Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel

1

⁺NAe desen sijn vergadert die kinderen van Moab, ende die kinderen van Ammon, ende met hen vanden Ammoniten tot Iosaphat om teghen hem te strijden,

+ A

2

Ende die boden sijn ghecomen ende hebbent Iosaphat te kennen ghegheuen segghende. Een groote menichte coemt teghen v van die plaetsen die ouer die zee sijn, ende van Sirien, ende siet sij sijn in Asason-thamar welck is Engaddi,

3

Ende Iosaphat van vreesen verscrict sijnde heeft hem heel ghegheuen om den Heere te bidden, ende hy heeft een vasten doen wtroepen in gheheel Iuda,

4

Ende Iudas is vergadert om den Heere te bidden, Oock quamen sij alle wt haren steden om den Heere te verbidden,

5

Ende doen Iosaphat ghestaen was int midden der vergaderinghen van Iudas, ende Iherusalem in des Heeren huys in dat nieuwe voorhof,

6

soo heeft hy gheseyt. ⁺Heere onser vaderen Godt, ghy sijt Godt inden hemel, ende ghy hebt heerscappie ouer alle die conincrijcken der Heydenen, in uwe hant is stercheyt ende machticheyt, ende niemant en mach v wederstaen,

+ B

7

En hebt ghi onse Godt niet doot gheslaghen alle die bewoonders van desen lande voor v volck Israel, ende die ghegheuen Abrahams ws vrints sade inder eewicheyt?

8

Ende sij hebben daer in ghewoont ende daer in ghetimmert een heylighe wooninghe voor uwen naem segghende.

9

Eest dat ons eenighe quade dinghen oueruallen, tsij het swaert des ordeels, die pestilencie, ende den hongher, so sullen wy staen voor v aenschijn voor dit huys daer in dat uwen naem aengheroepen is, ende wy sullen tot v roepen in onse tribulatien, ende ghy sullet verhooren ende salich maken.

10

Hierom nv siet die kinderen van Ammon ende Moab ende tgheberchte van Seir (door die welcke ghy niet en hebt toeghelaten dat Israhel ghaen soude, doen sij wt Egipten quamen maer hebben van hen afgheweken, ende en hebben hen niet doot gheslaghen)

11

die doen nv contrarie, ende si arbeyden om ons te verdrijven wt der besittinghen die ghy ons gheleuert hebt,

12

⁺Onse Godt en sult ghy hen daerom niet ordeelen? In ons en is voorwaer so grooten stercheyt niet, dat wij deser menichten souden moghen wederstaen, die ons ouerualt, Maer als wi niet en weten wat wij doen moeten, dan en hebben wi anders niet meer dan alleen dat wij ons ooghen stieren tot v,

+ C

13

Ende gheheel Iuda stont voor den Heere met haren cleynen kinderen ende huysvrouwen, ende met haren sonen,

14

Ende daer was Iahaziel die sone Zacharie des soons Banaie des soons Iehiel, des soons Mathanie een Leuijt van Asaphs kinderen, opden welcken is worden den gheest Gods int midden der scaren,

15

ende hy heeft gheseyt. Hoort toe alle ghy van Iuda, ende die in Ierusalem woont, ende ghy coninck Iosaphat. Dit seyt die Heere v lieden. En wilt niet vreesen, noch en vervaert v niet voor dese menichte, want ten is uwen strijdt niet, maer Godts strijdt,

16

Morghen suldy nederwaerts trecken teghen hen, Want sij sullen opcomen door den hellenden berch, ghenoemt Cis, ende ghy sultse vinden int hoochste vander beken welck is teghen ouer die woestijne Ieruel,

17

⁺Ghy en sullet niet sijn die strijden sult, maer alleenlijc staet betrouwelijc ende ghy sult des Heeren hulpe op v sien, o Iuda, ende Ierusalem en wilt niet vreesen noch en weest niet veruaert, morghen suldi teghen hen wt trecken ende die Heere sal met v lieden wesen,

+ D

18

Hierom sijn Iosaphat ende Iuda ende alle die bewoonders van Ierusalem, nedergheuallen plat ter aerden voor den Heere ende hebben hem aenghebeden,

19

Maer die Leuiten van Caaths sonen ende van die kinderen van Core hebben den Heere den Godt van Israhel ghelouet met grooter stemmen hooch opwaerts.

