Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺ALdus was Iosaphat seer rijc ende vermaert ende hy is by swagherscap vereenicht met Achab,

+ A

2

Ende hy is nae sommighe iaren tot hem neder ghegaen in Samarien, tot wiens coemste heeft Achab gheslaghen seer veel rammen ende rinderen voor hem ende voor tvolc dat met hem comen was, ende hi bracht hem daer toe met woorden dat hy optrecken soude in Ramoth-galaad,

3

Ende Achab die coninc van Israel heeft gheseyt tot Iosaphat den coninc van Iuda. Coemt met my in Ramoth-galaad, Den welcken hi heeft gheantwoort. Ghelijc ic, alsoo sijdi ghy, ghelijc v volck soo is mijn volck, ende wij sullen met v wesen inden strijt,

4

Ende Iosaphat seyde tot den coninc van Israel. Neemt nv raet (dat bidde ick v) aen dat woort des Heeren,

5

⁺Hierom heeft die coninc van Israel vergadert vier hondert mannen vanden propheten, ende hy heeft tot hen gheseyt. Moeten wy in Ramoth-galaad gaen om te orloghen, oft rusten? Ende sij seyden. Reyst opwaerts ende Godt salse in des conincs hant leueren,

+ B

6

Ende Iosaphat heeft gheseyt. En is hier niet een propheet des Heeren dat wijt van hem ooc mochten vraghen?

7

Ende die coninck van Israhel seyde tot Iosaphat. Daer is een man vanden welcken wij des Heeren wille vraghen moghen, Maer ick hate hem, want hy en propheteert my gheen goet, maer quaet tot allen tijden, Ende tis Micheas die sone van Iemla

Ende Iosaphat heeft gheseyt. Coninc en spreect in al sulcker voeghen niet,

8

Hierom heeft die coninck van Israel gheroepen een vanden ghesneden camerlinghen ende tot hem gheseyt. Roept haestelijc Micheam den sone van Iemla,

9

Ende die coninck van Israel, ende Iosaphat die coninc van Iuda saten beyde in haer coninclijcke stoelen ghecleedt met coninclijck cieraet, ⁺ende sij saten op die plaetse by die poorte van Samarien, ende alle die propheten propheteerden voor hen,

+ C

10

Maer Sedechias die sone van Chanaana maecte sij seluen yseren hornen ende seyde. Dit seyt die Heere. Hier mede suldi Sirien opworpen, tot dat ghijse verdoruen hebt,

11

Ende alle die propheten propheteerden desghelijcs ende seyden. Trect opwaerts in Ramoth-galaad, ende ghy sult voorspoedich sijn, ende die Heere sal die in des conincs hant leueren,

12

Ende die bode die ghegaen was om Micheam te roepen heeft tot hem gheseyt. Siet die woorden van alle die propheten vercondighen den coninck met eenen mont goede dinghen, Hierom bidde ick v dat v woort niet versceyden en sij van hen ende dat ghy oock spreect dat gheluckich is,

13

⁺Totten welcken Micheas heeft gheantwoort. Soo warachtelijc als die Heere leeft al wat mijn God my segghen sal dat sal ic spreken,

+ D

14

Aldus is hy totten coninc comen, Totten welcken die coninck seyde. Michea moeten wij gaen in Ramoth-galaad om te strijden, oft rusten? Den welcken hi gheantwoort heeft. Gaet opwaerts want tsal al voorspoedelijck ghescieden, ende die vianden sullen in v handen gheleuert worden,

15

Ende die coninck heeft gheseyt, noch eenwerf ende anderwerf besweer ick v dat ghy my niet en segghet anders dan dat warachtich is inden naem des Heeren,

16

Ende hi seyde Ick heb ghesien gheheel Israel verstroyt op die berghen, ghelijck scapen sonder herder, Ende die Heere seyde. Dese en hebben gheen heeren, Een ieghelijck ghae wederom in sijn huys met vreden,

17

Ende die coninck van Israel seyde tot Iosaphat. En heb ict v niet gheseyt dat my dese niet goets en soude propheteren, maer tghene dat quaet is?

