Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel

1

⁺ENde Iosaphat die coninck van Iuda is wederom ghekeert in sijn huys vredelijck in Ierusalem,

+ A

2

Den welcken is te ghemoet ghecomen Iehu die sone Hanani een siender, ende heeft tot hem gheseyt. Den ongoddelijcke doet ghy hulpe, ende met den ghenen die den Heere haten maect ghi vrintscap, ende daerom haddi voorwaer den torn des Heeren verdient,

3

Maer daer sijn goede wercken in v gheuonden, om dat ghy die bosschen wten lande van Iuda wech ghenomen hebt, ende hebt v herte bereydt, dat ghy den Heere uwer vaderen Godt soecken soudt.

4

⁺Aldus heeft Iosaphat ghewoont in Ierusalem, ende hy is wederom wtghegaen totten volcke van Bersabee aen totten gheberchte van Ephraim, ende hi heeftse wederom gheroepen totten Heere haerder vaderen Godt,

+ B

5

Ende hy heeft ghestelt rechters des lants in alle die besloten steden van Iuda, door alle plaetsen besonder

6

ende ghebiedende den rechters heeft hi gheseyt. Siet wat ghy doet, want ghy en bedient gheen officie des menschen maer des Heeren, ende so wat ghi ordeelt dat sal wederom op v comen,

7

Die vreese des Heeren laet met v sijn, ⁺ende doet alle dinghen met naersticheyt, want by onsen Heere God en is gheen boosheyt, noch wtnemen der persoonen, noch begheerlijcheyt der ghiften,

+ C

8

In Ierusalem heeft Iosaphat ooc Leuiten, ende priesters ghestelt, ende princen der familien wt Israel, dat sij des Heeren recht ende sake ordeelen souden den bewoonders van die,

9

ende hy heeft hen bevolen segghende. Alsoo suldy doen in die vreese des Heeren ghetrouwelijck, ende met volmaecter herten

10

Alle saken van uwen broeders die tot v comen sullen die in hen steden woonen tusschen maescap ende maescap, soo waer dat twist is vander wet, van tghebodt vanden ceremonien, ende vanden rechtverdich makinghen toont hen dat, ⁺dat sij teghen den Heere niet en sondighen, ende dat die gramscap niet en come op v, ende op v broeders, Want alsoo doende en suldi niet sondighen,

+ D

11

Ende Amarias v priester ende bisscop sal douerste wesen in die dinghen die Gode aengaen, Maer Zabadias Ismaels sone die een hooftman is int huys van Iuda, die sal op die wercken sijn die tot des conincks dienst behooren, ende ghy hebt tot meesters die Leuiten in v teghenwoordicheyt. Versterct v, ende doet naerstelijck, ende die Heere sal met v lieden wesen int goede.