Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺MAer int sessendertichste iaer sijns rijcs, soo is Baasa die coninck van Israhel opcomen in Iudam, ende hy omleyde Rama met eenen muer, datter niemant en soude vrijlijc moghen wtgaen oft ingaen wt dat rijc van Asa,

+ A

2

Maer Asa heeft voorts ghehaelt siluer ende gout wt die tresooren van dat huys des Heeren, ende van des conincs scatten, ende hi heuet ghesonden tot Benadad den coninck van Sirien die te Damascus woonde, segghende.

3

Daer is een verbont tusschen v ende my, Oock soo hebben mijn vader ende v vader eendrachticheyt ghehadt, Daerom heb ick v siluer ende gout ghesonden, dat ghy brekende tverbont dat ghy hebt met Baasa den coninc van Israel hem doet van my gaen,

4

⁺Als Benadad dit beuonden hadde, soo heeft hy die princen van sijnen heyren ghesonden tot die steden van Israel, die welcke hebben gheslaghen Ahion ende Dan, ende Abelmaim ende alle die bemuerde steden van Nephtali,

+ B

5

Dwelck als Baasa ghehoort heeft, soo heeft hy afghelaten van te timmeren Rama, ende hy heeft sijn werck laten staen,

6

Maer Asa die coninck heeft tot hem ghenomen gheheel Iudam, ende sij hebben ghehaelt die steenen van Rama ende die houten welck Baasa bereyt hadde totter timmeringhen, ende hy heeft daer mede ghetimmert Gabaa ende Maspha,

7

In dien tijde is ghecomen Hanani een propheet tot Asa den coninck van Iuda, ende heeft hem gheseyt. ⁺Om dat ghy betrouwen hebt ghehadt in den coninck van Sirien, ende niet inden Heere uwen Godt, daerom is theyr des conincs van Sirien wt uwer hant ontgaen,

+ C

8

En waren die Morianen ende Libianen niet veel meerder in ghetale in waghenen ende rosvolck, ende in een seer groote menichte bouen maten, die welcke (doen ghi inden Heere gheloofdet) hy in v handen gheleuert heeft?

9

Want die ooghen des Heeren aenscouwen gheheel aertrijc ende sij gheuen stercheyt den ghenen die met volmaecter herten in hem gheloouen, Daerom hebdi dwaesselijck ghedaen, ende hierom sullen van desen tijt voortaen teghen v orloghen opstaen,

10

Ende Asa gram wesende teghen den siender, heeft hem doen setten in die banden, want hy was daerom seer verbolghen, ende hy heefter seer veel vanden volcke op dien tijt ghedoodt.

11

Maer die wercken van Asa dierste ende die leste, sijn ghescreven int boeck der coninghen van Iuda ende Israel,

12

⁺Ende Asa heeft sieck gheweest int neghendertichste iaer sijns rijcs door seer groote pijne der voeten ende oock in sijn siecheyt en heeft hy den Heere niet ghesocht, maer hy heeft meer betrouwen ghehadt in der medecijnen conste,

+ D

13

Ende hy is ontslapen met sijnen vaderen, ende ghestoruen int eenenveertichste iaer sijns rijcks,

14

Ende sij hebben hem begrauen in sijn graf dat hy voor sij seluen ghegrauen hadde in Dauids stadt, Ende sij hebben hem gheleydt op sijn bedde vol specerien ende olien der ghemeynder vrouwen die welcke waren ghemaect nae die conste der apotekers, ende sij hebben die op hem verbrant met grooter eerlijcheyt.