Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvi. Capittel.

1

⁺ENde alle tvolc van Iuda heeft sijnen sone Oziam van sesthien iaren coninc ghemaect voor Amasias sijnen vader,

+ A

2

Hy heeft Ailath opgetimmert ende heeft die wederom gebracht tot Iudas heerlijcheyt, nae dat die coninc ontslapen was met sijnen vaderen.

3

Sesthien iaren out was Ozias doen hi begonste te regneren ende tweenvijftich iaren heeft hy in Ierusalem geregneert sijns moeders naem was Iechelia van Ierusalem,

4

Ende hy heeft ghedaen dat recht was in des Heeren ooghen, Nae alle

[p. *345]

die dinghen die Amasias sijn vader ghedaen hadde,

5

Ende hi heeft den Heere naerstelijc ghesocht in die daghen van Zacharias die een verstaender ende siender Godts was, ende doen hi den Heere socht, so vorderde hy hem in alle dinghen.

6

Ten laetsten is hy wtghetrocken ende heeft ghestreden teghen die Philistijnen, ende hy heeft ghebroken den muer van Geth, ende den muer van Iabnie, ende den muer van Azoten, ende hy heeft steden ghetimmert in Azoten, ende in Philistijm,

7

Ende die Heere heeft hem gheholpen teghen die Philistijnen, ende teghen die Arabers die daer woonden in Gurbaal, ende teghen die Ammoniten,

8

⁺Ende die Ammoniten brachten Ozie ghiften by ghewichte ende sijnen naem is vermaert tot den inganck van Egipten toe, om die menichfuldighe victorien,

+ B

9

Ende Ozias heeft torren in Ierusalem ghetimmert op die hoeckpoorte, ende op die dalpoorte ende op die ander poorten in die selue sijde des muers, ende hy heeft die sterck ghemaect,

10

Hy heeft oock torren in die woestijne ghetimmert, ende hy heeft seer veel cisternen ghegrauen, om dat hi veel cleyn vee hadde, so wel in die platte velden als in die grootheyt der woestijnen, hy heeft oock wijngaerden ende wijngaerdeniers ghehadt in die gheberchten ende opden Carmelus, want hy was een man hem becommerende met lantwinninghe,

11

Ende theyr van sijnen strijdtbaer mannen die ten strijde trocken was onder die hant van Iehiel des scrijuers ende Maasie des leeraers, ende onder die hant van Hananie die van des conincs hooftmannen was,

12

Ende alle tghetal der princen by haren familien der stercker mannen van twee duysent ende ses hondert,

13

ende onder hen gheheel heyr van drij hondert ende seuen duysent ende vijf hondert die bequaem waren ter orloghen, ende die voor den coninck teghen die vianden streden,

14

⁺Ende Ozias heeft hen dat is den heelen heyre oock bereydt scilden ende spiessen, ende helmetten, ende pansieren, ende boghen, ende slingheren om steenen te werpen,

+ C

15

Ende hy heeft in Ierusalem ghemaect versceyden instrumenten die welcke hy stelde in die torren, ende in die hoecken vanden mueren, dat sij souden scieten pijlen ende groote steenen, Ende sijnen naem is verre wt ghebreyt om dat die Heere hem hielp, ende hem versterct hadde,

16

Maer doen hi versterct was, so is sijn herte verhauen tot sijnder verderffenissen, ende hy heeft den Heere sijnen Godt vergheten, ende hy is inden tempel des Heeren ghegaen, ende heeft willen ontsteken dat ruecwerck op den outaer van die welriekende offerande,

17

Ende ter stont nae hem incomende Azarias die priester ende met hem tachtentich priesters des Heeren, seer stercke mannen

18

hebben den coninc wederstaen, ende hebben gheseyt. Ten is v officie niet Ozia dat ghy den Heere ruecwerck ontsteken soudt. Maer dat hoort toe den priesteren Aarons sonen, dien tot sulcken dienst gheheylicht sijn, ⁺Gaet wt die heylighe plaetse, en versmaet dat niet, want ten sal v tot gheen glorie gherekent worden vanden Heere Godt

+ D

19

Ende Ozias gram werdende ende houdende metter hant dat wieroocvat om dat ruecwerck te ontsteken, heeft die priesters gedreycht, Ende ter stont is daer melaetsceyt gecomen in sijn voorhooft voor die priesters in des Heeren huys opden outaer van die welriekende offerande,

20

Ende doen hem Azarias die ouerste priester aensien hadde, ende alle die ander priesters, soo hebben sij die lazerie ghesien in sijn voorheeft, ende sij hebben hem haestelijck wtghestooten, Maer hi oock veruaert sijnde haeste hem om wt te ghaen, om dat hy ter stont gheuoelt hadde die plaghe des Heeren,

21

Hierom heeft Ozias die coninck melaetsch gheweest tot sijnen sterfdach toe, ende hy heeft ghewoont in een afghesceyden huys vol melaetsheden, waerom dat hy ghestooten was wt des Heeren huys, Maer Ioatham sijn sone regeerde des conincs huys ende hi ordeelde tvolck des lants,

22

Datter meer is van Ozias woorden der ierster ende der laetster, heeft ghescreuen Isaias Amos sone die propheet,

23

Ende Ozias is ontslapen met sijnen vaderen, ende sij hebben hem begrauen inden acker der coninclijcker grauen, om dat hy melaetsch was, ende Ioatham sijn sone heeft voor hem gheregneert.