Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺ENde Roboam es ghecomen in Ierusalem, ende heeft tsamen gheroepen alle thuys van Iuda ende Beniamin, hondert ende tachtentich duysent wtghelesen ende vechtender mannen dat hy teghen Israel strijden soude, ende sijn rijck tot hem keeren.

+ A

2

Ende dwoert des Heeren es ghedaen tot Semeiam den mensch Gods segghende,

3

Spreect tot Roboam Salomons sone den coninck van Iuda ende tot gheheel Israel die in Iuda es ende Beniamin.

4

Dit seyt die Heere, Ghy en sult niet op gaen noch vechten teghen v broederen. ⁺Een ieghelijck keere weder om in sijn huys, want dit es doer mijnen wille ghesciet. Die welcke als sij ghehoort hadden dwoert des Heeren sijn weder om ghekeert ende sij en sijn niet voorts ghetrocken teghen Ieroboam.

+ B

5

Ende Roboam heeft ghewoont in Ierusalem, ende hy heeft bemuerde steden ghetimmert in Iuda.

6

Ende hy heeft opghetimmert Bethlehem ende Etam, ende Thecue,

7

Bethsur ooc ende Socho, ende Odollam,

8

ende ooc mede Geth, ende Mareza ende Ziph,

9

ende ooc Aduram ende Lachis, ende Azeca

10

Garaa ooc ende Aialon, ende Hebron, die gelegen waren in Iuda ende Beniamin, seer vast besloten steden.

11

Ende als hi die met mueren besloten hadde soe heeft hy daer princen in ghestelt, ende schueren van spijsen, dat es van olie ende wijn.

12

Ende ooc in alle die steden besonder heeft hy ghemaect huysen der wapenen der scilden ende lancien, ende hy heeftse sterck ghemaect met seer groote naersticheyt, ende hy heeft heerscappie ghehadt ouer Iuda ende Beniamin.

13

⁺Maer die Priesteren ende Leuiten die in gheheel Israel waren, sijn tot hem comen van allen haren woonsteden

+ C

14

verlatende die voersteden ende hen besittingen

[p. *336]

ende ouercomende tot Iudam ende Ierusalem, om dat Ieroboam ende sijn nacomelinghen hen verworpen hadden dat sij tpriesterscap des Heeren niet bedienen en souden,

15

Die welcke heeft voor hem seluen ghestelt priesters der hoochden ende der duyuelen, ende der calueren die hy ghemaect hadde.

16

Maer oock van alle die gheslachten van Israel soo wie hen herte daer toe ghegheuen hadden dat sij soecken souden den Heere den Godt van Israel sijn te Ierusalem comen, om hen slachofferanden ten offer te dooden voor den Heere haerder vaderen Godt,

17

Ende sij hebben tconincrijck van Iuda versterct, ende Roboam Salomons sone gheuesticht drij iaren lanck, want sij hebben ghewandelt in Dauids ende Salomons weghen, alleen drij iaren.

18

⁺Ende Roboam heeft tot een huysvrouwe ghenomen Mahalath die dochter van Ierimoth Dauids sone, Ende Abihail ooc die dochter van Eliab des soons Isai,

+ D

19

die welcke hem heeft sonen ghebaert Ieus, ende Somoriam, ende Zoom,

20

Ende nae dese heeft hy oock ghenomen Maacha Absaloms dochter, die hem ghebaert heeft Abia, ende Ethai, ende Zisa, ende Salomith,

21

ende Roboam heeft Maacha Absaloms dochter ghemint bouen alle sijn huysvrouwen ende concubinen, want hy hadde achthien huysvrouwen ghetrouwt, ende tsestich concubinen, ende hy heeft ghewonnen achtentwintich sonen, ende tsestich dochteren,

22

Maer hy heeft int hooft ghestelt Abiam den sone van Maacha, eenen prince bouen alle sijn broeders, want hy dachte hem coninck te maken,

23

want hy was wijser ende machtigher bouen alle sijn sonen, ende in alle die palen van Iuda ende Beniamin, ende in alle die bemuerde steden, ende hy heeft hen ghelevert seer veel spijsen ende hy begheerde veel huysvrouwen.

[afbeelding]