Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxviij. Capittel.

1

⁺HIer om heeft Dauid tsamen gheroepen alle die princen van Israel, die hooftluyden der gheslachten, ende die ouersten der scharen, die den coninck dienden, die duysent mannen ende die hondert mannen, ende die ouer den rijcdom ende besittinghe des conincs waren, ende sijn sonen metten ghesneden camerlinghen, ende die machtighe ende alle die stercste des heyrs, in Ierusalem.

+ A

2

Ende als die coninck opghestaen was ende stont, soe heeft hy gheseyt. Hoort my mijn broeders ende mijn volc. Ick heb ghedacht dat ick timmeren soude een huys daer die arcke van des Heeren verbont rusten soude, ende een voetbancke van ons Gods voeten, ende ick hebt al bereyt om te timmeren.

3

Maer Godt heeft my gheseyt, Ghy en sult mijnen naem gheen huys timmeren, om dat ghy een oorloochs man sijt ende bloet ghestort hebt.

4

Maer die Heere die Godt van Israel heeft my ghecoren van tgheheel huys mijns vaders, dat ic soude wesen een coninck ouer Israel inder eewicheyt, want van Iuda heeft hy die princen ghecoren. ⁺Voerts van Iudas huys, mijns vaders huys, ende van mijns vaders sonen heeft hem belieft dat hy my kiesen soude eenen coninck ouer gheheel Israel.

+ B

5

Ende ooc van mijnen sonen. (Want die Heere heeft my veel sonen ghegheuen) heeft hy Salomon mijnen sone ghecoren, dat hy sitten soude op den stoel van des Heeren conincrijc ouer Israel,

6

ende hy heeft my gheseyt Salomon v sone, sal mijn huys timmeren, ende mijn voerhouen want ic heb hem voor my tot eenen sone ghecoren, ende ick sal hem tot eenen vader wesen.

7

Ende ick sal sijn rijck vestighen tot inder eewicheyt, eest dat hy volherdert te doen mijn gheboden, ende rechten, ghelijck oock heden.

8

Hier om nv voor die gheheel vergaderinghe van Israel daert onse Heere hoort, bewaert ende soect naerstelijck alle die gheboden des Heeren ons Gods, dat ghy dat goede lant besittet, ende dat ghy die achterlatet uwen kinderen nae v tot inder eewicheyt.

9

Maer ghy Salomon mijn sone, kent den Godt ws vaders, ende dient hem met een volcomen herte, ende met eenen willeghen moede. Want die Heere ondersuect alle herten, ende alle die ghedachten der verstanden verstaet hy. Eest dat ghy hem suect ghy sult hem vinden, Maer eest dat ghi hem verlaet, soe sal hy v wech worpen inder eewicheyt.

10

Hier om nv aenghesien dat die Heere v vercoren heeft, dat ghy timmeren soudt thuys der heyligher wooninghen, soo wert versterct ende volbrengt dat.

11

⁺Ende Dauid heeft Salomon sijnen sone ghegheuen tbeworp des portaels, ende des tempels, ende der scatcameren, ende der eedt cameren, ende der slaepcameren int heymelijcste, ende van thuys der versoeninghen.

+ C

12

Ende ooc mede van allen die hy ghedacht hadde voorhouen, wijde cameren int ronde, tot die scatten van des Heeren huys, ende tot die scatten der heylegher dinghen,

13

ende der priesterlijcker ende Leuitelijcker deylinghen tot allen des Heeren wercken, ende tot alle die ghereedtscappen des dienst van des Heeren tempel.

14

Gout met ghewichte nae alle die ghereetscappen des diensts besonder. Ende ooc ghewicht van siluer nae die versceyden manier der ghereetscappen ende der wercken.

15

Ende ooc tot die gulden candelaren, ende tot hen luchters, gout nae die mate van elcken candelaer ende luchters, Desghelijcs ooc tot die silueren candelaren, ende tot haren luchters, nae dat ondersceedt der maten heeft hy tghewicht des siluers ghegheuen.

16

Ooc heeft hy gout ghegheuen tot die tafelen der voorlegghinghe, nae die versceydenheyt der tafelen, ⁺desghelijcs oock siluer tot die ander silueren tafelen.

+ D

17

Ende tot die crauwelkens ende fiolen ende wieroocvaten van den puersten goude, ende tot die gulden leukens nae die manier der maten heeft hy tghewicht wt ghedeylt, tot elcken leuwken. Desghelijcs ooc tot silueren leuwen heeft hy versceyden ghewicht van siluer wtghesceyden.

18

Ende tot den outaer daermen den welriekenden offer op offert, heeft hy dalder puerste gout ghegheuen datmen daer af maken soude ghelijckenisse van eenen waghen der cerubims hen vloghelen wtreyckende, ende bedeckende die arcke van des Heeren verbont.

19

Alle dese dinghen (seyt hy) sijn tot my ghecomen ghescreuen met des Heeren hant, dat ic verstaen soude alle die wercken van dat beworp.

20

Ende Dauid heeft ooc Salomon sijnen sone gheseyt. Hebt v manlijck ende weest vroem, ende maket, En vreest niet ende en veruaert v niet. Want die Heere mijn Godt sal met v sijn, ende hi en sal v niet afgaen noch verlaten tot dat ghy volbracht hebt alle die wercken des diensts van des Heeren huys.

21

Siet die deylinghen der priesters ende der Leuiten tot allen diensten van des Heeren huys staen v by, ende sij sijn bereedt, ende soe wel die princen alst tghemeyn volck weeten ooc wel te doen allen v gheboden.