Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺ENde Sathan is opghestaen teghen Israel, ende hy heeft Dauid opgheruct dat hy Israel tellen soude,

+ A

2

Ende Dauid heeft tot Ioab geseyt ende tot die princen des volcs. Gaet henen ende telt Israel van Bersabee tot Dan toe, ende brengt my tghetal dat ict wete,

3

Ende Ioab heeft gheantwoort. Die Heere vermeerdere sijn volc, hondertmaet meer dan sij sijn, Maer mijn heere die coninck en sijnt niet alle uwe knechten? Waerom begheert mijn heere dit, het welcke Israhel tot een sonde gherekent sal worden?

4

Maer des conincks woort heeft meer verwonnen, ende Ioab is wtghegaen ende heeft gheheel Israel omme ghegaen, ende hy is wederghekeert in Ierusalem

5

Ende hy heeft Dauiden tghetal ghegheuen vanden ghenen die hy ommeghegaen hadde, ende alle tghetal van Israel is beuonden duysentich duysent ende hondert duysent mannen die swaerden wt trocken, Maer van Iuda waren vier hondert ende tseuentich duysent vechtender

[p. *323]

mannen,

6

want Leui ende Beniamin en heeft hi niet getelt, om dat Ioab noode des conincs gebodt volbrachte.

7

Ende het mishaechde Gode datter gheboden was ende hy heeft Israel gheslaghen,

8

Ende Dauid heeft tot Godt gheseyt. Ic heb bouen maten seer ghesondicht dat ick dit doen soude, Ick bidde v neemt af die boosheyt ws knechts, want ick heb onwijselijck ghedaen,

9

⁺Ende die Heere heeft ghesproken tot Gad Dauids siender segghende.

+ B

10

Gaet henen ende spreect tot Dauid, ende segt hem, Dit seyt die Heere. Van drijen gheue ick v coese, Kiest een dat ghy wilt, ende ic salt v doen,

11

Ende als Gad tot Dauid comen was so heeft hy hem gheseydt. Dit seyt die Heere. Kiest dat ghy wilt,

12

oft drij iaren die pestilencie, oft dat ghi drij maenden vliedt voor v vianden, ende haer swaert niet te moghen ontgaen, oft drij daghen tsweert des Heeren ende die doot verkeeren int lant, ende dat den Enghel des Heeren dootslae in alle die palen van Israel, Hierom siet nv wat ick hem antwoorden sal die my ghesonden heeft,

13

Ende Dauid heeft tot Gad gheseyt. Van allen sijden pramen my die bannicheden, maer tis my beter dat ic valle in des Heeren handen, want sijn bermherticheden veel sijn, dan in die handen der menschen

14

Hierom heeft die Heere die pestilencie in Israel ghesonden, ende daer isser van Israel gheuallen tseuentich duysent mannen,

15

Ende hy heeft den Enghel oock ghesonden in Ierusalem, dat hy die slaen soude, ende als die gheslaghen worde soo heuet die Heere ghesien, ende heeft bermherticheyt ghehadt ouer die grootheyt des quaets, ende hy heeft gheboden den Enghel die daer sloech. Tis ghenoech, laet nv v hant ophouden, Ende die Enghel des Heeren stont by den dorschuloer van Ornan des Iebuseiters,

16

⁺Ende Dauid opheffende sijn ooghen heeft ghesien den Enghel des Heeren staende tusschen hemel ende eerde, ende een bloot swaert in sijn hant ende ghekeert teghen Ierusalem, ende sij sijn neder gheuallen soo wel hy als die ouders ghecleedt met hayren cleederen metten aensicht plat ter aerden,

+ C

17

Ende Dauid heeft tot Godt gheseyt. En ben ict niet die gheboden hebbe datmen tvolc tellen soude? Ick bent die ghesondicht hebbe, ic bent die tquaet ghedaen hebbe, wat quaet heeft dit cudde scapen verdient? Heere mijn Godt, Ick bidde v laet v hant op mi ghekeert worden, ende op mijns vaders huys, maer v volck en laet niet gheslaghen worden.

18

Ende die Enghel des Heeren heeft Gad gheboden dat hy Dauid segghen soude, dat hy opgaen soude ende timmeren eenen outaer den Heere den Godt in den dorschuloer van Ornan den Iebuseiter,

19

Hierom is Dauid opghegaen nae Gads woort dat hy hem ghesproken hadde wt den naem des Heeren,

20

Ende doen Ornan opghesien hadde ende ghesien den Enghel ende sijn vier sonen met hem soo hebben sij hen gheborghen, want op dien tijt soo dorschte hy tarwe opden dorschuloer,

21

Aldus doen Dauid tot Ornan quam, ⁺soo sach hem Ornan ende hy is hem te ghemoete ghecomen vanden dorschuloer, ende hy heeft hem aenghebeden plat neder ghebuycht ter aerden,

+ D

22

Ende Dauid heeft tot hem gheseyt. Geeft my die plaetse van uwen dorschuloer, dat ick daer in eenen outaer den Heere mag timmeren, alsoo dat ghy soo veel siluers neemt als hi weert is, ende dat die plaghe mach ophouden vanden volcke,

23

Ende Ornan heeft tot Dauid gheseyt. Neemt dien, ende mijn heere die coninc doe al dat hem belieft, maer oock gheue ick ossen totten brantoffer, ende die dorsch instrumenten tot hout ende tarwe tot sacrificie, Ick salt al gheerne gheuen

24

Ende die coninc heeft tot hem gheseyt. Ten sal gheensins alsoo gehscieden, maer ick sal siluer gheuen soo veel als dien weert is, want ick en behoore v dat niet af te nemen, ende alsoo Gode te offeren brantofferanden sonder cost,

25

Hierom heeft Dauid ghegheuen Ornan voor die plaetse ses hondert siclen gouts van seer rechten ghewichte,

26

ende hy heeft daer den Heere eenen outaer ghetimmert, ende hy heeft gheoffert brantofferanden ende vreedofferanden, ende hy heeft den Heere aengheroepen, ende die heeft hem verhoort doort vier vanden hemel opden outaer des brantoffers

27

Ende die Heere heeft den Enghel gheboden, ende hy heeft sijn swaert in die sceyde ghekeert,

28

Hierom Dauid terstont siende dat die Heere hem verhoort hadde inden dorschuloer van Ornan den Iebuseiter heeft daer slachofferanden ghedoodt ten offer,

29

Ende het tabernakel des Heeren dat Moyses in die woestijne ghemaect hadde, ende den outaer der brantofferanden, was te dier tijt op die hoochde tot Gabaon

30

Ende Dauid en mocht niet gaen tot dien outaer dat hy daer Godt soude bidden, want hy met wtnemende grooten grouwel veruaert was siende tsweert van des Heeren Enghel.