Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺ENde Iosaphat is ontslapen met sijnen vaderen ende hy is begrauen met hen in Dauids stadt, ende Ioram sijn sone heeft voor hem gheregneert,

+ A

2

Die welcke heeft ghehadt broeders Iosaphats sonen Azariam, ende Iahiel, ende Zachariam, ende Azariam, ende Michael, ende Saphatiam, alle dese waren Iosaphats des conincs van Iuda sonen,

3

Ende hen vader heeft hen ghegheuen veel gauen van gout ende siluer, ende renten, met seer vaste steden in Iuda, maer het rijck heeft hy Ioram ouer ghegheuen om dat hy dierste gheboren was,

4

Ende Ioram is opghestaen op sijns vaders conincrijck, ende doen hy sij seluen vast ghemaect hadde, soo heeft hy alle sijn broeders ghedoot metten sweerde, ende sommighe vanden princen van Israel,

5

Tweendertich iaren out was Ioram doen hi begonste te regneren ende acht iaren heeft hy in Ierusalem gheregneert,

6

Ende hy heeft ghewandelt in die weghen der coninghen van Israel, ghelijck Achabs huys ghedaen hadde, want Achabs dochter was sijn huysvrouwe, ende hy heeft quaet ghedaen in des Heeren aenschijn

7

⁺Ende die Heere en heeft het huys van Dauid niet willen te niet doen, om tverbont dat hy met hem ghemaeckt hadde, ende om dat hy gheloeft hadde, dat hy hem een licht gheuen soude, ende sijnen sonen tot allen tijden,

+ B

8

In dien daghen hebben die van Edom wederspannich gheweest dat sij onder Iudam niet sijn en souden, ende sij hebben hen seluen eenen coninck ghemaect,

9

Ende doen Ioram met sinen princen ouerghetrocken was ende met alle sijnen rosvolck dat met hem was, soo is hi des nachts opghestaen ende heeft die Edomiten gheslaghen, die hem omringt hadde ende alle die hooftluyden van haren rosvolck,

10

Maer nochtans hebben die Edumiten wederspannich gheweest dat sij onder Iuda niet sijn en souden, tot op desen dach toe, In dien tijden is Lobna ooc afghesceyden dat sie onder sijn hant niet sijn en souden,Want hy hadde verlaten den Heere sijns vaders Godt,

11

daer toe heeft hy oock hoochden ghetimmert in die steden van Iuda, ende heeft die van Ierusalem doen oncuyscheyt bedrijuen ende Iudam doen ouer treden.

12

⁺Maer hem werde eenen brief ghebracht van Helias den propheet daer in gheschreuen was, Dit seyt die Heere Dauids ws vaders God. Om dat ghi niet ghewandelt en hebt in Iosaphats ws vaders weghen, ende in die weghen van Asa den coninck van Iuda,

+ C

13

maer ghewandelt hebt door den wech der coninghen van Israel, ende hebt Iudam doen oncuyscheyt bedrijuen, ende die inwoonders van Ierusalem, volghende die oncuyscheyt des huys van Achab, ende daer bouen hebdi v broeders, ws vaders huys die beter waren dan ghy, ghedoodt,

14

Siet die Heere sal v met een groote plaghe slaen met uwen volcke, ende met uwen sonen ende huysvrouwen, ende alle uwe substancie,

15

ende ghy sult met een die alder quaetste siecte ws buycs siec sijn tot dat v inghewant allinxkens wtcomen sal telcken daghe.

16

Hierom heeft die Heere teghen Ioram verwect den gheest der Philistijnen ende der Arabischen die by die Morianen woonen,

17

ende sij sijn opcomen int lant van Iuda, ende sy hebben dat verdoruen, ende sij hebben gherooft alle die substancie die in des conincs huys gheuonden is, ende daer bouen oock sijn sonen ende

[p. *342]

sijn huysvrouwen, ende hem en bleef anders gheenen sone dan Ioachaz die dalder ioncste was,

18

⁺Ende bouen alle dese dinghen heeft hem die Heere gheslaghen met een ongheneselijcke siecte des buycs,

+ D

19

Ende als die daghen deen nae dander quamen, ende der tijden verloop voortghinck, soo is volbracht den omloop van twee iaren, ende aldus door een langhe verrottinghe verteert alsoo dat hy oock sijn inghewant van onder wtwierp is hy berooft tsamen van der siecten ende van dleuen, Ende hy is ghestoruen van een seer quade siecte, ende tvolck en heeft hem gheen wtuaert ghedaen nae die maniere des verbrandens ghelijc sij sijnen ouders ghedaen hadden,

20

Tweendertich iaren out was hy doen begonste te regneren, ende acht iaren heeft hy in Ierusalem gheregneert, Ende hy heeft ghewandelt niet rechtelijck, ende sij hebben hem begrauen in Dauids stadt, Maer nochtans niet inder coninghen begrauenisse.