20

Ende als sij des morghens opghestaen waren, soo sijn sij wtghegaen door die woestijne Thecua, ende als sij voorts ghereyst waren, soo heeft Iosaphat int midden van henlieden staende gheseydt. Hoort my ghy

[p. *341]

mannen van Iuda, ende alle die inwoonders van Ierusalem, ghelooft inden Heere uwen Godt, ende ghy sult vrij sonder vreese wesen, ghelooft sijnen propheten ende alle dinghen sullen voorspoedelijc vergaen,

21

Ende hy heeft den volcke raet ghegheuen, Ende hy heeft des Heeren sanghers ghestelt dat sij hem louen souden by hen scaren, ende dat sij voor theyr gaen souden ende met ghelijcker stemmen segghen. ⁺Belijdt den Heere want inder eewicheyt is sijn bermherticheyt,

+ E

22

Ende doen sij begonsten die louen te singhen, so heeft die Heere hen laghen teghen hen seluen ghekeert, te weten der kinderen van Ammon ende Moab ende van tgheberchte van Seir, die welcke wtgheghaen waren dat sij tseghen Iudam strijden souden, ende sij sijn gheslaghen gheweest,

23

Want die kinderen van Ammon ende Moab sijn opghestaen teghen die bewoonders van Seirs gheberchte dat sij die dooden ende te niet doen souden ende doen sij dat metten wercken volbracht hadden, soo sijn sij oock teghen malcanderen ghekeert, ende sijn van malcanders wonden gheuallen,

24

Maer doen Iuda comen was aen die speluncke welck ter woestijnenwaerts siet, heeft hy ghesien van verre alle dat lantscap breedt ouer, vol doode lichamen, ende datter niemant ouer bleuen en was die de doot hadde moghen ontgaen.

25

Hierom is Iosaphat ende alle tvolc met hem comen om der dooden roof af te trecken, ende sij hebben onder die doode lichamen vonden versceyden huysraet, cleederen oock ende seer costelijcke vaten, ende sij hebbent gherooft also dat sijt al niet draghen en mochten, nocht oock binnen drij daghen den roof wech draghen, om die grootheyt des roofs,

26

⁺Maer opden vierden dach sijn si vergadert in die valleye der benedictien, Want om dat sij daer den Heere ghebenedijt hadden, so hebben sij die plaetse ghenaemt die valleye der benedictien, tot opden teghenwoordighen dach,

+ F

27

Ende die mannen van Iuda ende die inwoonders van Ierusalem, ende Iosaphat voor hem, sijn wederom ghekeert in Ierusalem met grooter blijscappen, om dat die Heere hen blijscap hadde ghegheuen van haren vianden,

28

Ende sij sijn in Ierusalem ghegaen met psalterien ende herpen ende trompetten in des Heeren huys,

29

Ende den grouwel des Heeren viel op alle die conincrijcken der landen, doen sij ghehoort hadden dat die Heere ghestreden hadde teghen die vianden van Israel,

30

Ende het rijck van Iosaphat heeft gherust, ende die Heere heeft hen vrede ghegheuen al rontsomme.

31

Aldus heeft Iosaphat gheregneert ouer Iudam, ende hi was vijfendertich iaren out, doen hy begonste te regneren ende vijfentwintich iaren heeft hi gheregneert in Ierusalem, ende sijns moeders naem was Azuba die dochter van Selahi,

32

Ende hy heeft in Aza sijns vaders wech ghewandelt, ende hy en is daer af niet gheweken, doende tghene dat behaechlijck was voor den Heere,

33

⁺Maer nochtans en heeft hy die hoochden niet wech ghenomen, ende het volck en hadde noch sijn herte niet ghescict tot den Heere haerder vaderen Godt.

+ G

34

Maer datter meer is van Iosaphats wercken van dierste ende die laetste, dats ghescreuen in die woorden van Iehu des soons Hanani, die welcke hy ghesteldt heeft in die boecken der coninghen van Israhel.

35

Nae desen heeft Iosaphat die coninck van Iuda vrintscap ghemaect met Ochozia den coninc van Israel wiens wercken seer ongoddelijck waren,

36

Ende hy heeft mede deelachtich geweest dat hy scepen maecte die te Tharsis varen souden, ende sij hebben een vlote scepen ghemaect in Asiongaber,

37

Ende Eliezer Dodaus sone van Maresa heeft gheprophereert tot Iosaphat segghende. Om dat ghy een verbont ghehadt hebt met Ochozia, daerom heeft die Heere uwe wercken gheslaghen, ende die scepen sijn ghebroken, ende sij en mochten niet varen tot Tharsis.