Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺MAer int seuenste iaer Ioiada versterct sijnde, heeft ghenomen die honderste mannen, te weten Azariam Ierohams sone, ende Ismael Iohanans sone, Azariam oock Obeds sone, ende Maasiam Adaias sone, ende Elisaphat den sone van Zechri, ende hy heeft met hemlieden een verbont ghemaect

+ A

2

Die welcke gaende al rontsomme Iuda hebben vergadert die Leuiten wt alle die steden van Iuda ende die princen der familien van Israel, ende sij sijn ghecomen in Ierusalem,

3

Hierom heeft alle die menichte een verbont ghemaect in den huyse Gods, metten coninc, Ende Ioiada heeft tot henlieden gheseyt. Siet des conincks sone sal regneren ghelijc die Heere ghesproken heeft ouer Dauids sonen,

4

Daerom dit is dwoort dat ghy doen sult.

5

Dat derde deel van v lieden die ter sabboth feesten coemt, vanden priesteren ende Leuiten ende doorwachters, sal in die poorte wesen, ende het derden deel aen des conincks huys, Ende dat derde deel aen die poorte welc ghenoemt wort des fundaments, Maer alle dander ghemeyn volck laet wesen in die voorhouen van des Heeren huys,

6

Ende niemant anders en laet gaen in des Heeren huys, dan die priesters ende die daer dienen vanden Leuiten, die laet alleen ingaen, want sij sijn gheheylicht, ende alle dander ghemeyn volck laet bewaren des Heeren wake,

7

⁺Maer die Leuiten laet den coninck omringhen hebbende elck hen wapenen (ende eest datter iemant anders inden tempel coemt laet dien dooden) ende laet hen sijn metten coninck als hi ingaen ende wtgaen sal.

+ B

8

Aldus soo hebben die Leuiten ende gheheel Iuda ghedaen nae alle dat hen Ioiada die ouerste priester gheboden hadde, Ende sij hebben elck ghenomen die mannen die onder hen waren, ende sij quamen by die ordinancie vanden sabboth metten ghenen die den sabboth voldaen hadden, ende wtghegaen waren, Want Ioiada die ouerste priester en hadde die scaren niet laten gaen, die welcke deen nae dander pleghen tot elcker weken veruolghens te comen,

9

Ende Ioiada die priester heeft den hondert mannen die spiessen ghegheuen ende die groote scilden ende targien des conincs Dauid die welcke hy gheheylicht hadde in des Heeren huys,

10

Ende hy heeft ghestelt alle tvolck der gheender die steecsweerden hielen aen die rechte sijde des tempels, tot aen die slincke sijde des tempels voor den outaer ende den tempel, rontsomme den coninck,

11

Ende sij hebben des conincs sone wtghebracht ende hebben een croonement op sijn hooft ghestelt, ende dat ghetuyghenisse, ende sij hebben in sijn hant ghegheuen die wet te houden, ende sij hebben hem coninck ghemaect, ⁺Ende Ioiada die ouerste priester heeft hem ghesalft ende sijn sonen, ende si hebben hem goet ghewenscht ende gheseyt. Die coninck leue.

+ C

12

Dwelcke als Athalia ghehoort hadde te weten die stemme der gheender die liepen ende loofden den coninck, soo is sij totten volcke gheghaen inden tempel des Heeren,

13

Ende doen sij ghesien hadde den coninck staende opden graet in den inganck, ende die princen ende scharen omtrent hem ende alle tvolck des lants blijscap makende, ende met trompetten gheluyt makende, ende met instrumenten van versceyden manieren tsamen spelende, ende die stem-

[p. *343]

me der gheender die loofden, soo heeft sij haer cleederen ghescoort ende gheseyt. Verraderie verraderie,

14

Ende Ioiada die ouerste priester is wtghegaen tot die hondert mannen ende princen des heyrs ende heeft hen gheseyt. Leydtse wt dat beuanck des tempels ende laetse buyten metten swaerde ghedoodt worden, Ende die priester heeft gheboden datmense niet dooden en soude in des Heeren huys,

15

Ende sij hebben hen handen aen haren hals ghesteken, ende doen sij comen was in die poorte der peerden van des conincks huys, soo hebben sij haer daer ghedoot.

16

Ende Ioiada heeft een verbont ghemaect tusschen hem ende tgheheel volc ende den coninck, dat sij souden wesen des Heeren volc

17

Hierom is alle tvolck ghegaen in Baals huys, ⁺ende sij hebben dat verdoruen ende sijn outaren ende staende beelden hebben sij tsamen ghebroken, Ende Mathan Baals priester hebben sij doodt gheslaghen voor die outaren,

+ D

18

Ende Ioiada heeft ouersten ghestelt in des Heeren huys, onder der priesteren ende Leuiten handen die welcke Dauid bedeyldt heeft in des Heeren huys, dat sij den Heere souden heelbrantofferanden offeren, ghelijck dat ghescreuen is in Moyses wet, met blijscap ende liedekens na Dauids ordinancie,

19

Ende hy heeft ooc doorwaerders ghestelt in die poorten van des Heeren huys, dat daer niemant incomen en soude die onsuyuer waer door eenich dinck,

20

Ende hy heeft die honderste mannen ende die alder vroemste mannen met hem ghenomen, ende die princen des volcs, ende alle tghemeyn volcks des lants, ende sij hebben den coninck doen afcomen van des Heeren huys, ende gaen door dmidden van der ouerster poorten in des conincs huys ende sij hebben hem ghestelt inden coninclijcken stoel,

21

Ende alle tvolck des lants is seer blijde gheweest, ende die stadt heeft gherust, Maer Athalia is metten swaerde verslaghen.