Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺ENde Azarias die sone van Obed (doen die gheest Gods in hem comen was)

+ A

2

is wtghegaen Asa te ghemoete, ende hy heeft hem gheseyt. Hoort mi Asa ende gheheel Iuda ende Beniamin Die Heere is met v om dat ghy met hem gheweest hebt, Eest dat ghy hem suect, soo suldi hem vinden, Maer eest dat ghy hem verlaet, soo sal hy v verlaten,

3

Maer daer sullen veel daghen in Israel ouerlijden sonder den warachtighen Godt, ende sonder priester leeraer ende sonder wet,

4

Ende als sij in hen benautheden sullen wederom comen sijn tot den Heere den Godt van Israel, ende hem soecken sullen, soo sullen sij hem vinden,

5

In dien tijde en salt gheenen vrede wesen den ingaende ende den wtgaende, maer veruaertheden van allen sijden, in alle die bewoonders der landen,

6

⁺Want deen volck sal teghen dander volc strijden, ende stadt teghen stadt, Want die Heere salse verbaest maken met alder benautheden,

+ B

7

Hierom versterct v, ende en laet v handen niet slap worden, want v werck sal loon heb-

[p. *338]

ben.

8

Dwelck als Asa gehoort hadde te weten die woorden ende prophecie van Azarias Obeds sone den propheet, soo is hy versterct, ende hy heeft die afgoden wech ghenomen van alle dlant van Iuda ende Beniamin, ende van die steden die hy ghewonnen hadde des geberchten van Ephraim, ende hy heeft ghewijt den outaer des Heeren die daer was voor dat poortael des Heeren,

9

Ende hy heeft verghadert gheheel Iudam ende Beniamin, ⁺ende die wtlanders met hem van Ephraim ende Manasse, ende van Simeon want daer wasser veel tot hem gheuloden van Israel siende dat die Heere sijn Godt met hem was.

+ C

10

Ende als sij te Ierusalem comen waren in die derde maent, int vijfthienste iaer des conincrijcs van Asa

11

soo hebben sij den Heere gheoffert op dien dach van den bueten ende roouen welc sij mede ghebracht hadden, seuen hondert ossen, ende seuen duysent rammen,

12

Ende hi is incomen nae die ghewoonte om tverbont te verstercken, dat sij den Heere haerder vaderen Godt soecken souden met hen gheheel herte, ende met hen gheheel ziele,

13

Maer eest datter iemant (seyde hy) niet en soect den Heere den Godt van Israel die sterue vanden minsten tot den meesten, vanden man totter vrouwen,

14

Ende sij hebben den Heere ghesworen met luyder stemmen met iolijt, ende met gheclanck der trompetten ende met gheluyt der basoenen,

15

⁺alle die in Iuda waren met een veruloeckinghe, want met allen hen herte hebben sij ghesworen ende met allen hare wille hebben sij hem ghesocht, ende gheuonden ende die Heere heeft hen ruste ghegheuen al rontsomme,

+ D

16

Ende oock Maacham die moeder van Asa den coninck heeft hi van die groote heerscappie afghesedt, want si int bosch ghemaect hadde een beelt van priapus dwelc hy al ghebroken heeft, ende in stucken briselende heeft hy dat verbrant aen die beke Cedron,

17

Maer die hoochden sijn in Israel bleuen, Maer therte van Asa was volmaect alle sijn daghen,

18

Ende die dinghen die sijn vader belooft hadde, heeft hy oock ghedraghen in des Heeren huys, siluer ende gout, ende versceyden huysraet van vaten,

19

Maer ten was gheen orloghe tot dat dertichste iaer des conincs Asa.