Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺ENde Salomon heeft begonst des Heeren huys te timmeren in Ierusalem op den berch Moria, die Dauid sijnen vader ghetoont was ter plaetsen die hy dien huyse bereyt hadde inden dorsch vloer van Ornan den Iebuseiter.

+ A

2

Ende hy heeft begonnen te timmeren in die tweede maent int vierde iaer van sijnen rijcke.

3

Ende dit sijn die fundamenten die Salomon gheleyt heeft om te timmeren dat huys Gods. In dierste mate der lengden van sestich cubitus, ende der breydden van twintich cubitus,

4

Maer het portael voor die vorste sijde die welcke wtghestrect was in die lengde nae die mate van des huys breydde, was van twintich cubitus, voerts was die hoochde van hondert ende twintich cubitus, ende hy heeft dat vergult van binnen met dalder puerste gout.

5

Ende het meeste huys heeft hy ghescut met met houten berderen van abeel boomen, ende platen van fijnen gouden heeft hy daer aen vast gheslaghen ouer al, ⁺ende hy heeft daer in ghesneden palmboomen, ende ghelijck ketenkens malcanderen omuanghende.

+ B

6

Hy heeft oock tpauiment des tempels beleyt met seer costelijcke marmor steenen, met grooter cierlijcheyt.

7

Ende tgout was dalder fijnste van welcks platen hy het huys beleyt heeft, ende sijn balcken, ende die stijlen, ende mueren ende die doeren, ende hy heeft Cherubims ghesneden in die wanden.

8

Ende hy heeft oock ghemaect thuys van dalder heylichste wooninghe der heyleghen, die lengde was, nae die breydde des huys, van twintich cubitus, ende die breydde desghelijcs van twintich cubitus, ende hy heeft dat met gulden platen ouerdect, van omtrent ses hondert talenten.

9

Ende hy heeft oock gulden nagelen ghemaect alsoe dat elcken naghel besonder vijftich siclen woech, ende die eedt cameren heeft hy oock met goude bedect.

10

⁺Ende hy heeft oock int huys van theylich der heylighen ghemaect twee Cherubims, nae beeltsnyders werck ende hy heeft die met goude ouerdect.

+ C

11

Die vloghelen der Cherubims waren twintich cubitus lanck wtghestrect, alsoe dat den eenen vloghel hadde vijf cubitus, ende raecte den want des huys, ende den anderen hebbende oock vijf cubitus raecte den vloghel vanden anderen Cherub.

12

Desghelijcs des anderen Cherubs vloghele hadde vijf cubitus ende raecte den want, ende sijnen anderen vloghel van vijf cubitus raecte den vloghel vanden anderen Cherub.

13

Aldus waren die vloghelen van beyde die Cherubims wtghestrect, ende waren wtghespannen tot twintich cubitus, ende sij stonden met opgherechte voeten, ende hen aensichten waren ghekeert tot dat buytenste huys.

14

Ende hy heeft oock een voor hancsel ghemaect van hemelsblau sijde ende purper ende roode zijde ende van wit edel lijnwaet, ⁺ende hy heeft daer in ghewrocht Cherubims.

+ D

15

Ende oock voor die doeren des tempels twee columnen die welcke hadden vijfendertich cubitus in die hoochde, ende haer hoofden waren van vijf cubitus.

16

Ende oock mede ghelijck ketenkens in dat oratorie, ende hy heeft die ghestelt op die hoofden der columnen, ende oock hondert granaet appelen, die welcke hy heeft tusschen die ketenkens ghestelt.

17

Ende die columnen heeft hy ghestelt in dat portael des tempels, die eene ter rechter sijden, ende dander ter slincker, die ghenen die ter rechter sijden was noemde hy Iachin, ende die ter slincker sijden was Booz.