben hem begrauen in Dauids stadt, ende Achaz sijn sone heeft gheregneert in sijn stede.