Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

1

⁺ENde Iosaphat sijn sone heeft voor hem gheregneert, ende hy is machtich gheworden teghen Israel,

+ A

2

Ende hy heeft ghetalen der orloochs mannen ghestelt in alle die steden van Iuda, die met mueren omleyt waren, Ende hy bescicte garnisoen int lant van Iuda ende in alle die steden van Ephraim die Asa sijn vader inghenomen hadde,

3

Ende die Heere heeft met Iosaphat gheweest om dat hy ghewandelt heeft in Dauids sijns vaders ierste weghen, Ende hi en heeft niet ghehoopt in Baalim,

4

maer in sijns vaders Godt, ende hy heeft voort ghegaen in sijn gheboden, ende niet nae die sonden van Israel,

5

Ende die Heere heeft dat rijck versterct in sijn handen, ende gheheel Iuda heeft Iosaphat ghiften ghegheuen, ende hi heeft ontellijcke groote rijcdommen ghehadt ende veel glorie,

6

Ende doen sijn herte cloecheyt ghenomen hadde om des Heeren weghen, ⁺soo heeft hy oock die hoochden ende bosschen van Iuda wech ghenomen,

+ B

7

Maer int derde iaer sijns rijcs heeft hy van sijnen princen ghesonden Benhail ende Obdiam ende Zachariam ende Nathanael, ende Michram, dat si leeren souden in die steden van Iuda,

8

ende met hen die Leuiten, Semeiam, ende Nathaniam, ende Zabadiam, Azael oock, ende Semiramoth, ende Ionathan, Adoniam ooc, ende Thobiam, ende Thobadoniam Leuiten, ende met hen Elisama ende Ioram priesters,

9

Ende sij leerden tvolck in Iuda hebbende den boeck van des Heeren wet, ende sij ghinghen om tot alle die steden van Iuda ende leerden tvolc,

10

Hier om is die vreese des Heeren ghecomen, op alle die rijcken der lande die rontsomme Iuda waren, ende sij en dorsten teghen Iosaphat niet strijden,

11

⁺Maer die Philistijnen brachten Iosaphat ooc ghiften ende eenen tol van siluer, Ende die Arabischen brachten vee van rammen seuen duysent ende seuen hondert, ende alsoo veel

+ C

[p. *339]

bocken,

12

Hierom is Iosaphat ghewassen ende hy is groot gheworden tot grooter hoocheyt, ende hi heeft in Iuda ghetimmert huysen ghelijck torren, ende bemuerde steden,

13

Ende hi heeft groote wercken ghemaect in die steden van Iuda, ende strijtbaer mannen ende vrome mannen waren in Iherusalem,

14

waer af dit ghetal is by een yeghelijcs huysen ende familien, In Iuda was die prince des heyrs Ethnas die hooftman, ende met hem seer vrome mannen drij hondert duysent,

15

⁺Ende nae desen was Iohannan een prince ende met hem twee hondert ende tachtentich duysent,

+ D

16

Nae dien oock Amasias die sone Zechri den Heere gheheylicht, ende met hem twee hondert duysent stercker mannen,

17

Desen volchde die seer vrome ten strijden Eliada, ende met hem twee hondert duysent mannen die boghen ende scilden droeghen,

18

Nae desen was oock Iozabad, ende met hem hondert ende tachtentich duysent lichter orloochs mannen,

19

Dese waren al tot des conincs hant wtghenomen die andere die hy ghestelt hadde in die bemuerde steden in gheheel Iuda.