Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxix. Capittel.

1

⁺ENde Dauid die coninck heeft ghesproken tot alle die vergaderinghe Salomonen mijnen sone heeft Godt sonderlinghe vercoren die noch een kint ende teederkens es. Want het werck es groot, aenghesien dat die wooninghe gheenen mensch maer Gode bereyt wort.

+ A

2

Maer ick heb met alle mijn crachten bereydt die costen van mijns Gods huys. Gout tot die gulden ghereetscappen, ende siluer tot silueren ghereetscappen, ende metael tot metalen, yser tot yseren, hout tot houten, ende onichinus steenen, ende ghelijck strijbinus steenen, ende van versceyden verwen, ende alderhande costelijcke steenen, ende marmersteenen van parien, seer oueruloedelijck,

3

ende bouen dese die ick gheoffert hebbe int huys mijns Godts, van mijnen eyghenen goede gheue ic gout ende siluer tot mijns Gods tempel, wtghenomen die dinghen die ick bereydt hebbe tot dat heylich huys.

4

⁺Drij duysent talenten gouts van Ophirs gout, ende seuen duysent talenten van den fijnsten siluer om te vergulden die mueren des tempels.

+ B

5

Ende soe waer tgout van noode es, van goude, ende soe waer dat siluer van noode es, sullen die wercken van siluer ghemaect worden door die handen der constelijcker wercluyden. Ende eest dat iemant vrijwilichlijck offert, die vulle sijn hant heden ende offere dat hy

[p. *328]

wilt den Heere.

6

Hier om hebben gheloeft die princen der familien ende hooftluyden der gheslachten van Israel, ende die hoofmannen ouer duysent mannen, ende die hondertste mannen, ende die princen der princen van des conincs besittinghen.

7

Ende sij hebben ghegheuen totten wercken van des Heeren huys vijf duysent talenten gouts, ende thien duysent silueren penninghen, ende thien duysent talenten siluers, ende achthien duysent talenten metaels. Ende oock hondert duysent talenten ysers.

8

Ende by wien dat ghesteenten gheuonden waren, die hebbense ghegeuen in die scatten van des Heeren huys, door die hant van Iahiel die Gersoniter.

9

⁺Ende tvolck heeft hem verblijdt als sij die beloften vrijwillichlijck gheloefden, want met gheheelder herten offerden sij die den Heere. Ende Dauid die coninck heeft hem ooc verblijdt met grooter blijscappen.

+ C

10

Ende hy heeft den Heere ghebenedijt voor die gheheel menichte, ende hy seyde, Ghebenedijt sijdi Heere Godt van Israel onse vader vander eewicheyt tot inder eewicheyt.

11

Want uwe es o Heere die grootdadicheyt, ende machticheyt, ende glorie, ende victorie, ende v sij lof, want alle dat in den hemel es ende inder aerden es uwe, uwe es Heere het rijck ende ghy sijt bouen allen princen,

12

uwe sijn die rijckdommen, ende uwe es die glorie, ende ghi hebt heerscappie ouer al, in v hant es cracht ende moghentheyt, in v hant es die grootheyt ende tghebodt van allen dinghen.

13

Nv dan hier omme belijden wy v onse Godt, ende louen uwen heerlijcken naem.

14

⁺Wie ben ick ende wat es mijn volck dat wij v souden moghen alle dese dinghen ghelouen? Alle dinghen sijn uwe, ende tghene dat wij van uwen handen ontfanghen hebben dat hebben wy v ghegheuen.

+ D

15

Want wy sijn wtlanders voor v ende vremdelinghen, ghelijck alle onse vaders. Onse daghen sijn ghelijck een scaduwe op die aerde, ende daer en es gheen gheduericheyt.

16

O Heere onse Godt alle dese groote menichfuldicheyt die wy bereydt hebben om dat ghetimmert soude worden een huys voor uwen heyleghen naem dat es van uwer hant, ende alle dinghen sijn uwe.

17

Ick weet wel mijn Godt dat ghy die herten ondersoect ende die simpelheyt bemint. ⁺Daer om heb ic in die simpelheit mijns herten blijdelijck gheoffert alle dese dinghen, ende v volck dat hier gheuonden es, heb ic met grooter blijscap ghesien v giften offeren.

+ E

18

O Heere Godt van Abraham ende Isaac ende Israel onsen vaderen bewaert inder eewicheyt desen wille van haer lieder herten, ende laet altijt tot uwer eeren dese meyninghe blijuen.

19

Salomon mijnen sone gheeft oock een volmaect herte, dat hy bewaere v gheboden, v ghetuyghenissen, ende v ceremonien, ende dat hy dese al doe, ende dat hy timmere dat huys welcs costen ic bereyt hebbe.

20

Ende Dauid heeft der gheheelder vergaderinghen gheboden, Gebenedijt den Heere onsen Godt. Ende alle die vergaderinghe heeft ghebenedijt den Heere haerder vaderen Godt ende sij hebben hen neder ghebuycht, ende hebben Godt aenghebeden, ende daer nae den coninck.

21

Ende sij hebben den Heeren slachofferanden ten offer ghedoot, ⁺ende sij hebben heelbrant offeranden gheoffert des ander daechs, duysent stieren, duysent rammen, duysent lammeren met haren vochtighen offeranden, ende met allen die behoirten seer oueruloedelick in gheheel Israel.

+ F

22

Ende sij hebben gheten ende ghedroncken voor den Heere op dien dach met grooter blijscap, ende sij hebben Salomon Dauids sone anderwerf ghesalft. Ende sij hebben hem ghesalft den Heere tot eenen prince, ende Sadoc tot eenen ouersten priester.

23

Ende Salomon heeft gheseten op des Heeren rijcstoel, tot eenen coninck in Dauids sijns vaders plaetse, ende heeft eenen ieghelijck wel behaecht, ende gheheel Israel heeft hem onderdanich gheweest.

24

Ende ooc alle die princen ende machtighen ende alle die sonen des conincs Dauid hebben die hant ghegheuen, ende sijn onderdanich gheweest Salomon den coninck.

25

Aldus heeft die Heere Salomon groot ghemaect ouer gheheel Israel, ende hy heeft hem die glorie des conincrijcs ghegheuen, alsulcke als noyt coninck van Israel voor hem ghehadt en hadde.

26

Aldus heeft Dauid die sone van Isai gheregneert ouer gheheel Israel,

27

⁺ende die daghen welck hy gheregneert heeft ouer Israel waren veertich iaren, In Hebron heeft hy gheregneert seuen iaren, ende in Ierusalem drijendertich iaren.

+ G

28

Ende hy es ghestoruen in goeder ouderdom, vol daghen ende rijcdommen ende glorie, ende Salomon sijn sone heeft voor hem gheregneert.

29

Maer die ierste ende leste ghesciedenissen Dauids des conincs sijn ghescreuen int boeck van Samuel die siender, ende inden boeck Nathan des propheets, ende int boeck Gad des sienders,

30

ende van alle sijn rijck ende vromicheyt, ende der tijden die onder hem gheleden sijn, tsij in Israel, oft in alle die rijcken van eertrijck.

Hier eyndt dat ierste boeck Paralipomenon.