Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺ENde als Roboams conincrijc versterct was ende machtich gheworden, soo heeft hy die wet des Heeren verlaten ende gheheel Israel met hem,

+ A

2

Ende int vijfste iaer van Roboams rijck soo is Sesac die coninc van Egipten opcomen in Ierusalem (want sij hadden den Heere ghesondicht)

3

met duysent ende twee hondert waghenen ende tsestich duysent ruyters te peerde, ende des ghemeynen volcs en was gheen ghetal dat met hen comen was wt Egipten, te weten Libianen, ende Troglodyten, ende Morianen,

4

Ende hy heeft inghenomen die alder vaste steden in Iuda ende hy is comen tot Ierusalem.

5

Ende Semeias die propheet is tot Roboam inghegaen ende tot die princen van Iuda die vergadert waren in Ierusalem vliedende van Sesac, ende hy heeft tot hen gheseyt. Dit seyt die Heere. Ghi hebt mi verlaten ende ick heb v verlaten, in die hant van Sesac,

6

⁺Ende die princen van Israel ende die coninck verslaghen wesende hebben gheseyt. Die Heere is rechtuerdich,

+ B

7

Ende doen die Heere sach dat sij verootmoedicht waren, so is dwoort des Heeren ghedaen tot Semeiam, seggende. Om dat sij verootmoedicht sijn, soo en sal ickse niet heel verderuen, ende ick sal hen een luttelken hulpen gheuen, ende mijn rasende gramscap en sal niet druypen op Ierusalem door Sesacs hant,

8

Maer nochtans sullen sij hem dienen, op dat sij weten moghen dondersceyt van mijnen dienst, ende des diensts van tconincrijck der aerden,

9

Hierom is Sesac die coninck van Egipten af ghetrocken van Ierusalem, hebbende wech ghenomen die tresooren van des Heeren huys ende des conincs huys, ende hy heuet al met hem ghedraghen, ende die gulden schilden die Salomon ghemaect hadde

10

waer voor die coninck ghemaect heeft metalen scilden, ⁺ende hy heeft die gheleuert den princen vanden sciltmannen, die tportael des pays bewaerden,

+ C

11

Ende als die coninck ghinck in des Heeren huys soo quamen die sciltmannen, ende namen die, ende droeghen die wederom in hen wapenhuys,

12

Maer nochtans om dat sij verootmoedicht sijn, soo is van hen ghekeert die gramscap des Heeren, ende sij en sijn niet heel te niet ghedaen, want in Iuda waren noch goede wercken gheuonden,

13

Aldus soo is die coninck Roboam versterct in Ierusalem, ende hy heeft gheregneert, Ende eenenveertich iaren was hy out doen hy begonste te regneren, ende seuenthien iaren heeft hi gheregneert in Ierusalem die stadt welck die Heere vercoren heeft dat hy sijnen naem daer vestighen soude, ⁺van alle die geslachten van Israel, ende sijns moeders naem was Naama een Ammanitersse,

+ D

14

Ende hy heeft quaet ghedaen, ende hy en heeft sijn herte niet bereydt dat hy den Heere soecken soude,

15

Maer die wercken van Roboam dierste ende die leste sijn ghescreuen in die boecken van Semeias den propheet, ende Addo den siender, ende naerstelijck wtgheleyt, ende Roboam, ende Ieroboam hebben teghen malcanderen gheorloocht tallen daghen,

16

Ende Roboam is met sijnen vaderen ontslapen ende begrauen in die stadt van Dauid, Ende Abia sijn sone heeft in sijn stede gheregneert.