Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺ENde doen Salomon ophielt van bidden, soe isser een vier vanden hemel comen, ende dat heeft verslint die brantofferanden ende slachofferanden ende die maiesteyt des Heeren heeft dat huys veruult.

+ A

2

Ende die Priesters en mochten in des Heeren tempel niet gaen, om dat die maiesteyt des Heeren veruult hadde den tempel des Heeren.

3

Maer oock alle die kinderen van Israel saghen dat vier nederdalen ende die glorie des Heeren op dat huys, ende tsamen nederuallende plat ter aerden opt pauiment met steenen beleyt, hebben sij aenghebeden ende gheloeft den Heere. Dat hy goet is dat inder eewicheyt sijn bermherticheyt blijft.

4

Ende die coninck ende alle tvolck offerden slach offeranden voor den Heere.

5

Aldus heeft die coninck Salomon ghedoot tot slachofferanden tweentwintich duysent ossen, hondert ende twintich duysent rammen, ende die coninck ende alle tvolck hebben dat huys Gods ghewijt.

6

Maer die priesteren stonden in hen officien, ende die Leuiten met die instrumenten van des Heeren lofsanghen, die welcke Dauid die coninck ghemaeckt heeft om den Heere te louen. ⁺Want inder eewicheyt is sijn bermherticheyt, spelende Dauids lofsanghen met haren handen.

Maer die priesters speelden met trompetten voor hen, ende gheheel Israel stont. Ende

+ B

7

Salomon heeft oock gheheylicht het midden des voorhoofs, voor des Heeren tempel. Want hy hadde daer geoffert die heel branofferanden ende die vetten des ingewants vander vreedt offeranden. Want den metalen outaer die hi ghemaeckt hadde en mocht niet verdragen die brant offeranden, ende die sacrificien ende die vetten des ingewants.

8

Hier om heeft Salomon ghemaect een feeste in dien tijden seuen daghen lanck, ende gheheel Israel met hem, een seer groote vergaderinghe, vanden inganck van Emath, tot aen die beke van Egypten.

9

Ende hy heeft op den achtsten dach ghehouden een vergaderinghe des volcs om dat hy den outaer ghewijt hadde seuen daghen lanck, ende dat hy die feeste gheuiert hadde seuen daghen.

10

Aldus opden drijentwintichsten dach van der seuenster maent heeft hy dat volck laten gaen tot hen tabernakelen blijscap ende vruecht makende, van dat goet het welc die Heere ghedaen hadde Dauid ende Salomon ende Israel sijnen volcke.

11

Ende Salomon heeft dat huys des Heeren volmaect, ende des conincs huys, ende al dat hy voerghenomen hadde in sijn herte, dat hy doen soude in des Heeren huys, ende in sijn huys, ende hy is voerspoedich gheweest.

12

Ende die Heere heeft hem gheopenbaert des nachts ende gheseyt, ⁺Ick heb v ghebedt ghehoort ende ick heb dese plaetse vercoren voor my tot een huys der sacrificien.

+ C

13

Eest sake dat ick den hemel sluyte, ende datter ghenen reghen en vloeyt ende dat ick beuele ende ghebiede den sprinchanen dat sij dlant verslinden, ende dat ick die pestilencie sende in mijn volck.

14

Ende dat mijn volck bekeert sijnde (ouer die welcke mijn naem aengheroepen is) my biddet, ende versoect mijn aensicht, ende doet penitencie van haren seer quaden weghen, soe sal ict verhooren vanden hemel, ende sal ghenadich wesen haren sonden, ende ghenesen hen lant.

15

Ende mijn ooghen sullen ooc open sijn, ende mijn ooren opghericht tot sijn ghebedt die in dese plaetse bidden sal.

16

Want ick heb vercoren ende gheheylicht dese plaetse, om dat mijnen naem daer wesen soude inder eewicheyt, ende dat mijn ooghen ende mijn herte daer blijuen souden tot allen daghen.

17

⁺Ende ghy oock eest dat ghy voor my wandelt ghelijc ghewandelt heeft Dauid v vader, ende dat ghy doet nae alle dat ick v gheboden hebbe, ende dat ghy mijn gherechticheden ende ordeelen onderhoudt,

+ D

18

soe sal ick verwecken den throon ws conincrijcs, ghelijck ick ghelooft hebbe Dauid uwen vader, seggende, Daer en sal van uwen gheslachte gheen man ghebreken die een prince sij ouer Israel.

19

Maer eest dat ghi lieden afghekeert wort, ende dat ghy mijn rechtueerdicheden verlaet, ende mijn gheboden die ick v voergheleyt hebbe, ende dat ghy afgaende dient den vreemden goden ende hen aenbiddet,

20

soe sal ick v wtroyen wt mijn lant het welck ick v ghegheuen hebbe, ende dit huys dat ick gheheylicht hebbe mijnen naem sal ick van mijn aensicht worpen, ende ick sal dat leueren tot een parabele, ende tot een exempel alle den volcken,

21

Ende dit huys sal wesen tot een ghemeyn segghen, alle den voorbigaenden, ende sij sullen segghen seer verwondert sijnde. Waer om heeft die Heere desen lande ende desen huyse aldus ghedaen?

22

Ende sij sullen antwoorden. Om dat sij verlaten hebben den Heere haerder vaderen Godt, die hen gheleyt heeft wt dlant van Egypten, ende hebben vreemde goden aenghenomen, ende die aenghebeden ende ghedient, daer om sijn alle dese quade dinghen ouer hen comen.