18

Ende Micheas seyde. Daerom hoort die stemme des Heeren, Ick heb den Heere sien sitten in sijnen heerlijcken throon, ende alle theyr des hemels by hem staende ter rechter ende ter slincker sijden,

19

Ende die Heere heeft gheseyt. ⁺Wie sal bedrieghen Achab den coninck van Israel dat hy op trecke ende valle in Ramoth-galaad? Ende doen die een seyde met deser manieren, ende een ander, met een ander,

+ E

20

soo is daer eenen gheest voorts comen, ende heeft ghestaen voor den Heere ende gheseyt. Ick sal hem bedrieghen. Tot welcken seyde die Heere.Waer mede (seyt hy) suldi hem bedrieghen?

21

Ende hy antwoorde. Ick sal wtgaen ende wesen eenen logenachtighen gheest inden mont van alle sijnen propheten, Ende die Heere heeft gheseyt. Ghy sult hem bedrieghen, ende die ouerhant crijghen, gaet wt, ende doet alsoo,

22

Hier om siet die Heere heeft nv den gheest der loghenen ghegheuen inden mont van allen uwen propheten, ende die Heere heeft van v quade dinghen ghesproken,

23

Ende Sedechias die sone van Chanaana ghinck toe ende sloech Micheam aen sijn wanghen, ende seyde, Door welcken wech is den gheest Godts van my ouerghegaen om v te spreken?

24

⁺Ende Micheas heeft gheseyt. Ghy sult dat selue sien op dien dach, als ghy sult ghegaen sijn van deen camer in dander om verborghen te worden.

+ F

25

Maer die coninck van Israel heeft gheboden segghende. Neemt Micheam ende leydt hem tot Amon den prince vander stadt, ende tot Ioas Amelechs sone,

26

Ende ghi sult segghen. Dit seyt die coninck. Doet desen inden kerker, ende geeft hem een weynich broots ende een luttel waters tot dat ic weder come met vreden,

27

Ende Micheas heeft gheseyt. Eest dat ghy weder coemt met vreden soo en heeft die Heere door my niet ghesproken, Ende hy heeft gheseyt. Hoort alle ghy volcken.

28

Aldus soo sijn opghetrocken die coninc van Israel ende Iosaphat die coninc van Iuda tot Ramoth-galaad,

29

Ende die coninc van Israel heeft tot Iosaphat gheseyt. Ick sal mijn habijt veranderen, ende also sal ick ten strijde gaen, Maer ghy doet v cleederen aen, Ende als die coninck van Israhel sijn habijt verandert hadde, soo is hy inden strijt ghecomen,

30

Maer die coninck van Sirien hadde den capeteynen van sijnen rosvolck gheboden segghende. En vecht niet teghen den minsten oft teghen den meesten dan alleen teghen den coninck van Israel,

31

⁺Hierom doen die princen des rosvolcks ghesien hadden Iosaphat, so hebben sij gheseyt. Dits die coninck van Israhel, Ende sij hebben hem

+ G

[p. *340]

omringhelt strijdende, Maer hy riep totten Heere, ende hy heeft hem gheholpen, ende hy heeft die van hem ghekeert,

32

Want doen die princen des rosvolcks saghen dat hy die coninc van israel niet en was, soo hebben sij hem ghelaten,

33

Maer het ghebuerde datter een vanden volcke eenen pijl schoot int onseker, ende raecte den coninck van Israel tusschen sijnen hals ende scouderen, ende hi seyde tot sijnen wagheman. Keert v hant omme, ende voert mi wten heyre, want ic ben ghewont,

34

Ende den strijdt nam eynde op dien dach, Maer die coninck van Israel stont in sijnen waghen teghen die Siriers totten auont toe, ende hy is ghestoruen als die sonne onderghinck.