Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺INt achthienste iaer des conincs Ieroboam heeft gheregneert Abia ouer Iuda,

+ A

2

Drij iaren heeft hy gheregneert in Iherusalem, ende sijns moeders naem was Michaia Vriels dochter van Gabaa, ende twas orloghe tusschen Abiam ende Ieroboam,

3

Ende als Abia den strijt begonste ende hadde veertich duysent seer strijtbaer ende wtghelesender mannen, soo heeft Ieroboam daer teghen sijn heyr ghescict van tachtentich duysent mannen die oock wtghecoren waren, ende ter orloghen seer vroem,

4

Hierom heeft Abia ghestaen opden berch Semeron die in Ephraim was, ende hy heeft gheseyt. Hoort Ieroboam ende gheheel Israel.

5

En weet ghy niet dat die Heere die Godt van Israel Dauid ghegheuen heeft dat conincrijck ouer Israel inder eewicheyt, hem ende sijnen sonen tot een verbont des souts

6

⁺(Ende daer is opghestaen Ieroboam Nabats sone een knecht van Salomon Dauids sone ende hy heeft hem opghericht teghen sijnen Heere,

+ B

7

Ende tot hem sijn vergadert seer ydel mannen ende Belials kinderen, ende sij hebben die ouerhant ghecreghen teghen Roboam Salomons sone, Ende Roboam was ongheoeffent ende bloode van herten, ende

[p. *337]

hy en conde hen niet wederstaen)

8

Hierom segdy nv dat ghi machtich sijt te wederstaen den rijcke des Heeren, het welck hy besidt door Dauids sonen, ende ghy hebt een groote menichte van volcke, ende die gulden calueren die Ieroboam v ghemaect heeft voor goden.

9

Ende ghy hebt wech gheiaecht des Heeren priesters Aarons sonen ende die Leuiten, ende ghi hebt voor v lieden priesters ghemaect ghelijck alle die volcken der landen, Soo wie dat coemt ende sijn handen heylicht met eenen stiere vanden rinderen, ende met seuen rammen, die wort een priester der gheender die gheen goden en sijn,

10

Maer onse Heere is God, den welcken wij niet en verlaten, ende die priesters dienen den Heere van Aarons sonen, ende die Leuiten sijn in haer ordinancie,

11

Ende sij offeren den Heere brantofferanden tot elcken daghe, smorghens ende tsavonts, ende rueckwerck nae des Heeren ghebodt ghemaect, ende brooden worden voor ghestelt op die alder suyuerste tafel Ende bi ons is den gulden candelaer, ende sijn luchters dat die eewelijck souden ontsteken worden teghen den auont, want wij bewaren die gheboden van onsen Heere Godt, den welcken ghy verlaten hebt,

12

⁺Hierom is Godt die capiteyn in ons heyr, ende sijn priesters die met trompetten blasen, ende maken gheluyt teghen v lieden, kinderen van Israel en wilt niet strijden teghen den Heere uwer vaderen Godt, want dat en is v niet orbaerlijck,

+ C

13

Die wijle dat hy dese dinghen sprack, soo leyde Ieroboam listighe laghen van achter, Ende doen Iudas teghen sijn vianden stont, soo heeft hy Iudam niet wetende met sijn heyr omringhelt,

14

ende Iudas ommesiende heeft ghesien dat den strijt aenquam van teghen ouer ende van achter rugghe, ende hy heeft tot den Heere gheroepen, ende die priesters begonsten met die trompetten gheclanck te maken,

15

Ende alle die mannen van Iuda hebben gheroepen, ende siet doen si riepen so heeft die Heere Ieroboam veruaert ghemaect ende gheheel Israel, die teghen ouer Abia ende Iuda stonden,

16

Ende die kinderen van Israel sijn voor Iuda gheuloden, ende Godt heeftse in henlieden handen gheleuert,

17

⁺Hierom heeftse Abia ende sijn volc gheslaghen met een groote plaghe, ende daer isser wt Israhel ghewont nedergheuallen vijftich duysent vromer mannen,

+ D

18

Ende die kinderen van Israel sijn vernedert op dien tijt, ende die kinderen van Iuda sijn seer crachtelijcke versterct, om dat sij ghehoopt hadden inden Heere haerder vaderen Godt,

19

Ende Abia heeft Ieroboam vliedende veruolcht, ende hy heeft sijn steden inghenomen, Bethel ende haren dochteren, ende Iesana met haren dochteren, Ephron oock ende hare dochteren,

20

Ende Ieroboam en mocht niet meer wederstaen in die daghen van Abia, den welcken die Heere gheslaghen heeft ende is ghestoruen,

21

Aldus heeft Abia (doen sijn rijck versterct was) veerthien huysvrouwen ghenomen ende hy heeft tweentwintich sonen ghewonnen ende sesthien dochteren,

22

Maer datter meer is van die wooren van Abia ende van sijn weghen ende wercken die sijn seer naerstelijck ghescreuen int boeck van Addo den propheet.