Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺DOen seyde Salomon, Die Heere heeft belooft dat hy soude woonen in die duysterheyt,

+ A

2

ende ick hebbe een huys ghetimmert sijnen name, dat hy daer woonen soude inder eewicheyt.

3

Ende die coninck heeft sijn aensicht omme ghekeert, ende heeft alle die menichte van Israel ghebenedijt, (Want alle die scare stont naerstelijck toehoorende) ende hy heeft gheseyt,

4

Ghebenedijt is die Heere die Godt van Israel, die metten wercken volbracht heeft tghene dat hy Dauid mijnen vader ghesproken heeft, segghende,

5

Van den dach dat ick mijn volck gheleyt hebbe wt dat lant van Egypten en heb ik gheen stadt ghecosen van allen die gheslachten van Israel dat daer in ghetimmert soude worden een huys mijnen naem, noch ic en heb gheenen anderen man ghecoren dat hy soude sijn een vorst onder mijn volck Israel.

6

Maer ick heb Ierusalem vercoren dat mijnen naem daer inne soude wesen, ⁺ende ick heb Dauid ghecoren dat ick hem stellen souden ouer mijn volck Israel.

+ B

7

Ende doent gheweest hadde Dauids mijns vaders wille, dat hy timmeren soude een huys den naem des Heeren des Gods van Israel,

8

soe heeft die Heere tot hem gheseyt, Want dit uwen wille gheweest is dat ghy timmeren soude een huys mijnen naem, dat hebdi voerwaer wel ghedaen sulcken wille te hebben,

9

maer ghy en sult dat huys niet timmeren, maer nochtans v sone die wt uwen lendenen comen sal, die sal een huys mijnen naem timmeren.

10

Hier om heeft die Heere sijn woort volbrocht dat hy ghesproken hadde ende

[p. *332]

ick ben op ghestaen voor Dauid mijnen vader, ende ick heb gheseten op den throon van Israel, ghelijck die Heere ghesproken heeft, ende ic heb een huys ghetimmert den naem des Heeren des Gods van Israel,

11

ende ic heb daer in ghestelt die arcke daer dat verbont des Heeren in is dwelck hy ghemaect heeft met die kinderen van Israel.

12

Hier om heeft hy ghestaen voor des Heeren outaer teghen ouer die gheheele menichte van Israel, ende hi heeft sijn handen wtghereyct.

13

Want tes waer dat Salomon hadde ghemaect een metalen basement ende hy hadde dat ghestelt int midden van den tempel, hebbende vijf cubitus in die lengde, ende vijf cubitus in die breydde, ende drij cubitus in die hoochde, ende hy stont daer op, ende daer nae heeft hy met gheboochden knyen tegen die gheheel menichte van Israel, ende met sijn handen ten hemel opghehauen gheseyt.

14

⁺Heere Godt van Israel daer en is ws ghelijck gheen Godt inden hemel ende in die eerde, die bewaert tverbont ende die bermherticheyt met uwen dienaren, die voor v wandelen met allen hen herte.

+ C

15

Die ghegheuen hebt uwen dienaer Dauid mijnen vader alle dat ghy hem ghesproken hadt, ende dat ghy metten monde ghelooft hadt, dat hebdi metten wercken volbracht, ghelijck den teghenwoerdighen tijt bewijst,

16

Nu dan hier om Heere Godt van Israel, volbrengt uwen dienaer mijnen vader Dauid al dat ghy ghesproken hebt segghende, Daer en sal wt v ghenen man ghebreken voor my die sitte op den throon van Israel, alsoe nochtans eest dat v sonen mijn weghen bewaren, ende dat sij wandelen in mijn wet ghelijck ghy ghewandelt hebt voor my.

17

Ende nu Heere Godt van Israel laet v woert vast ghemaect worden dat ghy ghesproken hebt uwen dienaer Dauid.

18

Eest daer om oock ghelooflijck dat Godt met den menschen woonen soude opder aerden? Eest dat den hemel ende die hemelen der hemelen v niet en begrypen, Hoe veel te meer dit huys dwelck ick ghetimmert hebbe?

19

Maer daer toe eest alleenlijck ghemaect, dat ghy tghebedt ws dienaers soudt aensien, ende sijn ootmoedighe begheerte o Heere mijn Godt, ende dat ghy verhooren soudt die ghebeden die v dienaer ghestort heeft voor v,

20

⁺dat ghy v ooghen soudt open doen op dit huys by daghen ende nachten, op die plaetse daer in ghy beloeft hebt dat uwen naem soude aen gheroepen worden, ende soudt verhooren tghebet dwelck v dienaer daer in biddet,

+ D

21

ende dat ghy verhooren soudt die ghebeden ws dienaers, ende ws volcs van Israel. Soe wie biddet in dese plaetse, verhoort dat van uwer woonstede, dat is vanden hemelen, ende weest ghenadich.

22

Eest datter iemant ghesondicht sal hebben teghen sijnen naesten, ende dat hy ghecomen is bereedt teghen hem te sweeren, ende dat hy hem seluen met een maledictie verbint voor den outaer in dit huys,

23

ghy sult dat hooren vanden hemel, ende sult recht ordeel uwen dienaren doen, alsoe dat ghy den boosen wederloont sijnen wech op sijn eyghen hooft, ende dat ghy den rechtuerdighen wreket, gheuende hem nae sijn rechtuerdicheyt.

