Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxv. Capittel.

1

⁺VYfentwintich iaren out was Amasias doen hy begonste te regneren, ende neghenentwintich iaren heeft hy gheregneert in Ierusalem Sijns moeders naem was Ioiadan van Ierusalem,

+ A

2

Ende hy heeft goet ghedaen in des Heeren aensicht, maer nochtans niet met volcomender herten.

3

Ende als hy sach dat tconincrijck hem vast gheworden was, so heeft hy die keel afghesteken die knechten die den coninck sijnen vader ghedoot hadden,

4

Maer hen kinderen en heeft hy niet ghedoodt, ghelijc daer ghescreuen is int boeck van Moyses wet, daer die Heere gheboden heeft seggende. Die vaders en sullen voor hen kinderen niet ghedoodt worden, noch oock die kinderen voor hen vaders, maer een ieghelijc sal om sijnder sonden wille steruen.

5

⁺Hierom heeft Amasias Iudam vergadert, ende hy heeftse ghestelt by die familien hooftluyden ouer duysent, ende hondert mannen in gheheel Iuda ende Beniamin, ende hy heeftse ghetelt van twintich iaren opwaerts, ende hy heeft gheuonden dertich duysent ionghelinghen die ten strijde wt trecken souden ende hielen spiessen ende scilden,

+ B

6

Ende hy heeft met loon ghehuert van Israel hondert duysent vromer mannen, om hondert talenten siluers,

7

Maer een man Gods is tot hem ghecomen ende heeft gheseyt. O coninc en laet dat heyr van Israel met v niet wtgaen, want die Heere en is met Israel niet, ende met alle die kinderen van Ephraim,

8

Maer eest sake dat ghy meynt dat die orloghen gheleghen sijn in die macht des heyrs, soo sal Godt maken dat ghy sult verwonnen worden van den vianden, Want het is in Gods macht te helpen, ende ter vluchten te keeren,

9

⁺Ende Amasias heeft gheseyt tot den man Godts. Wat sal dan ghescieden vanden hondert talenten siluers die ick den orloochs mannen van Israel ghegeuen hebbe? Ende die man Godts heeft hem gheantwoort. Die Heere heeft wel waer af hy v noch meer dan dese gheuen mach.

+ C

10

Hierom heeft Amasias ghescheyden theyr dat tot hem comen was van Ephraim, om dat wederom keeren soude in sijn plaetse, Maer die teghen Iudam swaerlijc ghestoort sijn wederom ghegaen in hen lantscap,

11

Maer Amasias heeft met betrouwen sijn volck wtgheleyt, ende is wech ghetrocken tot die valleye der soutgroeuen,

12

ende heeft die kinderen van Seir gheslaghen thien duysent, Ende die ander thien duysent mannen hebben die kinderen van Iuda gheuanghen, ende hebbense gheleydt tot op die steyghe hoochde van eender steenrootsen, ende sij hebbense afgheworpen van bouen nederwaerts die welcke altesamen gheborsten sijn,

13

⁺Maer dat heyr dwelck Amasias wederom ghesonden hadde dat met hem niet gaen en soude ten strijde, heeft hem ghesprayt in drij steden van Iuda, van Samarien af tot Bethothoron toe, ende doen sij drij duysent menschen verslaghen hadden, soo hebben sij eenen grooten roof wech ghenomen.

+ D

14

Maer nae dat Amasias die Ydumiters verslaghen hadde ende die goden van Seir met ghebracht hadde, soo heeft hy die voor hem seluen tot goden ghestelt, ende hy aenbadt die, ende dien ontstac hi ruecwerck,

15

Waerom die Heere gram sijnde teghen Amasiam heeft tot hem ghesonden eenen propheet die hem segghen soude. Waerom hebdi die goden aenbeden die hen volck niet verlost en hebben wt v hant?

16

Ende doen hy dese woorden sprack soo antwoorde hy dien. Sijdi des conincks raetsheere? Sijt stille op dat ick v niet en doode, ⁺Ende die propheet wech gaende. Ick weet wel (seyt hy) dat Godt ghedacht heeft v doot te slaen, om dat ghy dit quaet ghedaen hebt, ende daer bouen en hebdi oock niet willen doen nae mijnen raet.

+ E

17

Hierom Amasias die coninck van Iuda hebbende eenen seer quaden raet ghenomen heeft ghesonden tot Ioas den sone van Ioachaz Iehus sone den coninck van Israel, segghende. Coemt laet ons malcanderen sien,

18

Ende hi sandt die boden wederom segghende. Die wilden distel die in Libano is heeft tot den cederboom van Libano ghesonden segghende. Gheeft v dochter mijnen sone tot een huysvrouwe, ende siet die beesten die int bosch van Libano waren sijn voorby ghegaen ende hebben den distel struyc vertreden,

19

Ghy hebt geseyt. Ick heb Edom gheslagen, ende daerom wort v herte verhauen tot houerdien, sidt in v huys, waerom verwecti tquaet teghen v seluen, ⁺dat ghy vallen soudt ende Iudas met v?

+ F

20

Maer Amasias en wilde niet hooren, om dat des Heeren wille was dat hy gheleuert soude worden inder vianden handen om die goden van Edom

21

Daerom soo is Ioas die coninc van Israel opcomen, ende sij hebben malcanderen haer aensichten ghetoont, Maer Amasias die coninc van Iuda was te Bethsames Iude,

22

Ende Iudas is gheuallen voor Israel, ende is gheuloden in sijn tabernakelen,

23

Maer Amasiam den coninc van Iuda den sone van Ioas Ioachaz sone, heeft Ioas die coninc van Israel gheuanghen te Bethsames ende heeft hem ghebracht in Ierusalem, ende heeft der stadt mueren ghebroken van Ephraims poorte tot aen die hoecpoorte toe, vier hondert cubitus lanc,

24

Ende alle tgout ende siluer ende alle die vaten die hi gheuonden hadde in Gods huys, ende bi Obededom ende ooc in die scatten van des conincs huys, ⁺ende ooc die kinderen der borghen heeft hy wederom gheuoert in Samarien.

+ G

25

Ende Amasias Ioas sone die coninc van Iuda heeft gheleeft, nae dat ghestoruen is Ioas Ioachaz sone die coninc van Israel vijfthien iaren,

26

Datter meer is van Amasias woorden der ierster ende der laetster is ghescreuen int boec der coninghen van Iuda ende Israel,

27

Ende nae dat hy vanden Heere ghesceyden was, soo hebben sij hem laghen gheleyt in Ierusalem, Ende doen hi gheuloden was in Lachis, soo hebben sij ghesonden ende hem daer ghedoot,

28

Ende sij hebben hem wederbracht op paerden ende begrauen met sijnen vaderen in Dauids stadt.