Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺ENde die coninghinne van Saba doen sij die fame ghehoort hadde van Salomon, is ghecomen, om dat sij hem proeuen soude met donckeren raetselen in Ierusalem, met groote rijcdommen ende kemelen die costelijcke specerien ende seer veel gouts droeghen ende costelicke ghesteenten. Ende als sij tot Salomon comen was soe heeft sij hem gheseyt al dat in haer herte was.

+ A

2

Ende Salomon heeft haer verclaert alle dat sij voer gheleyt hadde, ende daer en was niet, dat hy haer niet en verclaerde.

3

Ende nae dat sij ghesien hadde, te weten Salomons wijsheyt, ende thuys dat hy ghetimmert hadde,

4

ende daer toe oock die spijsen sijnder tafelen, ende die woonsteden sijnder knechten, ende die officien van sijnen dienaers, ende hen cleederen ende die scenckers oock ende hen cleederen, ende die slachofferanden die hy ten offer doodde in des Heeren huys soe en was van grooter verwonderinghen in haer voerts gheenen gheest meer.

5

Ende sij heeft tot den coninck gheseyt. ⁺Het woert dwelck ick ghehoort hadde in mijn lant van uwen duechden ende wijsheyt, is warachtich.

+ B

6

Ick en gheloofdes niet den ghenen diet vertellen, tot dat ick selue ghecomen ben, ende dat mijn ooghen ghesien hebben, ende beuonden dat my nauwelijcs die helicht van uwer wijsheyt vertelt en was, ghy hebt die fame te bouen ghegaen met uwen duechden,

7

Salich sijn v mannen, ende salich sijn v knechten, dese die by v staen tot allen tijde ende hooren v wijsheyt,

8

die Heere v Godt sij ghebenedijt, die v heeft willen setten op sijnen throon tot eenen coninck van den Heere uwen Godt.

Om dat Godt Israel lief heeft ende wilt hem bewaren inder eewicheyt daer om heeft hy v ouer hen coninck ghestelt, dat ghy rechte ordeelen ende rechtuerdicheyt doen soudt.

9

Ende sij heeft den coninck ghegheuen hondert ende twintich talenten gouts, ende costelijcke specerien seer veel bouen maten, ende seer costelijcke ghesteenten. Daer en waren sulcke costelijcke specerien niet gheweest, ghelijc dese welck die coninghinne van Saba Salomonem den coninck ghegheuen heeft.

10

⁺Maer oock Hirams knechten met Salomons knechten hebben gout van Ophir ghebracht, ende Thyinen houten, ende seer costelijcke ghesteenten.

+ C

11

Waer af dat die coninck ghemaect heeft, te weten van die thyinen houten, die trappen in des Heeren huys en in des conincs huys, ende ooc herpen ende Psalterien voor die sanghers. Noyt en waren int lant van Iuda alsulcken houten ghesien.

12

Maer die coninck Salomon heeft der coninghinnen van Saba ghegheuen al dat sij wilde ende dat sij begheerde, ende veel meer dat sij tot hem ghebracht hadde die welcke wederom keerende is wech ghereyst nae haer lant met haren knechten.

13

⁺Ende tghewicht des gouts dat tot Salomon gebracht worde, tallen iaren was ses hondert ende sessentsestich talenten gouts,

+ D

14

wtghenomen die somme welck die legaten van versceyden volcken, ende die coopluyden plaghen te brenghen, ende alle die coninghen van Arabien, ende die drossaten der landen, die gout ende siluer Salomon brachten.

15

Hier om heeft die coninck Salomon ghemaect tweehondert gulden spiessien, van die somme van tsestich gulden penninghen, die welcke aen elck spiesse verdaen worden.

16

Ende ooc drijhondert gulden scilden van drijhondert gulden penningen waer mede elcken scilt bedect worde. Ende die coninck heeft die gestelt in sijn wapenhuys dwelck al omme beplant was met een bosschagie,

17

ende die coninck heeft oock ghemaect eenen grooten yuooren throon ende hy heeft dien becleedt met den alder puersten goude,

18

⁺ende ses trappen waer mede men opginc totten throon ende een gulden voet bancsken ende twee armkens aen beyde die sijden teghen malcanderen, ende twee leuwen staende by die armkens.

+ E

19

Ende noch ander twaelf leuwkens staende op die ses graden van beyde die sijden daer en was sulcken throon niet in alle die conincrijcken.

[p. *335]

20

Ende alle die vaten van des conincs maeltijt waren gulden, ende die vaten des huys van Libanus wout, waren vanden puersten goude. Want tsiluer werde in dien tijden voor niet gheacht.

21

Want des conincs scepen reysden tot Tharsis met Hirams knechten eens te drij iaren, ende sij brachten van daer gout ende siluer, ende yuoor, ende simmen, ende pauwen.

22

Hier om es Salomon groot gheworden bouen alle coninghen des aertrijcks van rijcdommen ende glorien.

23

Ende alle die coninghen der landen begheerden te sien Salomons aensicht, ⁺om te hooren die wijsheyt welck die Heere ghegheuen hadde in sijn herte.

+ F

24

Ende sij brachten hem ghiften, gulden ende silueren vaten, ende cleederen, ende wapenen, ende specerien, peerden ende muylen telcken iaren.

25

Ende Salomon hadde oock veerthien duysent peerden in stallen, ende waghenen ende rosvolc twaelf duysent, ende hy heeft die ghestelt in die steden der waghenen, ende daer die coninck was in Ierusalem.

26

Ende hy heeft oock macht ghebruyct ouer alle die coninghen, vander vloet Euphrates tot der Philistijnen lant, ende tot aen die palen van Egypten.

27

⁺Ende hy heeft soe grooten menichte van siluer gheleuert in Ierusalem al oft steenen gheweest hadden, ende der cederboomen soe grooten menichte, ghelijck der wilder vijchboomen die in die veltachtighe landen wassen.

+ G

28

Ende hem worden peerden ghebracht wt Egypten ende van allen lantscappen,

29

Maer die ander wercken van Salomon dierste ende die laetste sijn ghescreuen in die woerden van Nathan den propheet, ende in die boecken van Ahia die Siloniter. Ende oock in dat visioen van Addo den siender teghen Ieroboam Nabats sone.

30

Ende Salomon heeft gheregneert in Ierusalem, ouer gheheel Israel, veertich iaren.

31

Ende hy es ontslapen met sijnen vaderen, ende sij heben hem begrauen in Dauids stadt, ende Roboam sijn sone heeft geregneert voor hem.