Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺ENde doen verloopen waren twintich iaren nae dat Salomon des Heeren huys ghetimmert hadde, ende sijn huys,

+ A

2

soe heeft hy opghetimmert die steden welck Hyram Salomon ghegheuen hadde, ende hy heeft daer doen woonen die kinderen van Israel.

3

Ende hy es ooc ghereyst in Emath Suba ende heeft die vercreghen.

4

Ende hy heeft ghetimmert Palmiram in die woestijne, ende ander

[p. *334]

seer stercke steden heeft hy ghetimmert in Emath.

5

Ende hy heeft ghetimmert hooch Bethoron ende neder Bethoron, bemuerde steden hebbende poorten, grendelen, ende sloten,

6

Balaath oock ende alle die stercste steden die Salomons waren, ende alle die steden der waghenen, ende die steden der ruyters te peerde. Alle dat Salomon heeft ghewilt ende voorghenomen, heeft hy getimmert in Ierusalem, ende in Libano, ende in alle dlant van sijnder heerlijcheyt.

7

⁺Alle tvolck datter ouer bleuen was vanden Hetheen, ende Amorrheen, ende Pherezeen, ende Heveen, ende Iebuseen, die van Israels geslachte niet en waren,

+ B

8

van haren sonen, ende vanden nacomelinghen die welcke die kinderen van Israel niet ghedoot en hadden, heeft Salomon tonder bracht dat sij tribuyt gauen, tot op desen dach toe.

9

Maer vanden kinderen van Israel en heeft hy gheen ghestelt dat sij in des coninck wercken dienen souden, want sij waren vechtende mannen, ende dierste hooftmannen ende princen van sijnen waghenen ende ruyters te peerde.

10

Ende alle die princen van des conincs Salomons heyr waren tweehondert vijftich, die tvolck leerden.

11

Ende Pharaos dochter heeft hy ouer geuoert wt Dauids stadt, int huys dat hy haer ghemaect hadde. ⁺Want die connick seyde, Mijn huysvrouw en sal niet woonen in Dauids des conincs van Israels huys, om dat dit gheheylicht es, want die arcke des Heren es daer in ghegaen.

+ C

12

Doen offerde Salomon brantofferandenden den Heere, op des Heeren outaer, den welcken hy op ghericht hadde voor dat poortael,

13

om datmen tallen daghen daer op offeren soude nae tghebodt van Moyses, in die Sabbathen ende nieuwe maenden, ende in die feestdaghen drijmael tsiaers, dat es op den feestdach der ongheheefder brooden, ende op dat hoochtijt der weken, ende opdat hoochtijt der tabernakelen.

14

Ende hy heeft ghestelt nae Dauids sijns vaders ordinancie der priesters officien in haren diensten, ende die Leuiten in haer ordinancie, om dat sij louen souden ende dienen voor die priesteren nae die ghewoonlijcke behoorte van elcken daghe besonder, ende die doerwachters in hen deylingen na poerten ende poerten. Want also hadde Dauid die mensche Gods beuolen.

15

⁺Ende sij en hebben niet ouertreden van des conincs gheboden, soe wel die priesters als die Leuiten van alle dat hy beuolen hadde ende in die bewaringhen der scatten.

+ D

16

Alle die costen hadde Salomon bereydt van dien daghe dat hy gefundeert heeft thuys des Heeren, tot opden dach dat hijt volmaect heeft.

17

Doen ghinck Salomon te Asiongaber ende te Ailath aen den oeuer vanden rooder zee, welck es in dlandt van Edom.

18

Ende Hiram sandt hem door sijnder knechten handen scepen ende sceepluyden, die hen der zee verstonden, ende sij sijn wech gheuaren met Salomons knechten nae Ophir. Ende sij hebben van daer genomen vierhondert ende vijftich talenten gouts, ende hebben dat ghebrocht tot den coninck Salomon.