Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺ENde Salomon nam vast voor hem te timmeren een huys des Heeren naem, ende een palays voor hem seluen.

+ A

2

Ende hy heeft ghestelt tseuentich duysent mannen metten scouderen draghende, ende tachtentich duysent die steenen houwen souden in die gheberchten, ende haerlieder ouersten drij duysent, ende ses hondert.

3

Ende hy heeft oock ghesonden tot Hyram den coninck van Tiro segghende, Ghelijck ghy ghedaen hebt met Dauid mijnen vader, ende hebt hem ghesonden cederen houten, dat hy sij seluen een huys timmeren soude, daer hy oock in ghewoont heeft, alsoe doet oock met my

4

dat ick mach timmeren een huys den naeme van den Heere mijnen Godt, dat ick dat mach heyleghen om welriekende offeranden te ontsteken voor hem, ende om specerien te doen rooken, ende een eewighe voorlegghinge der brooden, ende tot heelbrantofferanden des smorghens ende des auonts, ende op die sabboths daghen oock ende op die nieuwe maenden ende in die feesten van den Heere onsen Godt inder eewicheyt. Die welcke Israel beuolen sijn.

5

⁺Want het huys dat ic begheer te timmeren es groot, aenghesien dat ons Godt groot es bouen alle goden.

+ B

6

Daer om wie sal machtich ghenoech moghen sijn dat hy hem een weerdich huys sal maken? eest dat den hemel ende die hemelen der hemelen hem niet en connen begrijpen, hoe groot ben ick dat ick hem soude moghen een huys timmeren? Maer alleen daer toe dat die welriekende brant offer voor hem soude ontsteken worden.

7

Hier om sendt my eenen gheleerden man die wercken kan in gout, ende siluer, metael, ende yser in purper ende roode sijde ende hemel blauwe sijde, ende die oock can die conste van snyden wtghegroefde wercken met den constighen werckluyden die ic met my hebbe int Ioetsche lant ende in Ierusalem, die welcke Dauid mijn vader te voren bereyt heeft.

8

Ooc soe sendt my cederen houten, ende archeutinen houten, ende pijnboom houten van lybanus bosch. Want ick weet wel dat v knechten connen houten afhouden van libano, ende mijn knechten sullen met uwen knechten sijn,

9

dat my veel houten moghen bereydt worden. Want thuys dat ik begheer te timmeren, es seer groot ende heerlijc.

10

⁺Hier en bouen sal ick den wercluyden die de houten houwen sullen uwen knechten gheuen tot spijse twintich duysent choren maten tarwen, ende oock alsoe vele choren maten ghersten, ende twintich duysent maten olien.

+ C

11

Ende Hiram die coninck van Tyren heeft gheseyt door eenen brief die hy Salomonen ghesonden hadde. Om dat die Heere sijn volck heeft bemint, daer om heeft hy v doen regneren ouer hen,

12

Ende daer toe sprack hy noch segghende, Ghebenedijt sij die Heere die Godt van Israel die hemel ende aerde ghemaect heeft, die Dauid den coninck ghegheuen heeft eenen wijsen ende gheleerden ende verstandighen ende voersienighen sone, dat hy timmeren soude den Heere een huys, ende een palays voor sy seluen.

13

Hier om heb ick v ghesonden eenen voersienighen ende seer constighen man Hyram

14

mijnen vader eender vrouwen sone van Dans dochteren, Wiens vader was een man van Tyrien die welcke sal weten te wercken in gout ende siluer, metael, ende yser, ende marmorsteenen ende houten, in purpur ooc ende hemelblau zijde ende in edel lijnwaet ende roode zijde, ende die oock wel can groeuen alderhande maniere van ghesneden werck, ⁺ende voorsienlijck vinden al wat in een werck van noode es met uwen wercluyden ende metten wercluyden mijns Heeren Dauids ws vaders.

+ D

15

Hier om die tarwe ende gherste ende olie ende wijn die ghy beloeft hebt mijn Heere siendt uwen knechten.

16

Ende wy sullen houten van Libano houwen, soe veel als v van noode sullen wesen, ende wy sullen die brenghen met vloten doer zee tot in Ioppe, Maer uwen last sal sijn, die te voeren in Ierusalem.

[p. *330]

17

Hier om heeft Salomon ghetelt alle die mannen van den heydenen bekeert ter ioetscap die int lant van Israel waren, nae die tellinghe welck sijn vader Dauid ghetelt hadde, ende daer esser gheuonden hondert ende drijenvijftich duysent ende ses hondert.

18

Ende hy heefter van dien ghemaect tseuentich duysent die metten scouderen lasten draghen souden, ende tachtentich duysent die steenen wten gheberchten houwen souden. Maer drij duysent ende ses hondert ouersten van des volcks wercken.