Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺ENde die inwoonders van Ierusalem hebben Ochoziam sijnen ioncsten sone voor hem coninck ghemaect, want alle die outste van gheboorten die voor hem waren, hadden die roouers der Arabischer doot gheslaghen die den heyrlegher oueruielen, Ende Ochozias Iorams des conincs van Iuda sone heeft gheregneert,

+ A

2

Tweenveertich iaren out was Ochozias doen hy begonste te regneren, ende een iaer heeft hy geregneert in Ierusalem ende sijns moeders naem was Athalia die dochter van Amri,

3

Ende hy is oock in ghegaen door die weghen van Achabs huys, want sijn moeder stierde hem dat hy ongoddelijck doen soude,

4

⁺Hierom heeft hy quaet ghedaen in daensicht des Heeren ghelijck Achabs huys, want sij hebben sijn raetslieden gheweest nae sijns vaders doot, te sijnder verderffenissen,

+ B

5

Ende hi heeft nae haren raden ghewandelt, Ende hy is ghereyst met Ioram Achabs des conincs van Israels sone ten strijde teghen Azael den coninc van Sirien te Ramoth-galaad, ende die Siriers hebben Ioram gewont

6

Die welcke is wederom gekeert om ghenesen te worden in Iezrael, want hy hadde veel wonden ontfanghen inden voorseyden strijt, Daerom is Ochozias die sone van Ioram die coninck van Iuda afcomen, ⁺om te besoecken Ioram Achabs sone in Iezrael sieck sijnde

+ C

7

Want het was Gods wille teghen Ochoziam dat hi tot Ioram comen soude, ende als hy comen was, ende wt gaen soude met hem teghen Iehu den sone van Namsi, den welcken die Heere ghesalft hadde om dat hy Achabs huys te niet doen soude,

8

Hierom doen Iehu Achabs huys omwierp, soo heeft hy die princen van Iuda gheuonden ende die sonen van Ochozias broeders die hem dienden, ende hy heeft die doot gheslaghen,

9

Ende den seluen Ochoziam soeckende heeft hy gheuanghen gheborgen wesende in Samarien, Ende als hi tot hem bracht was, soo heeft hy hem ghedoot, ende sij hebben hem begrauen, ⁺om dat hy Iosaphats sone was, die den Heere gesocht hadde wt alle sijn herte, Ende daer en was voorts gheen hope meer datter iemant van Ochozias gheslachte regneren soude,

+ D

10

Want Athalia sijn moeder siende dat haer sone doot was is opghestaen ende heeft alle dat coninclijck gheslachte van Iorams huys ghedoodt,

11

Maer Iosabeth des conincs dochter heeft ghenomen Ioas Ochozias sone, ende sij heeft hem ontstolen wt dat midden van des conincs sonen, doen sij ghedoot worden, ende sij heeft hem gheborghen met sijnder voester in die camer der beddekens, Ende Iosabeth die hem gheborghen hadde was Iorams des conincs dochter, Ioiade des ouerste priesters huysvrouwe die suster van Ochozias, ende daerom en heeft Athalia hem niet ghedoot,

12

Aldus heeft hy met henlieden verborghen gheweest in des Heeren huys ses iaren in die welcke Athalia ouer dlant gheregneert heeft.