24

Eest dat v volck van Israel sal verwonnen sijn, vanden vianden, (want sij sullen teghen v sondigen) ende dat sij bekeert sijnde, penitencie doen, ende ootmoedelijck bidden uwen naem ende dat sij ghebeden sulen hebben in dese plaetse,

25

soe suldi dat verhooren vanden hemel, ende weest ghenadich der sonden ws volcs Israel, ende brengtse wederom int lant dat ghy hen ghegheuen hebt ende haren vaderen.

26

⁺Eest dat den hemel ghesloten sijnde ghee nen reghen en vloeyt om die sonden des volcs, ende dat sij v bidden in dese plaetse, ende belijden uwen naem, ende bekeert sullen sijn van haren sonden, als ghy hen verdriet sult aenghedaen hebben,

+ E

27

soe verhoort vanden hemel Heere, ende vergheeft die sonden uwen dienaren, ende ws volcs Israel ende leert hen den goeden wech daer sij uoer gaen moghen, ende gheeft reghen den lande het welck ghy uwen volck ghegheuen hebt om te besitten.

28

Eest sake datter hongher opghestaen sal sijn int lant ende die pestilencie ende versenctheyt ende verdroochtheyt des corens, ende sprenchanen ende cruyt wormen, ende dat die vianden die landen verdoruen hebbende der stadt poorten omleyt sullen hebben, ende dat hen alderhande plaghe, ende siecte benauwen sal,

29

eest sake dat iemant van uwen volck van Israel bidden sal, bekennende sijn plaghe ende siecte, ende dat hy sijn handen wtreyct in dit huys,

30

ghy sult dat verhooren vanden hemel, te weten van uwer hoogher woonstede, ende weest ghenadich, ende gheeft eenen ieghelijcken weder om nae sijn weghen, die welcke ghy kent dat hy heeft in sijn herte (want ghy alleen kent die herten van die kinderen der menschen)

31

⁺Op dat sij v vresen ende wandelen in v weghen alle die daghen die sij leuen opt aensicht des lants dwelck ghy onsen vaderen ghegheuen hebt.

+ F

32

Ende den wtlander, die van uwen volck Israel niet en is, eest sake dat hy coemt van verren lande om uwen grooten naem ende om v machtighe hant, ende uwen wtghestrecten arm, ende dat hy aenbidt in dese plaetse

33

dien sult ghi verhooren, van den hemel uwe alder vaste wooninghe, ende sullet al doen daer om dat v aenroepen sal die vremdelinck, op dat alle die volcken des lants moghen kennen uwen naem ende v vreesen ghelijc v volck van Israel, ende dat sij weten moghen dat uwen naem aengheroepen is op dit huys dat ic ghetimmert hebbe.

34

Eest dat v volck sal wtghegaen sijn ter orloghen, teghen hen vianden door den wech daer ghy hen in sult ghesonden hebben, soe sullen sij v aenbidden teghen den wech daer dese stadt in is, die welcke ghy vercoren hebt, ende thuys dat ick ghetimmert hebbe uwen naem,

35

ghy sult verhooren vanden hemel hen ghebeden, ende hen ootmoedeghe begheerte, ende doet wrake.

36

⁺Maer eest dat sij teghen v sondighen (want daer en is gheen mensch die niet en sondicht) ende dat ghy op hem sult ghestoort sijn, ende dat ghy hen den vianden gheleuert sult hebben, ende dat sij hen ghevanghen gheleyt sullen hebben in verren landen, oft seker in een lant dat bi is,

+ G

37

ende dat sij bekeert sijnde met hen herte, int lant daer sij gheuangen in gheleyt waren penitencie doen, ende sij v bidden in dlant van haerder gheuangenissen, segghende, Wy hebben ghesondicht wy hebben booselijck ghedaen, ende onrechtuaerdelijck gheleeft,

38

ende dat sij tot v bekeert worden met allen hen herte, ende in allen hen ziele, int lant van haerder ghevanghenissen daer sij in gheleyt sijn, soe sullen sij v aenbidden tegen de wech haers lants, dwelc ghy haren vaderen ghegeuen hebt, ende der stadt die ghi vercoren hebt, ende des huys dat ic ghetimmert hebbe uwen naem,

39

ghy sult verhooren vanden hemel, dat is van v vaste wooninghe in hen ghebeden, ende doet hen recht

[p. *333]

ordeel ende vergheuet uwen volcke, hoe wel dattet sondich is.

40

Want ghy sijt mijn Godt laet v ooghen (bid ick u) gheopent worden, ende laet v ooren toe luysterende sijn tot den ghebede dat in dese plaetse ghedaen wort.

41

Hier om nu staet op Heere Godt in uwer rusten, ghy ende die arcke uwer stercheyt. V priesteren o Heere Godt laet ghecleedt worden met salicheyt, ende laet v heyleghen hen verblijden in die goeden.

42

Heere Godt en wilt niet versmaden het aensicht van uwen ghesalfden weest ghedachtich der bermherticheden ws dienaers Dauid.

[afbeelding]