Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ENde Roboam es ghereyst na Sychem, want daer was gheheel Israel tsamen comen, dat sij hem souden coninck maken.

+ A

2

Dwelck als Ieroboam Nabats sone ghehoort hadde, die in Egipten was, (Want hy was derwaerts gheuloden van Salomon) soe es hy terstont wederom comen.

3

Ende sij hebben hem gheroepen ende hy es comen met gheheel Israel, ende sij hebben tot Roboam ghesproken segghende,

4

V vader heeft ons met een seer swaer iock verdruct, ghebiet ghy lichter dinghen dan v vader die ons eenen swaren dienst opgheleyt heeft, ende verlicht een weynichsken van den last, dat wy v moghen dienen.

5

Die welcke heeft gheseyt, Nae dry daghen coemt weder om tot my. Ende doen tvolc wech ghegaen was,

6

soe heeft hy raet ghehouden metten ouders die ghestaen hadden voor sijnen vader Salomon, doen hy noch leefde, segghende, Wat raet gheefdi, dat ick den volcke antwoerde?

7

⁺Die welcke hebben hem geseyt, Eest dat ghi desen volcke belieft, ende dat ghy hen saluet met goedertieren woorden, soe sullen sij v dienen tot allen tijde.

+ B

8

Maer hy heeft den raet der ouderen verlaten, ende heeft begonst metten ionghers te handelen, die met hem opghevoet waren, ende waren in sijn gheselscap.

9

Ende hy heeft tot hen geseyt, Wat dunct v? oft wat moet ic antwoorden desen volcke dat my gheseyt heeft, Maect lichter het iock dat v vader ons opgheleydt heeft?

10

Ende sij hebben geantwoort als ionghers, ende met hem opghevoedt in weelden ende hebben geseyt, Aldus suldi seggen den volcke dat v gheseyt heeft, ⁺V vader heeft ons iock beswaert maect ghy dat lichter, ende aldus suldi hen antwoerden. Mijnen cleynsten vingher es dicker dan mijns vaders lendenen.

+ C

11

Mijn vader heeft v een swaer iock opgheleyt, ick sal daer noch meerder last toedoen. Mijn vader heeft v gheslaghen met gheesselen maer ic sal v slaen met scorpioenen.

12

Hier om es Ieroboam ende alle tvolck ghecomen tot Roboam op den derden dach, ghelijck hy hen beuolen hadde.

13

Ende die coninc heeft harde woorden gheantwoert achterlatende den raet der ouders,

14

ende hy heeft ghesproken nae der ionghers wille. Mijn vader heeft v een swaer iock opgheleydt, dwelck ick noch swaerder maken sal, mijn vader heeft v met gheesselen gheslaghen, maer ic sal v met scorpioenen slaen.

15

⁺Ende hy en heeft niet ghehoort nae des volck beden, want het was Gods wille om dat sijn woert soude volbracht worden, dat hy ghesproken hadde doer die hant van Ahias die Siloniter tot Ieroboam Nabats sone.

+ D

16

Maer alle tvolck (doen die coninck te harde woerden sprack) heeft alsoe gheseyt tot hem, Ons en es gheen deel in Dauid noch gheen erfdom in den sone van Isai. Keert wederom in v tabernakelen Israel, maer ghy Dauid voedt v huys. Ende Israel es wech ghegaen in sijn tabernakelen

17

maer ouer die kinderen van Israel die daer woonden in die steden van Iuda heeft Roboam gheregneert.

18

Ende die coninck Roboam heeft ghesonden Aduram die ouer die tribuyten was, ende die kinderen van Israel hebben hem ghesteent, ende hy es ghestoruen, Maer die coninck Roboam es haestelijck op eenen waghen ghegaen, ende es ghevloden in Ierusalem,

19

ende Israel es van Dauids huys ghesceyden tot op desen dach toe.