Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxvi. Capittel.

1

⁺HIer om heuet tvock des lants ghenomen Ioachaz den sone van Iosias, ende heeft hem coninck ghemaect voer sijnen vader in Ierusalem.

+ A

2

Drijentwintich iaren out was Ioachaz doen hy begonste te regneren, ende drij maenden regneerde hy in Ierusalem.

3

Maer die coninck van Egypten heeft hem afgheset doen hy in Ierusalem quam, ende hy heeft dat lant ghescadt op hondert talenten siluers, ende een talent gouts.

4

Ende hy heeft voer hem coninck ghemaect Eliacim sijnen broeder ouer Iudam ende Ierusalem, ende hy heeft sijnen naem verandert in Ioacim. Maer den seluen Ioachaz heeft hy met hem ghenomen ende wech gheleyt in Egypten.

5

Vijfentwintich iaren out was Ioacim doen hy begonste te regneren ende elf iaren regneerde hy in Ierusalem, ende hy heeft quaet ghedaen voor den Heere sijnen Godt.

6

⁺Teghen desen is opgheclommen Nabugodonosor die coninck der Chaldeen ende hy heeft hem ghebonden met ketenen wech ghevoert in Babilonien.

+ B

7

Waerwaerts dat hy oock die vaten des Heeren ouerghevoert heeft ende die ghestelt in sijnen tempel.

8

Dander van Ioacims woerden ende van sijnen afgrijsselijcheden die welcke hy ghedaen heeft, ende die in hem gheuonden sijn die sijn begrepen int boeck der coninghen van Iuda ende Israel.

Ende Ioachin sijn sone heeft voor hem gheregneert,

9

Acht iaren out was Ioachin doen hy begonste te regneeren, ende drij maenden ende thien daghen heeft hy gheregneert in Ierusalem, ende hy heeft quaet ghedaen in daenschijn des Heeren.

10

Ende doen dat iaer omme gheloopen was, soe heeft Nabugodonosor die coninck sommighe ghesonden die hem oock hebben ghebrocht in Babilonien, draghende mede die aldercostelijcste vaten van des Heeren huys. Ende hy maecte coninck Sedechiam sijns vaders broeder ouer Iudam ende Ierusalem.

11

Eenentwintich iaren out was Sedechias doen hy begonste te regneren, ende elf iaren regneerde hy in Ierusalem.

12

Ende hy heeft quaet ghedaen in die ooghen des Heeren sijns Gods, ⁺noch hy en heeft hem niet ghescaemt voor daenschijn van Ieremias den propheet, die tot hem sprack wt des Heeren mont.

+ C

13

Vanden coninck Nabugodonosor is hy oock ghesceyden die welcke hem besworen hadde by Gode, ende hy heeft sijnen necke verhart ende sijn herte, dat hy niet wederkeeren en soude tot den Heere den Godt van Israel.

14

Ende oock alle die princen der Priesteren ende tvolck hebben boosselijc ouertreden nae alle die afgriselijcheyt der heydenen, ende sij hebben thuys des Heeren besmet, dwelck hy voer hem gheheylicht hadde in Ierusalem.

15

Ende die Heere haerder vaderen Godt sandt tot hemlieden, doer die hant van sijnen boden des nachts opstaende, ende daghelijcs vermanende om dat hy sijn volck ende sijnder woonsteden spaerde.

16

Maer sij bespotten Gods boden, ende sij achten luttel op sijn woerden, ende sij begecten die propheten, tot dat die rasende gramscap des Heeren op sijn volck quam, ende datter gheen ghenesen aen en was.

17

Want hy heeft op hen ghebracht den coninck der Chaldeen ende heeft hen ionghelinghen metten swaerde verslaghen int huys van sijnder heylegher woonsteden, hy en heeft gheen bermherticheyt ghehadt metten Ionghelinghen ende maechden ende ouden mans, iae ooc niet metten ghenen die van ouderdom crom ghinghen, maer hy heeftse al in sijn handen gheleuert,

18

⁺ende alle die ghereetscappen van des Heeren huys soe wel die meeste als die minste, ende die tresoiren des tempels, ende des conincs ende der princen heeft hy ouergheuoert in Babilonien.

+ D

19

Die vianden hebben thuys Gods verbrant ende den muer van Ierusalem gebroken, alle die torren hebben sij verbrant ende al wat costelijck was, hebben sij verdoruen.

20

Soe wie dat swaert ontgaen was, die werde in Babilonien gheleyt ende heeft den coninck ghedient ende sijnen sonen, tot dat die coninck van Persen regneerde.

21

Om dat volbracht soude worden des Heeren woert wt den mont van Ieremias, ende dat het lant sijn sabbathen soude houden, want alle die daghen der verwoestinghen heeft dat den sabbath ghehouden tot dat veruult waren tseuentich iaren.

22

Maer in dierste iaer van Cyrus den coninck van Persen om te voldoen des Heeren woert dat hy ghesproken hadde doer den mont van Ieremias, heeft die Heere verwect Cyrus des conincs van Persen gheest, die welcke heeft doen openbaer wt roepen in alle sijn rijck, oock doer scriften, segghende,

23

Dit seyt Cyrus die coninck van Persen. Alle die rijcken vander aerden heeft my ghegheuen die Heere die Godt des hemels, ende hy heeft my gheboden dat ick hem een huys timmeren soude in Ierusalem, welck is dioetsche lant. Wie isser van v lieden onder alle sijn volck? Die Heere sijn Godt moet met hem sijn, ende hy treck op waerts.

Hier volint het tweede boeck Paralipomenon.