Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺ENde Abia is ontslapen met sijnen vaderen, ende sij hebben hem begrauen in Dauids stadt, ende Asa sijn sone heeft voor hem gheregneert, in wiens daghen heuet dlant gherust thien iaren,

+ A

2

Ende Asa heeft ghedaen dat goet ende behaechlijc was in sijns Godts aensicht,

3

ende hy heeft omgheworpen die outaren des vreemden gods diensts, ende die hoochden ende hy heeft die staende beelden ghebroken, ende die bosschen afghehouwen,

4

Ende hy heeft die van Iuda beuolen dat sij soecken souden den Heere haerder vaderen Godt, ende dat sij die wet doen souden, ende alle die gheboden,

5

Ende hy heeft wech ghenomen wt alle die steden van Iuda die outaren ende tempels der afgoden, ende hy heeft gheregneert in vrede,

6

Ende hy heeft oock besloten steden ghetimmert in Iuda, want hy was gherust, ende in sijnen tijden en waren gheen orloghen opghestaen ouermidts dat die Heere vrede gaf,

7

⁺Ende hy seyde tot Iuda. Laet ons dese steden optimmeren ende die met mueren besluyten ende met torren sterc maken, ende met poorten ende sloten, die wijle dat al gherust is van orloghen, om dat wij ghesocht hebben den Heere onser vaderen Godt, ende dat hi ons vrede ghegheuen heeft, rontsomme, Hierom hebben sij ghetimmert ende daer en was gheen letsel int timmeren,

+ B

8

Ende Asa hadde in sijn heyr die scilden ende spiessen droeghen van Iuda drij hondert duysent, ende van Beniamin sciltdraghers, ende boochscutters twee hondert ende tachtentich duysent, ⁺alle dese waren seer stercke mannen,

+ C

9

Ende teghen hen is wtcomen Zara die Moriaen met sijn heyr, thienmael hondert duysent, ende drij hondert waghenen, ende hy is ghecomen tot Maresa,

10

maer Asa is hem teghen ghetrocken, ende hy heeft sijn heyr in oorden ghestelt int dal Sephatho, welck is by Maresa,

11

Ende hy heeft den Heere Godt aengheroepen ende gheseyt. Heere bi v en is gheen ondersceyt tsij oft ghy door lutttel volcks helpt oft door vele, Helpt ons Heere onse Godt, want in v ende in uwen naem betrouwen hebbende comen wy teghen dese menichte, Heere ghy sijt ons Godt, en laet gheenen mensch teghen v die ouerhant hebben,

12

⁺Hierom heeft die Heere die Morianen vervaert gemaect voor Asa ende Iuda, ende die Morianen sijn gheuloden,

+ D

13

Ende Asa heeftse veruolcht ende tvolck dat met hem was tot Gerara toe, ende die Morianen sijn gheuallen totten laetsten man toe, want sy sijn vernielt door den Heere diese versloech ende doort strijden van sijnen heyr Hierom hebben sij veel roofs wech ghedraghen,

14

Ende sij hebben alle die steden gheslagen rontsomme Gerara, Want eenen grooten grouwel hadden hen allen omvanghen, Ende sij hebben die steden berooft, ende grooten roof wech ghedraghen,

15

Ende ooc hebben sij ghebroken die scaepscoyen, ende hebben een ontellijcke menichte van scapen ende kemels ghenomen ende sij sijn weder comen in Ierusalem,