Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ENde hy heeft oock ghemaect den metalen outaer van twintich cubitus in die lengde, ende twintich cubitus van breydden ende thien cubitus van hoochden.

+ A

2

Ende oock een ghegoten see van thien cubitus van den eenen boort tot den anderen al omme ront, het hadde vijf cubitus van hoochden, ende een seelken van dertich cubitus ghinck al omme sijn rontheyt.

3

Ende een ghelijckenisse van ossen was daer onder, ende eenderhande wtcomende ghesneden wercken van thien cubitus, als met twee keeren ghinghen om den buyck der zee.

4

Maer die ossen waren ghegoten, ende die zee was bouen op twaelf ossen ghestelt, waer af die drye saghen noortwaerts, ende die andere drije westwaerts, ende voorts die ander drije suytwaerts, ende die ander drije oost waert, hebbende die zee op hen ghestelt, ende die achterste vanden ossen waren binnenwaerts onder die zee,

5

ende sijn dicte hadden die mate van een palme, ende sijnen boort was ghelijck den boort van eenen kelck oft van een ontploken lelie, ende hy hiel drij duysent metreten.

6

⁺Ende hy heeft oock thien beckens ghemaect, ende hy heeft die vijue ghestelt ter rechter sijden ende vijue ter slincker sijden, dat sij daer in wasschen souden alle dat sij souden offeren tot eenen heelen brant offer. Maer in die zee worden die Priesters ghewasschen.

+ B

7

Ende hy heeft oock thien gulden candelaren ghemaect na die ghedaente soe hy die hadde doen maken, ende hy heeft die inden tempel ghestelt vijf ter rechter sijden, ende vijf ter slincker.

8

Ende oock thien tafelen, ende hy heeft die inden tempel ghestelt vijue ter rechter sijden, ende vijue ter slincker sijden, ende oock hondert gouden schalen.

9

Hy heeft oock ghemaect dat voorhoof der Priesteren ende een groote ghemeyn voor plaetse, ende doeren aen die groote ghemeyn voor plaetse, die welcke hy met metale ouerdect heeft.

10

Maer die zee heeft hy ghestelt op die rechte sijde teghent oosten aen den suyden.

11

⁺Ende Hyram heeft ghemaect metalen potten ende vleesch crauwelen en scalen ende hy heeft alle des conincs werck volmaect int huys Gods.

+ C

12

Dat is twee columnem ende die capiteelkens, ende die hoofden, ende ghelijck eender hande nettekens welck die hoofden bedecken souden op die capiteelen.

13

Ende oock vier hondert granaet appelen, ende twee nettekens, alsoe dat die twee rijen der granaet appelen aen elck netteken besonder souden gheuoecht worden, welck die capiteelen ouerdecten, ende die hoofden der columnen.

14

Hy heeeft oock basementen ende beckens ghemaect, welck hy op die basementen ghestelt heeft,

15

een zee, ende twaelf ossen onder die zee,

16

ende potten ende vleesch crauwels ende scalen. Alle die ghereetscappen heeft voor Salomon ghemaect Hyram sijn vader, in des Heeren Huys van-

[p. *331]

den alder puersten goude.

17

In die landouwe der Iordanen heeft die coninck dese ghegoten in cley aerde, tusschen Sochot ende Saredatha.

18

Ende die menichte der ghereetscappen was ontellijck, alsoe dat tgewicht des metaels onbekent was.

19

Ende Salomon heeft alle die ghereetscappen van dat huys Gods ghemaect, ende den gulden outaer, ende die tafelen ende daer op die brooden der voerlegghinghen.

20

Die candelaers oock met haren luchters dat sij lichten souden voor dat oratorie nae die behoorte vanden puersten goude,

21

ende sommighe bloemwercken, ende lichters, ende gulden scaerkens alle dese sijn vanden fijnsten ghoude ghemaect.

21

Ende oock vaten des costelijcken ruecwercs, ende wieroock vaten, ende scalen, ende mortierkens vanden fijnsten goude. Ende hy heeft die doeren ghesneden van den binnensten tempel, dat is in theylich der heyleghen, ende die doeren des tempels waren van buyten, gulden. Ende alsoe es volmaect alle dwerck dat Salomon ghemaect heeft in des Heeren huys.