Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .i. Capittel.

1

⁺ALDUS is Salomon Dauids sone versterct in sijn rijck, ende die Heere was met hem ende hy heeft hem groot ghemaect seer hoochlijck.

+ A

2

Ende Salomon heeft gheheel Israel beuolen den hooft mannen ouer duysent ende den hondert mannen ende den vorsten, ende den rechters van gheheel Israel, ende den princen van die familien,

3

ende hy es met die gheheel

[p. *329]

menichte ghegaen op die hoochde in Gabaon, daer dat tabernakel van des Heeren verbont was, Het welcke Moyses des Heeren knecht ghmaect hadde in die woestijne.

4

Maer die arcke des Heeren hadde Dauid bracht van Cariathiarim ter plaetsen die hy haer bereydt hadde, ende daer hy haer een tabernakel wtghespannen hadde, dat es in Ierusalem.

5

⁺Ende den metalen outaer den welcken ghemaect hadde Bezeleel die sone van Vri, des soens Hur was daer voor dat tabernakel des Heeren, het welcke Salomon ooc versocht heeft ende alle die vergaderinghe.

+ B

6

Ende Salomon es op ghegaen totten metalen outaer voor dat tabernakel van des Heeren verbont, ende hy heeft daer op gheoffert duysent slachtofferanden.

7

Ende siet inden seluen nacht heeft hem Godt gheopenbaert, segghende, Begheert dat ghy wilt, dat ict v gheue.

8

Ende Salomon heeft Gode geseyt, Ghy hebt met Dauid mijnen vader groote bermherticheyt ghedaen, ende ghy hebt my coninck ghemaect voor hem,

9

Nu dan hier om Heere Godt laet volbrocht worden v woert dwelck ghy gheloeft hebt Dauid mijnen vader, Want ghy hebt my coninck ghemaect ouer v groot volck, dwelck soe ontellijck es, als dat stof der aerden.

10

⁺Gheeft my wijsheyt ende verstandicheit, dat ick ingae ende wtgae voor v volck. Want wie mach dit v volck dwelck soe ontellijck es weerdelijcken berechten.

+ C

11

Ende Godt heeft tot Salomon geseyt, Om dat dit uwer herten meer behaecht heeft, ende dat ghy niet en hebt begheert rijckdommen ende substancie ende glorie, noch die zielen der gheender die v haten, Noch oock niet veel daghen des leuens, Maer hebt begheert wijsheyt ende wetentheyt, dat ghy mijn volck soudt moghen berechten daer ouer dat ick v coninck ghemaect hebbe.

12

Soe es v wijsheyt ende wetentheyt ghegheuen, Maer rijcdommen ende substancie ende glorie sal ick v gheuen, alsoe dat niemant onder die coninghen noch voor v noch nae v en sal gheweest sijn ws ghelijck.

13

⁺Aldus es Salomon ghecomen van die hoochde van Gabaon in Ierusalem voor dat tabernakel des verbonts, ende hy heeft ouer Israel gheregneert.

+ D

14

Ende hy heeft voor sy seluen vergadert waghenen ende rosvolck, ende hy heeft ghehadt duysent ende vier hondert waghenen, ende twaelf duysent ruyters te paerde, ende heeftse bestelt te sijne in die waghen steden, ende met den coninck in Ierusalem.

15

Ende die coninck heeft gout ende siluer ghegheuen in Ierusalem ghelijck steenen, ende ceder boomen als wilde vijch boomen, die welcke te platte lande wassen in grooter menichten.

16

Ende hem worden ghebracht peerden wt Egypten ende van Coa van des conincs coopluyden die welcke reysden

17

ende cochten een waghen ghespan van vier peerden om den prijs van ses hondert silueren penninghen, ende een peert om hondert ende vijftich, desghelijcs worde den coop ghehouden van alle der Chetheen conincrijcken, ende van die coninghen van Syrien.