Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiiij. Capittel.

1

⁺SEuen iaren out was Ioas doen hy begonste te regneren, ende veertich iaren heeft hi gheregneert in Ierusalem, sijns moeders naem was Sebia van Bersabee,

+ A

2

Ende hy heeft ghedaen dat goet was voor den Heere alle die daghen van Ioiada den priester,

3

Ende Ioiada nam hem twee huysvrouwen waer af dat hy ghewonnen heeft sonen ende dochteren,

4

Hier nae soo heuet Ioas belieft datmen des Heeren huys soude vermaken,

5

Ende hy heeft vergadert die priesteren ende Leuiten, ende tot hen gheseyt. Gaet wt tot die steden van Iuda ende vergadert van gheheel Israel ghelt tot die veruallinghen van ons Gods tempel te vermaken tallen iaren, ende doet dat haestelijck, ⁺Maer die Leuiten hebben dat met cleynder naersticheyt ghedaen,

+ B

6

Ende die coninck heeft Ioiadam den prince gheroepen ende tot hem gheseyt. Waerom en hebdi niet besorgt dat ghy die Leuiten soudt bedwinghen om van Iuda ende Ierusalem in te halen het ghelt, dwelc ghestelt is van Moyses des Heeren dienaer, dat gheheel Israel dat inbrengen soude int tabelnakel des ghetuyghenis?

7

Want die alder ongoddelijcste Athalia ende haer sonen hebben dat huys Gods verdoruen, ende met alle den dinghen die in des Heeren tempel gheheylicht waren, hebben sij Baaluns tempel verciert,

8

Hierom heeft die coninck beuolen, ende sij hebben een kiste ghemaect, ende die ghestelt by des Heeren poorte van buyten,

9

Ende het is openbaer vercondicht in Iuda ende Ierusalem dat een ieghelijc den Heere den prijs brenghen souden den welcken Moyses des Heeren dienaer ghestelt hadde ouer gheheel Israel in die woestijne,

10

⁺Ende alle die princen hebben hen verblijt, ende alle tvolc, ende sij sijn inghegaen ende hebbent inghebracht, ende gheworpen in des Heeren kiste, also dat die vol werde,

+ C

11

Ende alst tijt was dat sij die kiste draghen souden voor den coninc door der Leuiten handen (want sij saghen daer veel ghelts) so ghinc des conincs scrijuer in, ende dien douerste priester ghestelt hadde, ende si storten het ghelt wt datter in die kiste was, Maer die kiste droeghen sij weder op haer plaetse, Ende alsoo deden sij van daghe te daghe, ende daer is ontellijcken veel ghelts vergadert,

12

het welcke die coninck ende Ioiada hebben ghegheuen den ghenen die ouer die wercken van des Heeren huys waren, Ende die huerden daer mede steenhouwers, ende constighe ambacht luyden van allen wercken, dat sij het huys des Heeren souden vermaken, ⁺ende oock smeden van ysere ende metael, op dat mocht ondersedt worden tghene dat begonste te vallen,

+ D

13

Ende die daer wrachten hebben naerstelijc ghedaen, ende die ghescoortheyt der mueren worden toeghemaect door hen handen, ende sij hebben des Heeren huys opghericht, in sijnen iersten staet, ende sij hebben dat doen vast staen,

14

Ende doen sij alle die wercken voldaen hadden, so hebben si voor den coninc ende Ioiada ghebracht het ander deel des ghelts datter ouerde, daer af dat ghemaect sijn des tempels ghereedtscappen ten dienste, tot die heel brantofferanden, scalen oock ende andere gouden ende silueren vaten, ende daer worden gheoffert heelbrantofferanden in des Heeren huys, eewelijck in allen die daghen van Ioiada.

15

⁺Ende Ioiada is out gheworden vol daghen sijnde ende hy is ghestoruen doen hy hondert ende dertich iaren out was,

+ E

16

ende sij hebben hem in Dauids stadt begrauen met die coninghen, om dat hy wel ghedaen hadde met Israel ende met sijnen huyse,

17

Ende nae dat Ioiada ghestoruen was, soo sijn die princen van Iuda inghegaen ende hebben den coninck aenghebeden, die welcke versmeect sijnde door haren dienst heeft hen gheuolcht,

18

Ende sij hebben verlaten den tempel van den Heere haerder vaderen Godt, ende hebben den bosschen ende ghesneden beelden ghedient, ende gramscap is ghecomen teghen Iudam ende Ierusalem om dese sonde,

19

Ende hy sandt tot hen propheten dat sij totten Heere wederkeeren souden, die welcke hen betuyghende sij niet en wilden hooren,

20

Hierom soo heeft Gods gheest aenghedaen Zachariam Ioiadas sone den priester, ende hy stont int aenschijn des volcks ende seyde tot hen. ⁺Dit seyt die Heere Godt. Waerom ouertreedt ghy des Heeren ghebodt dwelc v niet baten en sal, ende hebt den Heere verlaten dat hy v verlaten soude?

+ F

21

Die welcke vergadert sijnde teghen hem hebben steenen gheworpen nae des conincs ghebodt int voorhof van des Heeren huys,

22

Ende Ioas die coninc en heeft niet ghedachtich gheweest der bermherticheyt die Ioiada diens vader met hem ghedaen hadde, maer hy heeft sijnen sone ghedoodt, Die welcke (doen hy sterf) seyde. Die Heere moet aensien ende versoecken.

23

Ende alst een iaer verloopen was, soo is teghen hem opghecomen dat heyr van Sirien, ende tis comen in Iudam ende Ierusalem, ende heeft dootgheslaghen alle die princen des volcks, ende alle den roof hebben sij den coninck ghesonden in Damasco,

24

Ende certeyn doen daer een cleyn ghetal der Siriers comen was, soo heeft die Heere in hen handen gheleuert een ontellijcke menichte, ⁺om dat sij verlaten hadden den Heere haerder vaderen Godt, ende in Ioas hebben sij oock versma-

+ G

[p. *344]

delijcke ordeelen ghedaen,

25

Ende wech treckende hebben sij hem ghelaten in groote siecten, Ende sijn knechten sijn teghen hem opgestaen, ter wraken van tbloet des soons Ioiade des priesters, ende sij hebben hem ghedoodt op sijn beddeken ende hy is ghestoruen, ende sij hebben hem begrauen in Dauids stadt, Maer niet in der coninghen grauen,

26

Ende hem hebben laghen gheleyt Zabad Semaaths der Amanijtscher vrouwen sone, ende Iozabad Semariths der Moabijtscher vrouwen sone,

27

Maer sijn sonen ende die somme des ghelts die onder hem vergadert was, ende dat vermaken vanden huyse Gods, sijn neerstelijck ghescreuen int boeck der coninghen, ende Amasias sijn sone heeft voor hem gheregneert.