Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺ALdus heeft Salomon inghebracht alle die dinghen die Dauid sijn vader ghelooft hadde, gout silver ende alle die gheretscappen heeft hy gheleyt in die scatten van des Heeren huys,

+ A

2

Waer nae heeft hy vergadert die ouders van Israel, ende alle die princen der gheslachten, ende die hoofden der familien vanden kinderen van Israel in Ierusalem, dat sij halen souden die arcke van des Heeren verbont wt Dauids stadt, welck is Sion.

3

Hier om sijn tot den coninck ghecomen alle die mannen van Israel op den hooghen feestdach der seuenster maent.

4

Ende als alle die ouders van Israel ghecomen waren soe hebben die Leuiten die arcke ghedraghen,

5

ende sij hebben die in ghebracht, ende alle die ghereetscappe des tabernakels. Maer die ghereetscappen van die sanctuarie die int tabernakel waren hebben ghedraghen die Priesters metten Leuiten.

6

Ende die coninck Salomon ende alle die vergaderinghe van Israel, ⁺ende alle die vergadert waren voor die arcke doodden ten offer rammen ende rinderen, sonder eenich ghetal, soe groot was die menichte der slachofferanden.

+ B

7

Ende die priesters des Heeren hebben die arcke van des Heeren verbont ghedraghen in haer plaetse, dat is tot dat oratorie, int heylich der heyleghen tot onder die vloghelen van die Cherubims,

8

alsoe dat die Cherubims hen vloghelen wtspreyden ouer die plaetse daer die arcke in ghestelt was, ende dat sij die arcke bedecten met haren hantboomen.

9

Maer die hoofden der hantboomen daer die arcke mede ghedraghen worde om dat die een weynich langher waren sachmen voor dat oratorie. Maer als iemant een luttelken buyten waerts was soe en mocht hy die niet sien. Aldus heeft die arcke daer gheweest tot opden teghenwoerdighen dag toe.

10

Ende daer en was anders niet in die arcke dan die twee tafelen, ⁺die Moyses daer in gheleyt hadde te Horeb, doen die Heere den kinderen van Israel die wet gaf, doen sij wt Egypten ghinghen.

+ C

11

Ende als die Priesters wt die sanctuarie gheghaen waren, (Want alle die Priesters diemen daer vinden mocht, sijn gheheylicht, ende in dien tijden en waren hun buerten der tijden, ende die ordinancie der diensten onder hen noch niet bedeylt)

12

soe maecten tsamen groot gheleyt soe wel die Leuiten, als die sanghers, dat is oock die onder Asaph waren, ende die onder Heman, ende die onder Idithum waren, hen sonen ende broederen ghecleedt met edelen witten lijnen cleederen, met cimbalen ende Psalterien ende herpen, staende aen die oost sijde des outaers, ende met hen die Priesters hondert ende twintich, singhende met tromppetten.

13

Aldus doen sij al te samen met trompetten ende stemmen, ende cimbalen, ende orghelen ende met versceyden instrumenten der musikers tsamen songhen ende hen stemmen int hooghe hieuen, ⁺soe worde tgheluyt verre ghehoort, alsoe dat soe wanneer sij begonsten den Heere te louen ende te segghen. Belijdt den Heere want hy is goet, want inder eewicheyt is sijn bermherticheyt, soe werde dat huys Gods veruult met een wolcke,

+ D

14

dat die Priesteren niet en mochten staen ende dienen om die duysterheyt wille. Want die glorie des Heeren hadde dat huys Gods veruult.

[afbeelding]